ລິ້ງ ສຳຫລັບເຂົ້າຫາ

ຕໍາຫຼວດຮົງກົງ ບຸກເຂົ້າໄປກວດຄົ້ນ ສໍານັກງານ ໜັງສືພິມ ແອບເປີລ ເດລີ ທີ່ນິຍົມປະຊາທິປະໄຕ


ສໍາເນົາໜັງສືພິມ ແອບເປີລ ເດລີ (Apple Daily) ຂອງ ເນັກສ ດິຈິຕອລ (Next Digital) ຖືກວາງຈໍາໜ່າຍທີ່ຮ້ານຂາຍໜັງສືພິມໃນ ຮົງກົງ.

ຕໍາຫລວດຮົງກົງ (Hongkong) ໄດ້ບຸກເຂົ້າໄປກວດຄົ້ນ ສໍານັກງານໜັງສືພິມເພື່ອປະຊາທິປະໄຕ ແອບເປີລ ເດລີ (Apple Daily) ເມື່ອວັນພະຫັດມື້ນີ້ ແລະຈັບກຸມຜູ້ບໍລິຫານງານ 5 ຄົນ ລວມເຖິງຫົວໜ້າບັນນາທິການ.

ການບຸກເຂົ້າໄປກວດຄົ້ນ ແລະຈັບກຸມ ໄດ້ດໍາເນີນການພາຍໃຕ້ ກົດໝາຍວ່າດ້ວຍຄວາມໝັ້ນຄົງແຫ່ງຊາດ ທີ່ມີອາຍຸເກືອບໜຶ່ງປີ ທີ່ີບັງຄັບໃຊ້ໂດຍລັດຖະບານປັກກິ່ງ ໃນປີກາຍນີ້. ຕໍາຫລວດໄດ້ກ່າວວ່າ ຜູ້ບໍລິຫານທັງ 5 ຄົນຂອງບໍລິສັດໄດ້ຖືກຈັບກຸມ ໃນຂໍ້ຫາສົມຮູ້ຮ່ວມຄິດກັບຕ່າງປະເທດ ຫລືອົງກອນທາງນອກທີ່ເປັນອັນຕະລາຍຕໍ່ຄວາມໝັ້ນຄົງແຫ່ງຊາດ.

ທາງສໍານັກງານໜັງສືພິມ Apple Daily ໄດ້ກ່າວວ່າ ຫົວໜ້າບັນນາທິການທ່ານ ໄຣອັນ ລໍ (Ryan Law) ແລະຜູ້ບໍລິຫານງານອີກສີ່ຄົນ ພ້ອມດ້ວຍບໍລິສັດແມ່ ເນັກສ ດິຈິຕອລ (Next Digital) ຂອງທາງສໍານັກງານກໍ່ໄດ້ຖືກຈັບກຸມ.

ມີເຈົ້າໜ້າທີ່ຕໍາຫລວດຫລາຍກວ່າ 200 ຄົນໄດ້ບຸກເຂົ້າໄປກວດຄົ້ນສໍານັກງານຂອງ Apple Daily ໃນວັນພະຫັດມື້ນີ້.

ພາບວີດີໂອທີ່ຖືກເອົາລົງໃນໜ້າ ເຟສບຸຸກ (Facebook) ຂອງໜັງສືພິມ ໄດ້ສະແດງໃຫ້ເຫັນເຈົ້າໜ້າທີ່ຕໍາຫລວດລວມໂຕກັນປິດລ້ອມອາຄານຂອງສໍານັກງານ ແລະຍ່າງເຂົ້າໄປໃນບໍລິເວນຫ້ອງຂ່າວ. ຕໍາຫລວດໄດ້ປະກາດອອກມາວ່າ ຕົນມີໃບມອບໝາຍອໍານາດໃຫ້ເຂົ້າມາກວດຄົ້ນ ເກັບກໍາ ແລະຮວບຮວມຫລັກຖານຂອງການລະເມີດກົດໝາຍຄວາມໝັ້ນຄົງແຫ່ງຊາດ.

ລັດຖະມົນຕີປ້ອງກັນຄວາມສະຫງົບຂອງຮົງກົງ ທ່ານ ຈອນ ລີ (John Lee) ໄດ້ກ່າວກັບນັກຂ່າວຫລັງຈາກນັ້ນວ່າ ການບຸກເຂົ້າໄປກວດຄົ້ນ ແມ່ນມຸ້ງເປົ້າໝາຍໄປທີ່ການຂຽນຂ່າວ “ທີ່ເປັນອາວຸດອັນຕະລາຍຕໍ່ຄວາມໝັ້ນຄົງແຫ່ງຊາດ”

ອ່ານຂ່າວນີ້ເພີ້ມເຕີມເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG