ໂຮງຮຽນແຊນຕ້າຄລອສ ເປີດຫລັກສູດການຮຽນການສອນ ແລະຝຶກອົບຮົມບັນດາແຊນຕ້າໃຫ້ພ້ອມປະຕິບັດໜ້າທີ່ສົ່ງມອບຄວາມສຸກໃຫ້ຜູ້ຄົນໃນອັງກິດ ກ່ອນວັນຄຣິສມັສ ຈະມາເຖິງໃນປາຍປີນີ້ ອີງຕາມລາຍງານຂອງອົງການຂ່າວຣອຍເຕີສ.
ແຊນຕ້າຄລອສ 6 ຄົນ ໄດ້ເລີ້ມຕົ້ນການຝຶກອົບຮົມໃນການເປັນແຊນຕ້າຄລອສຜູ້ອົບອຸ່ນ ຢູ່ໃນໂຮງຮຽນສອນແຊນຕ້າ ທີ່ຫາກໍເປີດພາກການສຶກສາໄປເມື່ອວັນພຸດທີ່ຜ່ານມານີ້.
ຫຼັກສູດແຊນຕ້າແບບສົມບູນນັ້ນ ກໍມີທັງຮຽນຮູ້ເທັກນິກການຫົວ “ໂຮ່ ໂຮ່ ໂຮ່” ແບບເປັນສັນຍາລັກ ໄປຈົນເຖິງການຈື່ຈໍາຊື່ກວາງ ເຣນເດຍທັງໝົດ ໂດຍມີຄູຝຶກເຊັ່ນທ່ານ ເຈມສ໌ ໂລແວລລ໌ ຜູ້ອໍານວຍການຂອງບໍລິສັດທຸລະກິດບັນເທີງ FeeJee Mermaid ທີ່ຊ່ອຍຝຶກອົບຮົມຝີມືແລະເຄັດລັບຂອງວິຊາທີ່ຈຳເປັນໃຫ້ກັບບັນດາແຊນຕ້າຄລອສ ມາດົນນານເຖິງ 25 ປີ.
ທ່ານໂລແວລລ໌ ບອກກັບຣອຍເຕີສ ວ່າ “ເປັນເລື້ອງສຳຄັນຢ່າງຍິ່ງ ເມື່ອເດັກນ້ອຍເຂົ້າໄປຫາແຊນຕ້າຄລອສ ທີ່ພວກເຂົາເຊື່ອວ່າ ເປັນແຊນຕ້າໂຕຈິງ” ແຊນຕາຄລອສຈະຕ້ອງມີຈິດໃຈດີ ເບິ່ງມີມົນພິເສດ ແລະສະໜຸກສະໜານລ້າເລີງ.
ຄູຝຶກແຊນຕ້າຜູ້ນີ້ ກ່າວຕື່ມວ່າ ຍອດຈອງໂຕແຊນຕ້າຄລສປີນີ້ ເພີ່ມສູງຂຶ້ນປະມານ 20 ເປີເຊັນ ແລະວ່າ ນຶ່ງໃນຫລາຍເຫດຜົນທີ່ການວ່າຈ້າງແຊນຕ້າຜູ້ໂອບອ້ອມອາລີນີ້ ໜ້າຈະມາຈາກຄວາມຈິງທີ່ວ່າ ຜູ້ຄົນຕ້ອງການຄວາມສະໜຸກສະໜານຫຼາຍຂຶ້ນກວ່າເກົ່າໃນປີນີ້.
ທ່ານໂລແວລລ໌ ກ່າວມ້ວນທ້າຍໄວ້ວ່າ ກົດລະບຽບທີ່ແຊນຕ້າຄວນຕ້ອງເຫັນຢ່າງນຶ່ງກໍຄື ຢ່າຖາມພວກເດັກນ້ອຍວ່າ ພວກເຂົາຕ້ອງການຫຍັງໃນວັນຄຣິສມັສ ເພາະເປັນການບອກພວກເຂົາໄປວ່າ ພວກເຂົາບໍ່ໄດ້ອ່ານຈົດໝາຍທີ່ເດັກນ້ອຍທັງຫຼາຍຂຽນເຖິງແຊນຕ້າຄລອສເລີຍ ນັ້ນເອງ ເຊິ່ງນັ້ນ ເປັນເລື້ອງທີ່ຫຍາບຄາຍທຳຮ້າຍຈິດໃຈເດັກນ້ອຍທີ່ລໍຖ້າຂອງຂວັນຈາກແຊນຕ້າຄລອສ ໃນວັນຄຣິສມັສຢ່າງຍິ່ງ.
ຟໍຣັມສະແດງຄວາມຄິດເຫັນ