ບັນດາກຸ່ມປົກປ້ອງສິດທິມະນຸດ ພາກັນສະແດງຄວາມໂກດ
ແຄ້ນອອກມາ ຫຼັງຈາກມີພາບປາກົດອອກມາ ທີ່ສະແດງໃຫ້
ເຫັນພວກຕຳຫຼວດຮົງກົງຫຼາຍຄົນພາກັນທຸບຕີຜູ້ປະທ້ວງຄົນ
ນຶ່ງທີ່ບໍ່ມີອາວຸດ ແລະຖືກໃສ່ກັບມືນັ້ນ.
ເຫດການດັ່ງກ່າວ ເກີດຂຶ້ນໃນວັນພຸດມື້ນີ້ ໃນລະຫວ່າງທີ່ຕຳ
ຫຼວດ ພະຍາຍາມຂັບໄລ່ພວກປະທ້ວງອອກໄປຈາກຖະໜົນ
ສາຍນຶ່ງ ທີ່ຢູ່ໃກ້ໆກັບສຳນັກງານໃຫຍ່ຂອງລັດຖະບານ.
ພາບວີດີໂອຂອງສະຖານີໂທລະພາບທ້ອງຖິ່ນ TVB ສະແດງ
ໃຫ້ເຫັນ ຕຳຫຼວດນອກເຄື່ອງແບບ 6 ຄົນແກ່ລາກພະນັກງານ
ສັງຄົມສົງເຄາະ ຄົນນຶ່ງ ໄປຍັງທາງເຂົ້າທີ່ມືດໆຂອງຕຶກແຫ່ງນຶ່ງ ບ່ອນທີ່ພວກຕຳຫຼວດທັງ
ເຕະທັງຖີບ ແລະໃຊ້ກຳປັ້ນທຸບຕີພະນັກງານຄົນນັ້ນ ຊ້ຳແລ້ວຊ້ຳອີກ ເປັນເວລາ 4 ນາທີ.
ທ່ານ Lai Tung-kwok ຫົວໜ້າຣັກສາຄວາມປອດໄພຮົງກົງ ກ່າວຕໍ່ບັນດານັກຂ່າວວ່າ ພວກຕຳຫຼວດທີ່ພົວພັນກັບເຫດການນັ້ນ ໄດ້ຖືກ ຍ້າຍໄປຮັບໜ້າທີ່ໃໝ່ແລ້ວ ແລະວ່າ ເວລານີ້ ກຳລັງດຳເນີນການສືບສວນສອບສວນຢູ.
ອົງການນິລະໂທດກຳສາກົນຫຼື Imnesty International ກ່າວວ່າພວກເຈົ້າໜ້າທີ່ເຫຼົ່ານີ້ ຈະຕ້ອງປະເຊີນກັບການດຳເນີນຄະດີ ຍ້ອນອັນທີ່ກຸ່ມດັ່ງກ່າວເອີ້ນວ່າ “ການໂຈມຕີທີ່ຊົ່ວ
ຊ້າ ຕໍ່ຄົນຜູ້ນຶ່ງທີ່ຖືກຈັບກຸມ ທີ່ບໍ່ເປັນໄພຂົ່ມຂູ່ໃດໆຕໍ່ຕຳຫຼວດ.”
ຊາວຮົງກົງໂກດແຄ້ນທີ່ ຕຳຫລວດທຸບຕີຜູ້ປະທ້ວງ
ຢູ່ໃນຖະແຫຼງການສະບັບນຶ່ງ ກຸ່ມປົກປ້ອງສິດທິມະນຸດນີ້ ທີ່ມີຫ້ອງການຕັ້ງຢູ່ໃນລອນດອນ ກ່າວວ່າ ຜູ້ປະທ້ວງທີ່ຖືກທຸບຕີ ແມ່ນນາຍ Ken Tsang Kinj Chiu ພະນັກງານສັງຄົມສົງເຄາະ ທີ່ຍັງຖືກຕຳຫຼວດ ຄວບຄຸມຕົວຢູ່ ແລະຖືກກ່າວຫາວ່າ ທຳການໂຮມຊຸມນຸມກັນທີ່ຜິດກົດ ໝາຍ ແລະຂັດຂວາງການປະຕິບັດງານຂອງພວກເຈົ້າໜ້າທີ່ຕຳຫຼວດ.
ຄະນະກຳມະການປົກປ້ອງສິດທິມະນຸດເອເຊຍ ກໍໄດ້ສະແດງ “ຄວາມຕື່ນຕົກໃຈ ແລະ
ສະລົດໃຈ” ກ່ຽວກັບເຫດການດັ່ງກ່າວ ແລະຮຽກຮ້ອງ ໃຫ້ຈັບກຸມພວກເຈົ້າໜ້າທີ່ເຫຼົ່ານີ້ ແລະ”ນຳໂຕມາດຳເນີນຄະດີໃນສານ ໄວເທົ່າທີ່ເປັນໄປໄດ້.”