ສານຮົງກົງ ໃນວັນພະຫັດມື້ນີ້ ໄດ້ຕັດສິນລົງໂທດນັກເຄື່ອນໄຫວສະໜັບສະໜູນປະຊາທິປະໄຕ 14 ຄົນ ໃນຄະດີຄວາມໝັ້ນຄົງແຫ່ງຊາດ ທີ່ໃຫຍ່ທີ່ສຸດຂອງເມືອງດັ່ງກ່າວ ພາຍໃຕ້ກົດໝາຍທີ່ຖືກກຳນົດໂດຍ ປັກກິ່ງ ທີ່ໄດ້ກວາດລ້າງການຄັດຄ້ານຂອງສາທາລະນະ ໃຫ້ອອກໄປທັງໝົດ ອີງຕາມລາຍງານຂອງອົງການຂ່າວເອພີ.
ຜູ້ທີ່ຖືກພົບວ່າມີຄວາມຜິດ ລວມມີອະດີດສະມາຊິກສະພາ ທ່ານ ລຶງ ຄວັອກ-ຮັງ, ທ່ານ ແລມ ຈຶກ-ຕິງ, ທ່ານນາງ ເຮເລນາ ວອງ ແລະ ທ່ານ ເຣມອນ ແຊນ, ແລະ ເຂົາເຈົ້າອາດປະເຊີນກັບການຂັງຄຸກຕະຫຼອດຊີວິດ ເມື່ອການຕັດລົງໂທດຕາມທີຫຼັງ. ຈຳເລີຍສອງຄົນທີ່ຖືກຕັດສິນໃຫ້ພົ້ນໂທດ ມີອະດີດທີ່ປຶກສາເມືອງ ທ່ານ ລີ ຢູ-ຊັນ ແລະ ທ່ານນາງ ລໍເຣັນສ ລາວ.
ເຂົາເຈົ້າແມ່ນລວມຢູ່ໃນບັນດານັກເຄື່ອນໄຫວສະໜັບສະໜູນປະຊາທິປະໄຕ 47 ຄົນ ຜູ້ທີ່ຖືກຟ້ອງຮ້ອງໃນປີ 2021 ສຳລັບການມີສ່ວນຮ່ວມຂອງເຂົາເຈົ້າໃນການເລືອກຕັ້ງຂັ້ນຕົ້ນ ທີ່ບໍ່ເປັນທາງການ. ບັນດາໄອຍະການໄດ້ກ່າວຫາເຂົາເຈົ້າ ກ່ຽວກັບການພະຍາຍາມທີ່ຈະຂັດຂວາງລັດຖະບານຂອງ ຮົງກົງ ແລະ ໂຄ່ນລົ້ມຜູ້ນຳຂອງເມືອງ ດ້ວຍການໄດ້ຮັບຄະແນນສຽງສ່ວນຫຼາຍໃນສະພານິຕິບັນຍັດ ທີ່ມີຄວາມຈຳເປັນເພື່ອຫ້າມການອອກງົບປະມານຕາມອຳເພີໃຈ.
ໃນບົດສະຫຼຸບຂອງຄຳຕັດສິນທີ່ແຈກຢາຍໃຫ້ສື່ມວນຊົນນັ້ນ, ສານໄດ້ກ່າວວ່າ ບັນດາຜູ້ເຂົ້າຮ່ວມໃນການເລືອກຕັ້ງໄດ້ປະກາດວ່າ ເຂົາເຈົ້າຈະ “ໃຊ້ອຳນາດຢ່າງແຂງຂັນ ຫຼື ໃຊ້ອຳນາດທີ່ຖືກມອບໃຫ້ຈາກສະພານິຕິບັນຍັດ ໂດຍກົດໝາຍພື້ນຖານເພື່ອຍັບຢັ້ງການອອກງົບປະມານ.”
ພາຍໃຕ້ກົດໝາຍພື້ນຖານ, ຜູ້ບໍລິຫານໃຫຍ່ຂອງເມືອງຈະຖືກບັງຄັບໃຫ້ຍຸບສະພານິຕິບັນຍັດ ແລະ ລົງຈາກຕຳແໜ່ງໃນທີ່ສຸດ ຖ້າຮ່າງກົດໝາຍທີ່ສຳຄັນເຊັ່ນງົບປະມານຖືກຍັບຢັ້ງ.
ຟໍຣັມສະແດງຄວາມຄິດເຫັນ