ກໍາມະການຄະນະນຶ່ງຂອງສະພາຕໍ່າສະຫະລັດ ໄດ້ລົງຄະແນນສຽງວ່າ ທ່ານ Eric Holder ລັດຖະມົນຕີກະຊວງຍຸຕິທໍາສະຫະລັດ ໝິ່ນປະໝາດລັດຖະສະພາສະຫະລັດ ໂດຍບໍ່ຍອມມອບເອກະສານຕ່າງໆກ່ຽວກັບ
ກໍລະນີແຜນລັບເລຶ່ອງການສົ່ງປືນທີ່ລົ້ມແຫຼວນັ້ນ.
ຄະນະກໍາມະການດັ່ງກ່າວໄດ້ລົງຄະແນນສຽງໄປຕາມເສັ້ນສາຍຂອງພັກ ເມື່ອວັນພຸດວານນີ້ ຄືພັກຣີພັບບລິກັນມີ 23 ສຽງ ທີ່ລົງຄະແນນວ່າໝິ່ນ ປະໝາດ ແລະພັກເດໂມແຄຣັດມີ 17 ສຽງທີ່ຄັດຄ້ານ. ສະພາຊິກສະພາຕໍ່າຄົບຄະນະຈະນໍາເອົາເລຶ່ອງດັ່ງກ່າວມາພິຈາລະນາໃນອາທິດໜ້ານີ້. ແຕ່ບໍ່ຊົງວ່າທ່ານ Holder ຈະປະເຊີນກັບຂໍ້ຫາດ້ານອາຍາໃດໆ.
ຄະນະກໍາມະການໄດ້ລົງຄະແນນສຽງທັງໆທີ່ຫຼັງຈາກປະທານາທິບໍດີໂອ ບາມາໄດ້ນຳໃຊ້ສິດພິເສດຄະນະບໍລິຫານ ຊຶ່ງເປັນການເຄຶ່ອນໄຫວຂອງປະທານາທິບໍດີທີ່ບໍ່ຄ່ອຍມີ ເພື່ອພະຍາຍາມປົກປິດລາຍລະອຽດທີ່ສໍາຄັນບາງຢ່າງກ່່ຽວກັບການປະຕິບັດງການຂອງລັດຖະບານ ບໍ່ໃຫ້ເປັນທີ່ເປີດ ເຜີຍນັ້ນ.
ບັນດາສະມາຊິກພັກເດໂມແຄຣັທ ທີ່ຄັດຄ້ານຕໍ່ການລົງຄະແນນສຽງກ່ຽວ ກັບການໝິ່ນປະໝາດລັດຖະສະພາສະຫະລັດນັ້ນ ເອີ້ນການເຄື່ອນໄຫວນີ້ ວ່າເປັນການເຄຶ່ອນໄຫວທາງການເມືອງ ທີ່ແນໃສ່ເພື່ອພະຍາຍາມສ້າງຄວາມອັບອາຍຂາຍໜ້າໃຫ້ແກ່ປະທານາທິບໍດີຫຼາຍກວ່າ. ພັກຣີພັບບລິກັນກ່າວວ່າ ພວກເຂົາເຈົ້າເຊຶ່ອວ່າທໍານຽບຂາວປົກປິດຂໍ້ມູນສໍາຄັນຕ່າງໆໄວ້.
ການລົງຄະແນນສຽງກ່ຽວກັບຂໍ້ຫາໝິ່ນປະໝາດ ແມ່ນໄດ້ສະແດງຄວາມວິຕົກກັງວົນກັບໂຄງການນຶ່ງທີ່ລົ້ມແຫຼວທີ່ມີຊື່ວ່າ ໄວແລະຮຸນແຮງ ທີ່ບັນດາ ສາຍລັບລັດຖະບານກາງອະນຸຍາດໃຫ້ມີການລັກລອບສົ່ງປືນເຂົ້າໄປໃນປະເທດແມັກຊິໂກ ທີ່ຫວັງວ່າ ຈະນຳພາພວກເຂົາເຈົ້າໄປສູ່ພວກລັກລອບຂົນສົ່ງອາວຸດນັ້ນ.
ແຕ່ສາຍລັບລັດຖະບານກາງ ສູນເສຍຂໍ້ມູນວ່າອາວຸດປືນດັ່ງກ່າວນັ້ນໄປ ຕົກຢູ່ໃສແທ້ ແລະຄວາມລັບໄດ້ຖືກເປີດເຜີຍຂຶ້ນ ເວລາປືນສອງກະບອກໃນຈໍານວນນັ້ນຖືກໃຊ້ຍິງສັງຫານເຈົ້າໜ້າທີ່ຮັກສາຊາຍແດນສະຫະລັດຄົນນຶ່ງ.