ສານສູງສຸດຂອງຮົງກົງ, ໃນວັນຈັນມື້ນີ້ ໄດ້ຕັດສິນຍົກເລີກການຮຽກຮ້ອງ ເພື່ອຕ່າວປີ້ນຄໍາຕັດສິນຢ່າງເປັນເອກະສັນ ຂອງມະຫາເສດຖີສື່ມວນຊົນ ທ່ານ ຈິມມີ ລາຍ ພ້ອມທັງບັນດາຜູ້ໂຄສະນາເພື່ອປະຊາທິປະໄຕອີກ 6 ຄົນ, ໃນການໂຮມຊຸມນຸມທີ່ບໍ່ໄດ້ຮັບອະນຸຍາດເມື່ອປີ 2019, ອີງຕາມລາຍງານ ຂອງອົງການຂ່າວ Reuters.
ທ່ານ ລາຍ, ອາຍຸ 76 ປີ, ຜູ້ກໍ່ຕັ້ງຂອງໜັງສືພິມສົ່ງເສີມປະຊາທິປະໄຕ Apple Daily, ແລະອີກ 6 ຄົນ ລວມທັງນັກຮົບເກົ່າເພື່ອປະຊາທິປະໄຕ ທ່ານ ມາຣ໌ຕິນ ລີ (Martin Lee), ພົບວ່າມີຄວາມຜິດໃນການຈັດຕັ້ງ ແລະເຂົ້າຮ່ວມ ການໂຮມຊຸມນຸມທີ່ບໍ່ໄດ້ຮັບອະນຸຍາດໃນເດືອນ ສິງຫາ ປີ 2019 ໃນລະຫວ່າງ ການປະທ້ວງເພື່ອປະຊາທິປະໄຕຢູ່ເມືອງທີ່ປົກຄອງໂດຍ ຈີນ ເປັນເວລາຍາວ ຫຼາຍເດືອນຕິດຕໍ່ກັນ.
ສານຂັ້ນຕົ້ນໄດ້ລຶບລ້າງຄໍາຕັດຂອງພວກເຂົາເຈົ້າໃນການຈັດຕັ້ງການໂຮມຊຸມນຸມທີ່ບໍ່ໄດ້ຮັບອະນຸຍາດ, ແຕ່ມີການຕັດສິນໂທດເຂົາເຈົ້າກ່ຽວກັບການເຂົ້າຮ່ວມເປັນ ສ່ວນນຶ່ງຂອງຂະບວນການທີ່ບໍ່ໄດ້ຮັບອະນຸຍາດ.
ການຂໍອຸທອນຂອງພວກເຂົາໄດ້ເນັ້ນໄປໃສ່ການທີ່ວ່າ ການຕັດສິນນັ້ນມີຄວາມສົມດຸນກັບການຄຸ້ມຄອງສິດທິມະນຸດຂັ້ນພື້ນຖານຫຼືບໍ່, ເຊິ່ງເປັນ ຫຼັກການທີ່ໄດ້ ກໍານົດໄວ້ໃນການຕັດສິນສອງຄັ້ງທີ່ບໍ່ມີການຜູກມັດຂອງສານສູງສຸດອັງກິດ ເຊິ່ງຮູ້ໃນອີກຊື່ນຶ່ງວ່າ “ການດໍາເນີນງານຕາມອັດຕາສ່ວນ.”
ທ່ານ ເດວິດ ນູເບີເກີ (David Neuberger), ອະດີດຫົວໜ້າສານສູງສຸດ ຂອງອັງກິດ, ທີ່ເປັນນຶ່ງໃນຜູ້ພິພາກສາ 5 ຄົນຂອງສານອຸທອນຂັ້ນສຸດທ້າຍ ຫຼື CFA ທີ່ຮັບຟັງການພິຈາລະນາຄະດີນີ້, ໂດຍເພີ້ມການໂຕ້ວາທີກ່ຽວກັບວ່າ ຜູ້ພິພາກສາຕ່າງປະເທດຄວນສືບຕໍ່ນັ່ງຢູ່ໃນສານສູງສຸດຂອງເມືອງທ່າມກາງການປາບປາມດ້ານຄວາມໝັ້ນຄົງແຫ່ງຊາດ ຫຼື ບໍ່.
ການຕັດສິນດັ່ງກ່າວມີຂຶ້ນສອງເດືອນ ລຸນຫຼັງການລາອອກຈາກຕຳແໜ່ງຂອງຜູ້ພິພາກສາອັງກິດສອງຄົນຈາກສານ CFA ຂອງຮົງກົງ ທ່ານ ລໍເຣັນສ໌ ຄໍລີນ (Lawrence Collins) ແລະ ທ່ານ ໂຈນາທານ ຊໍາຊັນ (Jonathan Sumption). ທ່ານ ຊໍາຊັນ ກ່າວວ່າ ຮົງກົງ ກໍາລັງກາຍມາເປັນລັດຜະເດັດການສົມບູນ ແລະ ກົດໝາຍຂອງເມືອງ ກໍໄດ້ຖືກ “ຫຼຸດຜ່ອນລົງຢ່າງຫຼວງ ຫຼາຍ.”
