ສະຫະລັດ ກ່າວໃນວັນພຸດວານນີ້ວ່າ ການຕັດສິນຂອງສານຮົງກົງເພື່ອຫ້າມການຮ້ອງເພງປະທ້ວງທີ່ນິຍົມກັນ ທີ່ຊື່ວ່າ “ຮົງກົງ ຈົ່ງຈະເລີນ ຫຼື Glory to Hong Kong” ນັ້ນ ເປັນຜົນເສຍຫຼ້າສຸດ ຕໍ່ຊື່ສຽງຂອງເມືອງທີ່ເປັນສາກົນແຫ່ງນີ້.
ໂຄສົກກະຊວງການຕ່າງປະເທດ ທ່ານ ແມັດທິວ ມີລເລີ ກ່າວຕໍ່ບັນດານັກຂ່າວ ໃນລະຫວ່າງຖະແຫຼງຂ່າວຂອງວັນພຸດວານນີ້ວ່າ “ພວກເຮົາຍັງຄົງມີຄວາມກັງວົນຢ່າງແທ້ຈິງ ກ່ຽວກັບການສືບຕໍ່ຫລຸດນ້ອຍຖອຍລົງໃນການປົກປ້ອງດ້ານສິດທິມະນຸດ ແລະພື້ນຖານທາງດ້ານເສລີພາບຢູ່ໃນຮົງກົງ, ລວມທັງເສລີພາບໃນການປາກເວົ້າ.”
ທ່ານ ມີລເລີ ກ່າວຕື່ມວ່າ “ການຕັດສິນໃຈຫ້າມບົດເພງດັ່ງກ່າວນີ້ ແມ່ນການທໍາລາຍຫຼ້າສຸດຕໍ່ຊື່ສຽງຂອງເມືອງສາກົນ ທີ່ເຄີຍມີຄວາມພາກພູມໃຈໃນການມີ ຕຸລາການທີ່ເປັນເອກະລາດ ເຊິ່ງປົກປ້ອງການແລກປ່ຽນຂໍ້ມູນຂ່າວສານ, ແນວຄວາມຄິດ ແລະການຄ້າ ຢ່າງເສລີ.”
ວັນທີ 8 ພຶດສະພາວານນີ້, ສານອຸທອນຂອງສານສູງຮົງກົງ ໄດ້ຮັບຄຳຮ້ອງຈາກເຈົ້າໜ້າທີ່ ເພື່ອຫ້າມບົດເພງສັນລະເສີນໃນການປະທ້ວງທີ່ມີຊື່ວ່າ “ຮົງກົງ ຈົ່ງຈະເລີນ,” ອັນໄດ້ຕ່າວປີ້ນຄຳຕັດສິນຂອງສານຂັ້ນລຸ່ມທີ່ໄດ້ປະຕິເສດຄຳສັ່ງຫ້າມດັ່ງກ່າວ ເນື່ອງຈາກມີທ່າແຮງທີ່ເປັນ “ຜົນກະທົບຮຸນແຮງ” ຕໍ່ການປາກເວົ້າຢ່າງເສລີ.
ໃນນະຄອນຫຼວງປັກກິ່ງ, ເຈົ້າໜ້າທີ່ ຈີນ ໄດ້ສະແດງເຫດຜົນອັນຊອບທຳ ຕໍ່ການຕັດສິນຂອງສານອຸທອນຮົງກົງ.
ທ່ານຫຼິນ ຈຽນ, ໂຄສົກກະຊວງການຕ່າງປະເທດຈີນກ່າວ ໃນວັນພຸດວານນີ້ວ່າ “ອີງຕາມລັດຖະທໍາມະນູນຂອງປະເທດ ເພື່ອປົກປ້ອງຄວາມໝັ້ນຄົງແຫ່ງຊາດ ແລະກຽດສັກສີຂອງເພງຊາດ, ມັນເປັນເລື້ອງທີ່ຖືກຕ້ອງຕາມກົດຫມາຍ ແລະມີຄວາມຈໍາເປັນສໍາລັບເຂດປົກຄອງພິເສດຮົງກົງ ທີ່ຈະຍຸຕິບຸກຄົນອື່ນໆ ຈາກການນໍາໃຊ້ ແລະເຜີຍແຜ່ບົດເພງທີ່ກ່ຽວຂ້ອງ ເພື່ອປຸກລະດົມຄວາມແບ່ງແຍກ ແລະດູຖູກເພງຊາດ.”
ຟໍຣັມສະແດງຄວາມຄິດເຫັນ