ບັນດານັກສຶກສາ ແລະ ເຈົ້າໜ້າທີ່ລັດຖະບານ ໃນຮົງກົງ ກ່າວວ່າ
ເຂົາເຈົ້າໄດ້ບັນລຸຂໍ້ຕົກລົງ ທີ່ຈະເລີ້ມທຳການເຈລະຈາຢ່າງເປັນ
ທາງການ ໃນທ້າຍອາທິດນີ້ ກ່ຽວກັບຂໍ້ຮຽກຮ້ອງຕ່າງໆ ສຳຫລັບ
ການປະຕິຮູບ ທາງການເມືອງນັ້ນ.
ຫຼັງຈາກໄດ້ພົບປະກັບບັນດາຜູ້ຕາງໜ້ານັກສຶກສາ ໃນແລງວັນ
ອັງຄານວານນີ້ ຮອງລັດຖະມົນຕີກິດຈະກຳລັດຖະທຳມະນູນ
ຂອງຮົງກົງ ທ່ານ Lau Kong-wah ກ່າວວ່າ ການເຈລະຈາກັບ
ທ່ານນາງ Carrie Lam ເລຂາທິການໃຫຍ່ຂອງດິນແດນ ກໍຄື
ຮົງກົງນັ້ນ ຈະເລີ້ມຂຶ້ນໃນວັນສຸກ ທີ່ຈະມາເຖິງນີ້.
ທ່ານກ່າວຕໍ່ວ່າ ການພົບປະກັນ ແມ່ນຈະເພັ່ງເລັ່ງໃສ່ ບັນຫາດ້ານລັດຖະທຳມະນູນຕ່າງໆ
ຊຶ່ງທ່ານກ່າວຕື່ມອີກວ່າ “ພວກເຮົາໄດ້ສະເໜີ 2 ຫົວຂໍ້ ສຳຫລັບກອງປະຊຸມ. ໜຶ່ງ
ແມ່ນພື້ນຖານ ຂອງລັດຖະທຳມະນູນ ກໍຄື ການພັດທະນາລັດຖະທຳມະນູນ. ສອງ
ແມ່ນຂໍ້ບັງຄັບທາງກົດໝາຍ ສຳຫລັບການພັດທະນາ ຂອງລັດຖະທຳມະນູນ.”
ຂ່າວກ່ຽວກັບກຳນົດເວລາພົບປະກັນ ໄດ້ມີຂຶ້ນ ໃນຂະນະທີ່ໂຮງຮຽນ ແລະຮ້ານຄ້າຕ່າງໆ ໄດ້ເປີດຄືນ ຢູ່ໃນອະດີດອານານິຄົມແຫ່ງນັ້ນຂອງ ອັງກິດ ພ້ອມກັບທີ່ຈຳນວນນັກສຶກສາປະທ້ວງ ຢູ່ສະຖານທີ່ຕ່າງໆ ໄດ້ລົດລົງເຫຼືອພຽງບໍ່ເທົ່າໃດຮ້ອຍຄົນເທົ່ານັ້ນ ຈາກຫຼາຍໝື່ນຄົນ ທີ່ໄດ້ອອກມາອັ່ງອໍເຕັມຖະໜົນຫົນທາງຕ່າງໆ ເປັນເວລາດົນກ່ວານຶ່ງອາທິດ.
ທ່ານ Lester Shum ຮອງເລຂາທິການໃຫຍ່ ຂອງສະຫະພັນນັກສຶກສາທົ່ວຮົງກົງ ບອກ
ກັບບັນດານັກຂ່າວວ່າ ເຖິງແມ່ນວ່າຈຳນວນພວກ ອອກມາປະທ້ວງ ໄດ້ເບົາບາງລົງໃນວັນອັງຄານວານນີ້ ກໍຕາມ ແຕ່ທ່ານເຊື່ອວ່າ ຄວາມສະໜັບສະໜຸນ ຕໍ່ການເຄື່ອນໄຫວ ຍັງ
ຄົງແຂງແຮງຢູ່.
