ຜູ້ນຳຂັ້ນສູ້ງຂອງຮົງກົງ ກ່າວວ່າ ທ່ານກຳລັງຫາຊ່ອງທາງເພື່ອ
ກັບຄືນໄປເຈລະຈາກັນ ກັບບັນດາຜູ້ນຳຝ່າຍປະທ້ວງ ເພື່ອ
ປະຊາທິປະໄຕ ຊຶ່ງປັດຈຸບັນນີ້ ໄດ້ກ້າວເຂົ້າສູ່ອາທິດທີ 3 ແລ້ວ.
ຢູ່ໃນກອງປະຊຸມຖະແຫລງຂ່າວ ໃນວັນພະຫັດມື້ນີ້ ຫົວໜ້າ
ບໍລິຫານຮົງກົງ ທ່ານ Leung Chun-ying ກ່າວວ່າ ມີຄົນກາງ
ກຳລັງຊ່ອຍຈັດແຈງ ໃຫ້ມີການເຈລະຈາກັນຄືນ ຊຶ່ງອາດສາມາດ
ມີຂຶ້ນໄດ້ ໃນອາທິດໜ້ານີ້ ຢ່າງໄວໆທີ່ສຸດ.
ທ່ານ Leung ກ່າວວ່າ ທ່ານເປີດກວ້າງຕໍ່ການເຈລະຈາ ເລື້ອງ
ສິດທິ ໃນການປ່ອນບັດເລືອກຕັ້ງສຳລັບໝົດທຸກຄົນ ແຕ່ຈະບໍ່
ພິຈາລະນາ ເລື້ອງການຕ່າວປີ້ນການຕັດສິນໃຈຂອງປັກກິ່ງ ທີ່ຈະເປັນຜູ້ຄັດເລືອກເອົາ
ຜູ້ສະມັກແຂ່ງຂັນ ໃນການເລືອກຕັ້ງ ຄັ້ງປີ 2017.
ທ່ານ Leung ເວົ້າວ່າ “ອຳນາດສູນກາງໄດ້ກ່າວອອກມາຢ່າງຈະແຈ້ງ ແລ້ວວ່າ ຈະບໍ່
ລົບລ້າງການຕັດສິນໃຈຂອງຄະນະກຳມະການຖາວອນ ເມື່ອວັນທີ 31 ສິງຫານັ້ນ.
ນັ້ນແມ່ນສິ່ງທີ່ເຂົາເຈົ້າໄດ້ເວົ້າໄປແລ້ວ. ແລະພວກເຮົາກໍຢາກຈະສຳຫລວດເບິ່ງ
ກັບພວກເຂົາເຈົ້າ ວ່າ ມີສິ່ງອື່ນໃດອີກແດ່ ທີ່ພວກເຮົາສາມາດເຮັດໄດ້ຮ່ວມກັນ
ເພື່ອວ່າບັນດາຜູ້ມີສິດເລືອກຕັ້ງ ຈຳນວນ 5 ລ້ານຄົນຢູ່ໃນຮົງກົງນີ້ ຈະມີໂອກາດ
ຄັ້ງທຳອິດ ໃນປະຫວັດສາດຂອງຮົງກົງ ປ່ອນບັດເອົາຫົວໜ້າບໍລິຫານ ໃນປີ
2017 ນັ້ນ.”
ພາບວີດີໂອ ຈາກສະຖານີໂທລະພາບ TVB ຂອງທ້ອງຖິ່ນ ໄດ້ສະແດງໃຫ້ເຫັນ ຕຳຫຼວດນອກເຄື່ອງແບບ 6 ຄົນແກ່ລາກພະນັກງານສັງຄົມສົງເຄາະ ຄົນນຶ່ງ ໄປຍັງທາງເຂົ້າທີ່ມືດໆຂອງຕຶກແຫ່ງນຶ່ງ ບ່ອນທີ່ພວກຕຳຫຼວດທັງເຕະທັງຖີບ ແລະໃຊ້ກຳປັ້ນທຸບຕີພະນັກງານຄົນນັ້ນ ຊ້ຳແລ້ວຊ້ຳອີກ ເປັນເວລາ 4 ນາທີ.
ກ່ອນໜ້ານີ້ ເມື່ອຕົ້ນເດືອນ ລັດຖະບານຮົງກົງໄດ້ຕົກລົງ ທີ່ຈະທຳການເຈລະຈາ ແຕ່ໄດ້
ຍົກເລີກ ຫຼັງຈາກບັນດາຜູ້ນຳນັກສຶກສາໄດ້ປະຕິຍານວ່າ ຈະຂະຫຍາຍການປະທ້ວງອອກໄປ ຊຶ່ງລັດຖະບານເຫັນວ່າ ຜິດກົດໝາຍນັ້ນ.
ໃນວັນຫັດມື້ນີ້ ກ່ອນການຖະແຫຼງຂ່າວນັ້ນ ເຈົ້າໜ້າທີ່ຕຳຫລວດຮົງກົງ ໄດ້ໃຊ້ສະເປໝາກ
ເພັດຂັບໄລ່ ພວກປະທ້ວງ ທີ່ພະຍາຍາມກີດຂວາງຖະໜົນສາຍນຶ່ງ ໃກ້ໆກັບສຳນັກງານໃຫຍ່ ຂອງລັດຖະບານ.
ເຈົ້າໜ້າທີ່ກ່າວວ່າ ຕຳຫລວດ 3 ຄົນ ໄດ້ຮັບບາດເຈັບ ໃນການປະທະກັນລະຍະເວລາສັ້ນໆນັ້ນ ຊຶ່ງໄດ້ມີຂຶ້ນທ່າມກາງຄວາມໂກດແຄ້ນກ່ຽວ ກັບພາບວີດີໂອ ທີ່ສະແດງໃຫ້ເຫັນຕຳຫລວດ ທຸບຕີຜູ້ປະທ້ວງຄົນນຶ່ງ ທີ່ບໍ່ມີອາວຸດ ໃນມື້ວານນີ້.
