ລິ້ງ ສຳຫລັບເຂົ້າຫາ

ອັດ​ຕາ​ການ​ຕິດ​ເຊື້ອ​ HIV-AIDS ໃນລາວ​ ຍັງ​ຕໍ່າຢູ່

  • ຊົງຣິດ ໂພນເງິນ

ຜູ້ເຄາະຮ້າຍຄົນນຶ່ງຈາກການລັກລອບຄ້າມະນຸດ ທີ່ຖືກບັງຄັບໃຫ້ເປັນ ໂສເພນີ

ເຈົ້າ​ໜ້າ​ທີ່ຂັ້ນ​ສູງ​ຂອງ​ລາວ​ຢືນຢັນ​ວ່າ ອັດ​ຕາ​ການ​ຕິດ​ເຊື້ອ​ໂຣກ HIV-AIDS ຂອງ​ຄົນ​ລາວ​ຍັງ​ຕໍ່າ​ເມື່ອ​ທຽບ​​ກັບ ປະ​ເທດ​ອື່ນໆ​ໃນ​ກຸ່ມ​ອາ​ຊຽນດ້ວຍ​ກັນ ຫາກ​ແຕ່​ວ່າການ​ທີ່​ລາວ​ມີ​ທີ່​ຕ້ັງ​ຢູ່​ສູນ​ກາງ​ໃນ​ລຸ່ມ​ແມ່ນ້ຳຂອງ ກໍ​ນັບ​ເປັນ​ປັດໃຈ​ສ່ຽງ​ຢ່າງ​ຍິ່ງ​ທີ່​ຈະ​ເຮັດໃຫ້​ມີ​ຜູ້​ຕິດ​ເຊື້ອ​ລາຍ​ໃໝ່ ​ເພີ່ມ​ຫລາຍ​ຂື້ນ.

ເຈົ້າ​ໜ້າ​ທີ່ຂັ້ນ​ສູງ​ຂອງ​ລາວ​ຢືນຢັນ​ວ່າ ອັດ​ຕາ​ການ​ຕິດ​ເຊື້ອ​ໂຣກ HIV-AIDS ຂອງ​ຄົນ​ລາວ​ຍັງ​ຕໍ່າ​ເມື່ອ​ທຽບກັບ ປະ​ເທດ​ອື່ນໆ​ໃນ​ກຸ່ມ​ອາ​ຊຽນດ້ວຍ​ກັນ ຫາກ​ແຕ່​ວ່າການ​ທີ່​ລາວ​ມີ​ທີ່​ຕ້ັງ​ຢູ່​ສູນ​ກາງ​ໃນ​ລຸ່ມ​ແມ່ນ້ຳຂອງ ກໍ​ນັບ​ເປັນ​ປັດໃຈ​ສ່ຽງ​ຢ່າງ​ຍິ່ງ​ທີ່​ຈະ​ເຮັດໃຫ້​ມີ​ຜູ້​ຕິດ​ເຊື້ອ​ລາຍ​ໃໝ່​ເພີ່ມ​ຫລາຍ​ຂື້ນ.

ທ່ານພອນ​ເທບ ພົນ​ເສນາ ຮອງ​ຫົວໜ້າ​ກໍາມາ​ທິການ​ວັດ​ທະນະ​ທໍາ​ສັງຄົມ​ ປະຈໍາສະພາ​ແຫ່ງ​ຊາດ​ລາວ​ ໄດ້​ຖະ​ແຫລງຢືນຢັນ​ວ່າ ​ອັດ​ຕາ​ການ​ຕິດ​ເຊື້ອ​ໂຣກ HIV-AIDS ຂອງ​ຄົນ​ລາວ​ໃນ​ປັດຈຸບັນ​ນີ້​ ຍັງ​ຄົງ​ຢູ່​ໃນ​ລະດັບ​ຕໍ່າ​ເມື່ອທຽບ​ໃສ່​ກັບປະ​ເທດ​ອື່ນໆ​ໃນ​ກຸ່ມ​ອາ​ຊ່ຽນດ້ວຍ​ກັນ.

ທັງ​ນີ້​ໂດຍຈາກ​ການ​ສຸ່ມ​ກວດ​ເລືອດ​ຂອງ​ປະຊາຊົນ​ລາວ​ທີ່​ສະໝັກ​ໃຈ​ ຈໍານວນ​ທັງ​ໝົດ 227,879 ຄົນ​ໃນ 17 ​ແຂ​ວງທົ່ວ​ປະ​ເທດ​ ນັບ​ຈາກ​ປີ​ 1990 ຈົນ​ເຖິງ​ທ້າຍ​ປີ 2009 ທີ່ ຜ່ານ​ມາ​ ກໍ​ພົບ​ວ່າ​ມີ​ຜູ້​ຕິດ​ເຊື້ອ​ຈໍານວນ 3,659 ຄົນ ​ຫລື​ຄິດເປັນ​ອັດຕາ​ສະ​ເລ່ຍການ​ຕິດ​ເຊື້​ອ ໂຣກດັ່ງກ່າວ​ນີ້​ພຽງ​ແຕ່ 1.6 % ​ເທົ່າ​ນັ້ນ ​ແຕ່​ຢ່າງ​ໃດ​ກໍ​ຕາມ ໃນ​ຈໍານວນ​ຜູ້​ຕິດ​ເຊື້​ອທັງ​ໝົດ​ດັ່ງກ່າວ​ນີ້​ ປາກົດວ່າ​ມີ​ຜູ້​ທີ່​ເປັນ​ໂຣກ​ເອດ​ສ໌ຢ່າງ​ສົມບູນ​ແບບ​ແລ້ວ​ ຈໍານວນ​ເຖິງ 2,376 ຄົນ ​ແລະ​ກໍ​ໄດ້​ເສຍ​ຊີວິດ​ໄປ​ແລ້ວ​ເຖິງ 1,038 ຄົນອີກ​ດ້ວຍ ຊື່​ງກໍ​ຍ້ອນວ່າ​ລະບົບ​ໃຫ້ການ​ບໍລິການ​ປິ່ນປົວ​ແລະ​ການ​ຮັກສາ​ສຸຂະ​ພາບ​ຂອງ​ລັດຖະບານ​ ຍັງ​ຄົງ​ບໍ່ສາມາດ​ໃຫ້ການ​ເບິ່ງ​ແຍງ​ຜູ້​ຕິດ​ເຊື້ອ​ໂຣກດັ່ງ ກ່າວ​ນີ້​ຢ່າງທົ່ວ​ເຖິງ​ກັນ​ນັ້ນ​ເອງ.

ຍິ່ງ​ໄປ​ກວ່າ​ນັ້ນ ​ເມື່ອ​ປະກອບ​ກັບ​ການ​ທີ່​ລາວ​ເປັນ​ປະ​ເທດ​ທີ່ມີ​ຈຸດ​ທີ່​ຕັ້ງ​ຢູ່​ເຂດສູນ​ກາງ​ທີ່​ສາມາດ​ຈະເຊື່ອມ​ຕໍ່​ການຄົມມະນາຄົມ​ແລະ​ຂົນ​ສ່ົງ​ກັບ​ປະ​ເທດ​ທີ່ຢູ່​ໃນ​ເຂດລຸ່ມ​ແມ່ນໍ້າຂອງ​ດ້ວຍ​ກັນ​ໄດ້​ໃນ​ທຸກ​ທິດ​ທຸກທາງ​ດ້ວຍ​ແລ້ວ​ ກໍ​ຍັງ​ນັບ​ເປັນ​ເງຶ່​ອນ​ໄຂ​ສໍາຄັນ​ທີ່​ຈະ​ເຮັດໃຫ້​ປະຊາຊົນ​ລາວ​ມີ​ຄວາມ​ສ່ຽງ​ຢ່າງ​ສູງ ​ທີ່ຈະ​ຕິດ​ເຊື້ອ​ໂຣກດັ່ງກ່າວ​ນີ້​ຫລາຍ​ຂື້ນນັບ​ມື້​ອີກ​ດ້ວຍ ຖ້າ​ຫາກ​ວ່າ​ບໍ່​ມີ​ມາດ​ຕະການ​ປ້ອງ​ກັນ​ທີ່​ດີ​ພໍ ດັ່ງ​ທີ່​ທ່ານ​ພອນ​ເທບ ໄດ້​ໃຫ້ການ​ຊີ້​ແຈງ​ໃນ​ຕອນ​ນຶ່ງວ່າ

“ເຖິງ​ແມ່ນ​ວ່າ​ເຊື້ອ HIV-AIDS ຍັງ​ຢູ່​ໃນ​ຂອບ​ເຂດ​ບໍ່​ສູງ​ໃນ​ປະ​ເທດ​ເຮົາ​ເມື່ອ​ທຽບ​ໃສ່​ກັບປະ​ເທດ​ຂ້າງ​ຄຽງ ​ແຕ່​ປັດ​ໃຈສ່ຽງ​ໃນ​ການ​ແຜ່ລະບາດ​ນ້ັນ​ກໍ​ມີ​ຢູ່ ​ເພາະວ່າ​ການ​ຕິດ​ເຊື້ອ​ທາງ​ເພດ​ສໍາພັນ​ຢູ່​ບ້ານເຮົາ​ເຫັນ​ວ່າ​ ມັນ​ເພີ່ີມຫລາຍ​ຂື້ນ​ໃນ​ແຕ່ລະ​ປີ ​ແລ​ະຢູ່​ໃນຂົງ​ເຂດ​ປະ​ເທດ​ອ້ອມ​ແອ້ມ​ຂອງ​ເຮົາ​ ກໍ​ມີ​ການ​ຕິດ​ເຊື້ອ​ຫລາຍ​ຂື້ນ​ ແລະ​ປະ​ເທດເຮົາ​ກໍ​ເປັນ​ທາງ​ຜ່ານ ​ຊຶ່ງ​ແນ່ນອນ​ ການ​ເດີນທາງ​ໄປມາຫາສູ່​ກັນ​ຂອງ​ບັນດາ​ນັກ​ທ່ອງ​ທ່ຽວ​ ກໍ​ແມ່ນ​ບັນຫາ​ທີ່​ສະກັດກັ້ນ​ບໍ່​ໄດ້”

ລາຍ​ງານ​ຂອງ​ກະຊວງ​ສາທາລະນະ​ສຸຂລາວ​ໄດ້​ລະບຸ​ວ່າ​ສາ​ເຫດ​ສໍາຄັນ​ທີ່​ເຮັດ​ໃຫ້​ຄົນ​ລາວ​ຕິດ​ເຊື້​ອໂຣກ HIV-AIDS ຫລາຍ​ຂື້ນ​ທີ່ ສຸດ​ນັ້ນ ກໍ​ຄື​ການ​ມີ​ເພດ​ສໍາພັນ​ໂດຍ​ບໍ່​ມີ​ການ​ປ້ອງ​ກັນ​ດ້ວຍ​ຖົງ​ຢາງ​ອະນາ​ໄມ ​ໂດຍ​ສະ​ເພາະ​ແມ່ນ​ການ​ຕິດ​ເຊື້ອ​ໃນ​ກຸ່ມ​ຜູ້ຍິງ​ທີີ່ຂາຍ​ບໍລິການ​ທາງ​ເພດ ​ແລະ​ໃນ​ກຸ່ມ​ທີ່​ຮັກ​ຮ່ວມ​ເພດ​ດຽວ​ກັນ​ນັ້ນ ກໍ​ຍັງ​ນັບ​ເປັນ​ພາຫະນະ​ທີ່​ເຮັດ​ໃຫ້​ມີ​ການ​ແຜ່ ລະບາດ​ຂອງ​ເຊື້ອ​ໂຣກ ຢ່າງ​ໄວວາ​ອີກ​ດ້ວຍ. ນອກຈາກ​ນີ້ ກໍ​ເປັນ​ການ​ຕິດ​ເຊື້ອ​ໃນ​ລະ​ຫວ່າງ​ກຸ່ມ​ຄົນ​ທີ່​ຕິດ​ຢາ​ເສບ​ຕິດ​ດ້ວຍ​ການ​ໃຊ້​ເຂັມ​ຮ່ວມ​ກັນ ຊຶ່ງ​ຕໍ່​ກໍລະນີດັ່ງກ່າວ​ນີ້​ກໍ​ຍັງ​ນັບ​ເປັນ​ບັນຫາ​ທີ່​ມີ​ລະດັບ​ຄວາມ​ຮຸນ​ແຮງ​ຫລາຍ​ຂື້ນ​ນັບ​ມື້​ ​ໂດຍ​ສະ​ເພາະແມ່ນ​ໃນ​ກຸ່ມ​ເຍົາວະ​ຊົນ​ລາວ​ໃນ​ເຂດ​ແຂວງ​ພາກ​ເໜືອ​ທີ່​ຖືກ​ຂະ​ບວນການ​ຄ້າ​ຢາ​ເສບ​ຕິດ​ຂ້າມ​ຊາດ​ໃຊ້​ເປັນ​ທາງ​ຜ່ານ​ສຳຄັນ​ໃນ​ການ​ລັກລອບ​ຂົນ​ສົ່ງ​ຢາ​ເສບ​ຕິດ​ຈາກ​ເຂດ​ສາມ​ລ່ຽມ​ຄຳ​ຜ່ານ​ລາວ​ໄປ​ຍັງ​ຕ່າງປະ​ເທດ.

ຍິ່ງ​ໄປ​ກວ່າ​ນັ້ນ ກຸ່ມ​ແຮງ​ງານ​ລາວ​ທີ່​ໄດ້​ພາກັນ​ລັກ​ລອບ​ທໍາ​ງານ​ໂດຍ​ຜິດ​ກົດໝາຍ​ຢູ່ໃນ​ປະ​ເທດ​ເພື່ອນ​ບ້ານ​ ກໍ​ນັບ​ເປັນ​ອີກ​ກຸ່ມ​ນຶ່ງ​ທີ່​ມີ​ຄວາມ​ສ່ຽງ​ຢ່າງ​ສູງ​ທັງ​ໃນ​ຖານະ​ທີ່​ເປັນ​ຜູ້​ຮັບ​ເຊື້ອ ​ແລະ​ຜູ້ນໍາ​ເອົາ​ເຊື້ອ​ໂຣກໄປ​ຕິດ​ຕໍ່​ກັບ​ຄົນ​ຮັກ ​ໂດຍ​ສະ​ເພາະ​ແມ່ນ​ກຸ່ມ​ແຮງ​ງານ​ລາວ​ເພດ​ຍິງ​ທີ່​ລັກລອບ​ທໍາ​ງານ​ຢູ່​ໃນໄທ​ນັ້ນ ​ກໍ​ຍັງ​ມີ​ໂອກາດ​ທີ່​ຈະ​ຖືກ​ບັງຄັບ​ໃຫ້ຕ້ອງ​ຂາຍ​ບໍລິການ​ທາງ​ເພດ​ໂດຍ​ຂາດ​ການ​ປ້ອງ​ກັນ​ຕົນ​ເອງ​ອີກ​ດ້ວຍ. ທັງ​ນີ້​ໂດຍ​ອີງ​ຕາມ​ຂໍ້​ນູນຂອງ​ກຸ່ມ​ອົງການ​ຄຸ້ມ​ຄອງ​ແຮງ​ງານ​ຕ່າງ​ດ້າວ​ຈາກ​ລາວ ພະມ້າ ​ແລະ​ກໍາປູ​ເຈຍໃນ​ໄທ ​ກໍ​ໄດ້​ລະ​ບຸ​ວ່າ​ໃນ​ປັດຈຸບັນ​ນີ້ ​ມີ​ແຮງງານ​ລາວ​ຢູ່​ໃນ​ໄທ​ຫລາຍ​ກວ່າ 4 ​ແສນ​ຄົນ ​ແລະ​ໃນ​ຈໍານວນ​ນີ້​ ກໍ​ເປັນ​ແຮງ​ງານ​ທີ່​ທຳ​ງານ​ໃນ​ໄທ​ຢ່າງ​ຖືກຕ້ອງຕາມ​ກົດໝາຍ​ທີ່​ຜ່ານ​ການ​ພິສູດ​ສັນ​ຊາດ​ລາວ​ແລ້ວ ພຽງ​ແຕ່ 5 ໝື່ນ​ກວ່າ​ຄົນ​ເທ່ົ່ານັ້ນ ຊຶ່ງ​ກໍ​ໝາຍ​ຄວາມ​ວ່າ​ແຮງງານ​ລາວ​ອີກ​ຫລາຍ​ກວ່າ 3 ​ແສນ​ຄົນ​ແລະ​ຫລາຍ​ກວ່າ 56% ​ໃນ​ຈຳນວນ​ດັ່ງກ່າວ​ນີ້​ກໍ​ຄື​ແຮງ​ງານ​ລາວ​ເພດ​ຍິງດ້ວຍ​ແລ້ວ ​ຈຶ່ງ​ຖື​ວ່າ​ເປັນ​ກຸ່ມ​ທີ່​ສຸ່ມ​ສ່ຽງ​ຢ່າງ​ຍິ່ງ ​ທີ່​ຈະ​ຖືກ​ບີບ​ບັງຄັບໃຫ້​ຕ້ອງ​ຂາຍ​ບໍລິ​ການ​ທາງ​ເພດ​ໂດຍ​ຂາດ​ການ​ປ້ອງ​ກັນ ​ອັນ​ຈະ​ເຮັດ​ໃຫ້​ເຊື້ອ​ໂຣກ HIV-AIDS ມີ​ການ​ແຜ່ ລະບາດ​ໃນ​ລາວ​ຫລາຍ​ຂື້ນ​ຢ່າງ​ຫລີກ​ລ່ຽງ ບໍ່​ໄດ້​ນັ້ນ​ເອງ

XS
SM
MD
LG