ການປະທະກັນໃນຮົງກົງ ລະຫວ່າງພວກປະທ້ວງນິຍົມປະຊາ
ທິປະໄຕ ແລະຕຳຫຼວດ ໄດ້ອັດພວກຫ້ອງການຕ່າງໆຂອງລັດ
ແລະສະພາລົງ.
ພວກປະທ້ວງຫົວນິຍົມປະຊາທິປະໄຕຮົງກົງຫຼາຍຮ້ອຍຄົນ
ໄດ້ປະທະກັບຕຳຫຼວດ ໃນຂະນະທີ່ພະຍາຍາມຂະຫຍາຍ
ການປະທ້ວງຂອງພວກເຂົາເຈົ້າອອກໄປ ຢູ່ນອກສຳນັກງານ
ໃຫຍ່ຂອງລັດຖະບານ.
ພວກປະທ້ວງໄດ້ບຸກຜ່າແນວປ້ອງກັນຂອງຕຳຫຼວດເຂົ້າໄປ
ໃນເຊົ້າມືດວັນຈັນມື້ນີ້ ໃນຄວາມພະຍາຍາມເພື່ອເຂົ້າຄອບ
ຄອງຖະໜົນໃຫຍ່ສາຍນຶ່ງໃນຄຸ້ມ Admiralty. ພວກຕຳຫຼວດປາບຈະລາຈົນຫຼາຍຮ້ອຍ
ຄົນທີ່ມີເຄື່ອງ spray ໝາກເຜັດແລະໄມ້ຄ້ອນ ໄດ້ຊຸກຍູ້ພວກປະທ້ວງກັບຄືນໄປ ຊຶ່ງໄດ້
ເຮັດໃຫ້ພວກປະທ້ວງຫຼາຍຄົນ ໄດ້ຮັບບາດເຈັບ ແລະຖືກຈັບກຸມຢ່າງໜ້ອຍ 18 ຄົນ.
ເຈົ້າໜ້າທີ່ຕຳຫຼວດກ່າວວ່າ ເຂົາເຈົ້າ“ບໍ່ມີທາງເລືອກອື່ນໃດ” ນອກຈາກໃຊ້ເຄື່ອງສີດ
spray ໝາກເຜັດ ແລະໄມ້ຄ້ອນ ໃນຄວາມພະຍາຍາມເພື່ອເຮັດໃຫ້ການປະທະກັນ
ລົດລົງ.
ທ່ານ Lai Tung-wok ຫົວໜ້າຮັກສາຄວາມປອດໄພຮົງກົງກ່າວວ່າ :“ຂ້າພະເຈົ້າ
ຄຶດວ່າ ສິ່ງທີ່ເກີດຂຶ້ນໃນຄືນຜ່ານມານີ້ ສະແດງໃຫ້ເຫັນຢ່າງເຕັມສ່ວນວ່າ
ການປະທ້ວງໄດ້ເລີຍເຖີດ ກາຍອັນທີ່ພວກເຂົາເຈົ້າໄດ້ ປະກາດໄປນັ້ນ. ຫຼັງ
ຈາກໄດ້ອອກຄຳເຕືອນຊ້ຳແລ້ວຊ້ຳອີກ ຕຳຫຼວດຈຳເປັນຕ້ອງທຳການເຄື່ອນ
ໄຫວຢ່າງເດັດຂາດ ເຂົາເຈົ້າບໍ່ມີທາງເລືອກເພາະວ່າ ມັນແມ່ນໜ້າທີ່ຂອງເຂົາ
ເຈົ້າ ທີ່ຈະຕ້ອງຮື້ຟື້ນກົດໝາຍແລະຄວາມເປັນລະບຽບ ກັບຄືນມາ.”
ນັບວ່າເປັນຄັ້ງຫຼ້າສຸດໃນການປະທະຕິດຕໍ່ກັນມາຫຼາຍຄັ້ງ ລະຫວ່າງຕຳຫຼວດ ແລະພວກ
ປະທ້ວງໃນຮອບໜຶ່ງສັບປະດາຜ່ານມາ. ໃນວັນສຸກແລ້ວນີ້ ຕຳຫລວດໄດ້ທຳການຕໍ່ສູ້ກັນ
ກັບພວກນັກສຶກສາປະທ້ວງ ໃນຂະນະທີ່ກຳລັງທຳການສະສາງເຄື່ອງກີດກັນອອກໄປຈາກ
ຖະໜົນໃຫຍ່ ໃນຄຸ້ມ Mong Kok. ພວກປະທ້ວງຫຼາຍຄົນ ໄດ້ຖືກຈັບກຸມ ຮວມທັງພວກຜູ້
ນຳນັກສຶກສາ ທ່ານ Lester Shum ແລະທ່ານ Joshua Wong.
ພວກປະທ້ວງປະທະ ກັບຕຳຫຼວດ ຢູ່ຮົງກົງ
ການປະທ້ວງໄດ້ມີມາຢ່າງບໍ່ລົດລະ ຕັ້ງແຕ່ທ້າຍເດືອນກັນຍາແລ້ວນີ້ ແຕ່ກໍໄດ້ລົດນ້ອຍລົງ. ການຢັ່ງຫາງສຽງປະຊາຊົນຫຼາຍຄັ້ງໃນຫວ່າງ ໄວໆມານີ້ ສະແດງໃຫ້ເຫັນວ່າ ການປະທ້ວງກຳລັງເລີ້ມສູນເສຍຄວາມສະໜັບສະໜຸນຈາກປະຊາຊົນ.
ພວກປະທ້ວງ ໄດ້ທຳການຮຽກຮ້ອງ ໃຫ້ຈັດການເລືອກຕັ້ງແບບປະຊາ ທິປະໄຕຢ່າງເຕັມ
ສ່ວນຂຶ້ນໃນປີ 2017. ພວກເຂົາເຈົ້າໄດ້ພາກັນລົງສູ່ ຖະໜົນຫົນທາງເດີນຂະບວນ ຫຼັງ
ຈາກ ຈີນໄດ້ຕັດສິນໃນເດືອນສິງຫາວ່າ ພວກຜູ້ສະໝັກຮັບເລືອກຕັ້ງ ເປັນຫົວໜ້າບໍລິຫານ
ຮົງກົງທຸກໆຄົນ ຈະຕ້ອງໄດ້ຮັບການເຫັນດີເຫັນພ້ອມນຳເສຍກ່ອນ ຈາກຄະນະກຳມະການ
ທີ່ເຕັມໄປດ້ວຍພວກຫົວຈົງຮັກພັກດີ ຕໍ່ປັກກິ່ງນັ້ນ.
