ຜູ້ນຳສຽງສ່ວນນ້ອຍໃນສະພາຕ່ຳສະຫະລັດ ທ່ານນາງ Nancy Pelosi ແລະ ບັນດາສະ ມາຊິກສະພາຕ່ຳສັງກັດພັກເດໂມແຄຣັດ ຮຽກຮ້ອງໃຫ້ພັກຣີພັບບລີກັນເປີດປະຊຸມນັດພິເສດຂອງສະພາ ເພື່ອແກ້ໄຂເລື້ອງໄວຣັສ Zika ແລະບັນຫາຮີບດ່ວນອື່ນໆ.
ທ່ານນາງ Pelosi ກ່າວຕໍ່ກອງປະຊຸມຖະແຫຼງຂ່າວທີ່ຕຶກລັດຖະສະພາສະຫະລັດວ່າ ລັດ ຖະບານປະທານາທິບໍດີ ບາຣັກ ໂອບາມາ ອາດຈະນຳໃຊ້ເງິນ ໃນຈຳນວນເພີ້ມຂຶ້ນ ເພື່ອປາບປາມໄວຣັສ Zika ພາຍໃນນຶ່ງ ຫຼືສອງມື້ຂ້າງໜ້ານີ້. ແຕ່ທ່ານນາງ Pelosi ຮຽກຮ້ອງໃຫ້ສະມາຊິກຂອງພັກຣີພັບບລີກັນ ກັບຄືນມາວໍຊິງຕັນ ເພື່ອກະກຽມຮ່າງກົດໝາຍ ທີ່ຈະສະໜອງທຶນຕໍ່ການປາບປາມເຊື້ອໄວຣັສດັ່ງກ່າວ.
ລັດຖະບານທ່ານໂອບາມາ ໄດ້ຮ້ອງຂໍເງິນ 1 ພັນ 900 ລ້ານໂດລາ ໃນເດືອນກຸມພາຜ່ານມາ ແຕ່ສະພາຕ່ຳສະຫະລັດພາຍໃຕ້ການນຳພາຂອງພັກຣີພັບບລີກັນ ໄດ້ເລີ້ມການຫາລືກ່ຽວກັບມາດຕະການ ມູນຄ່າ 1 ພັນ 100 ລ້ານໂດລາ ທີ່ໄດ້ຕົກຢູ່ໃນສະພາບ ບໍ່ໄປບໍ່ມາຍ້ອນການບໍ່ລົງລອຍກັນນັ້ນ.
ສະມາຊິກພັກຣີພັບບລີກັນ ກ່າວວ່າ ລັດຖະບານທ່ານໂອບາມາ ແມ່ນກຳລັງນັ່ງທັບກອງທຶນທີ່ຍັງບໍ່ມີການໃຊ້ຈ່າຍຊຶ່ງສາມາດຈັດສັນໃໝ່ໃຫ້ແກ່ການປາບປາມເຊື້ອໄວຣັສ Zika ໄດ້.
ຕົ້ນຕໍແລ້ວ ເຊື້ອໄວຣັສ Zika ໄດ້ຖືກພົບເຫັນ ຢູ່ທີ່ປະເທດບຣາຊີລໃນປີກາຍນີ້ ແລະນັບແຕ່ນັ້ນ ກໍໄດ້ແຜ່ລະບາດ ຢ່າງວ່ອງໄວ ໄປທົ່ວທະວີບອາເມຣິກາ. 21 ກໍລະນີ ໄດ້ຖືກຄົ້ນ ພົບເມື່ອໄວໆມານີ້ ຢູ່ລັດຟລໍຣິດາ ຊຶ່ງພາໃຫ້ລັດຖະບານ ທ່ານໂອບາມາ ຕ້ອງໄດ້ຈັດງົບ ປະມານ 600 ລ້ານໂດລາໃນທັນທີ ເພື່ອປາບປາມເຊື້ອໄວຣັສນີ້.
ສະມາຊິກສະພາຕ່ຳ Rosa DeLauro ກ່າວວ່າ ມີຄວາມຕ້ອງການເງິນເພີ້ມຕື່ມອີກຍ້ອນວ່າສູນກາງປ້ອງກັນແລະຄວບຄຸມແລະປ້ອງກັນພະຍາດຂອງສະຫະ ລັດຈະໝົດເງິນໃນການປາບປາມ ໄວຣັສ Zika ພາຍໃນທ້າຍເດືອນກັນຍາ ຈະມານີ້. ທ່ານນາງ DeLauro ກ່າວຕື່ມວ່າ ອີກສອງພະແນກການຂອງລັດຖະບານກາງ ກໍຈະໝົດເງິນໃຊ້ຈ່າຍພາຍໃນທ້າຍເດືອນສິງຫານີ້.
ອ່ານຂ່າວນີ້ຕື່ມເປັນພາສາອັງກິດ
