ສະມາຊິກສະພາ ສະໜັບສະໜູນປະຊາທິປະໄຕ ທີ່ສຳຄັນຄົນນຶ່ງຂອງຮົງກົງ ໄດ້ຖືກກ່າວຫາໃນວັນພະຫັດມືີ້ນີ້ ຍ້ອນບໍ່ໄດ້ປະກາດ ການຮັບເງິນ ຈາກເສດຖີສື່ມວນຊົນທີ່ມີຊື່ສຽງທີ່ຕໍ່ຕ້ານຈີນ.
ທ່ານ Leung Kwok-hung ທີ່ຮູ້ກັນໃນອີກຊື່ນຶ່ງວ່າ “Long Hair” ໄດ້ຖືກກ່າວຫາຮັບເງິນ 32,000 ໂດລາຈາກ ທ່ານ Jimmy Lai ຜູ້ສ້າງຕັ້ງໜັງສືພິມ Apple Daily. ໜັງສືພິມດັ່ງກ່າວ ແມ່ນເປັນທີ່ຮູ້ກັນດີໃນຖານະທີ່ໂຈມຕີປັກກິ່ງ.
ຄະນະກຳມະການຕໍ່ຕ້ານການສໍ້ລາດບັງຫຼວງທີ່ເປັນອິດສະຫຼະຂອງຮົງກົງ ຫຼື ICAC ໄດ້ຟ້ອງຮ້ອງທ່ານ Leung ໄວ 60 ປີ ໃນຂໍ້ຫາ 1 ກະໂທງໃນຖານະທີ່ປະພຶດປະຕິບັດທີ່ບໍ່ສົມຄວນໃນໜ້າທີ່ເຮັດວຽກໃຫ້ລັດຖະບານຊຶ່ງທ່ານ Leung ເຫັນວ່າ ມີຈຸດປະສົງທາງການເມືອງ.
ການມີຊື່ສຽງໃນການໄວ້ຜົມຍາວຂອງທ່ານ ແລະສວມເສື້ອ Che Guevera ທ່ານ Leung ໄດ້ຮັບໜ້າທີ່ຢູຸ່ໃນສະພານິຕິບັນຢັດຂອງຮົງກົງ ມາຕັ້ງແຕ່ປີ 2004. ການລົງຄະແນນສຽງເລືອກຕັ້ງຈະມີຂຶ້ນໃນເດືອນ ກັນຍາທີ່ຈະເຖິງນີ້.
ຕອນທີ່ທ່ານຖືກຖາມກ່ຽວກັບວ່າ ຖ້າຫາກທ່ານປະຕິເສດຕໍ່ຂໍ້ກ່າວຫານີ້ ທ່ານ Leung ກັບໄດ້ກ່າວວ່າ “ຂ້າພະເຈົ້າຈະໃຫ້ປາກຄຳຕໍ່ສານຢ່າງເປັນທາງການບາດດຽວ.” ທ່ານໄດ້ຖືກປ່ອຍໃນການປະກັນຕົວ ແລະໄດ້ມີໝາຍກຳໜົດທີ່ຈະຂຶ້ນສານໃນວັນສຸກມື້ອື່ນນີ້.
ຄວາມຢ້ານກົວທີ່ວ່າຈີນ ຈະກຳຈັດຮັດເຄັ່ງຮົງກົງ ຂຶ້ນນັ້ນ ແມ່ນວ່າ ໃນຫວ່າງມໍ່ໆມານີ້ ກໍຍິ່ງເຄັ່ງຄັດຮ້າຍແຮງຂຶ້ນໂດຍການທີ່ຮ້ານຂາຍປື້ມຊາວຮົງກົງ ໄດ້ຖືກຈັບກຸມໃນຈີນ ເປັນເວລາ 8 ເດືອນນັ້ນ. ຮ້ານຂາຍປື້ມ Lam Wing-kee ເປັນທີ່ຮູ້ຈັກກັນເປັນຢ່າງດີໃນການຂາຍເລື້ອງລາວ ການນິນທາຕ່າງໆນາໆກ່ຽວກັບບັນດານັກການເມືອງຂອງປັກກິ່ງ ນັ້ນ.
ຮົງກົງ ແມ່ນເຄິ່ງປົກຄອງຕົນເອງ ນັບຕັ້ງແຕ່ໄດ້ກັບຄືນໄປສູ່ຈີນ ຈາກອັງກິດປີ 1997 ໂດຍທີ່ການມີສິດເສລິພາບນັ້ນ ແມ່ນບໍ່ເຄີຍເຫັນມາກ່ອນ ໃນຈີນແຜ່ນດິນໃຫຍ່ ແຕ່ວ່າໄດ້ມີຄວາມຢ້ານກົວທີ່ວ່າ ມັນຈະຖືກບັ່ນທອນອອກໄປເລີຍ.
