ຫົວໜ້າບໍລິຫານຮົງກົງຄົນໃໝ່ໄດ້ສາບານຕົວເຂົ້າຮັບຕໍາແໜ່ງເພື່ອນໍາພາພົນລະເມືອງ 7
ລ້ານຄົນຂອງດິນແດນແຫ່ງນັ້ນ.
ມີການປ້ອງກັນຄວາມປອດໄພຢ່າງແໜ້ນໜາ ໃນຂະນະທີ່ປະທານປະເທດຈີນ ທ່ານຫູ
ຈິນເຖົາປະກອບພິທີສາບານຕົວໃຫ້ທ່ານ ເຫລີ້ງ ຈຸນ-ຢິງ (Leung Chun-ying), ເຂົ້າຮັບ
ຕໍາແໜ່ງ ໃນວັນຄົບຮອບ 15 ປີ ພໍດີ ທີ່ຮົງກົງໄດ້ຖືກໂອນຈາກການປົກຄອງຂອງອັງກິດໄປສູ່ການປົກຄອງຂອງຈີນ.
ທ່ານ ເຫລີ້ງ ຊຶ່ງເປັນທີ່ປຶກສາດ້ານການຊື້ຂາຍທີ່ດິນ ທີ່ຮັ່ງມີ ແລະໄດ້ເຂົ້າຮັບຕໍາແໜ່ງ
ຕໍ່ຈາກທ່ານ Donald Tsang ນັ້ນ ແມ່ນໄດ້ດຶງດູດໃຫ້ມີການປະທ້ວງມາແລ້ວຫລາຍຄັ້ງ
ຈາກພວກທີ່ເຫັນວ່າ ທ່ານມີຄວາມສໍາພັນໃກ້ຊິດເກີນໄປກັບລັດຖະບານກຸງປັກກິ່ງ.
ຄາດກັນວ່າ ຈະມີພົນລະເມືອງຮົງກົງຈໍານວນຫລາຍສິບພັນຄົນ ພາກັນລົງສູ່ຖະໜົນ
ຫົນທາງເດີນຂະບວນ ໃນຕອນສວາຍຂອງມື້ນີ້, ວັນທີ 1 ກໍລະກົດ ຊຶ່ງເປັນວັນໂຮມ
ຊຸມນຸມປະຈໍາປີຂອງຮົງກົງ ເພື່ອຮຽກຮ້ອງເອົາເອກະລາດເພີ້ມຂຶ້ນຈາກກຸງປັກກິ່ງ ແລະ ປະທ້ວງຕໍ່ສະພາບການຄວາມແຕກໂຕນກັນ ລະຫວ່າງຄົນຮັ່ງແລະຄົນທຸກ ທີ່ນັບມື້
ນັບກວ້າງອອກນັ້ນ.
ຊາຍປະທ້ວງຜູ້ນຶ່ງໄດ້ຢືນຂຶ້ນ ແລະຮ້ອງຕັດບົດທ່ານຫູ ໃນຂະນະທີ່ທ່ານກ່າວຄໍາປາໄສ
ໃນພິທີສາບານຕົວ ຊຶ່ງຜູ້ກ່ຽວໄດ້ຮຽກຮ້ອງໃຫ້ເຊົາໃຊ້ການປົກຄອງໂດຍພັກດຽວ ແລະ ລະບອບຜະເດັດການຢູ່ໃນຈີນ ກ່ອນໜ້າທີ່ຈະຖືກພະນັກງານຮັກສາຄວາມປອດໄພ
ເອົາຕົວອອກໄປຈາກທີ່ນັ້ນ.
ໃນວັນເສົາວານນີ້ ຕໍາຫລວດໄດ້ປະທະກັນກັບພວກປະທ້ວງ ທີ່ພາກັນອອກມາໂຮມ
ຊຸມນຸມ ຮຽກຮ້ອງເອົາຄໍາອະທິບາຍກ່ຽວກັບການເສຍຊີວິດທີ່ໜ້າສົງໃສໃນເດືອນແລ້ວນີ້ ຂອງຜູ້ຕໍ່ຕ້ານລັດຖະບານ Li Wangyang. ທ່ານລີ ແມ່ນນັກເຄື່ອນໄຫວ ດ້ານສິດທິ
ແຮງງານ ແລະເປັນຜູ້ນຶ່ງໃນບັນາຜູ້ນໍາພາການປະທ້ວງ ຢູ່ຈະຕຸລັດຕຽນອັນເໝິນ ໃນປີ
1989 ນັ້ນ.
ທ່ານຫູ ເດີນທາງໄປເຖິງຮົງກົງໃນວັນສຸກຜ່ານມາ ເພື່ອຢ້ຽມຢາມຮົງກົງເປັນເວລາ 3 ມື້.
ເບິ່ງວີດີໂອສໍາພາດຄວາມເຫັນຂອງຜູ້ປະທ້ວງຄົນນຶ່ງ:
