ພະນັກງານຄົນນຶ່ງ ຂອງວັດສາສະໜາຮິນດູໃນບັງກລາແດັສ ໄດ້ຖືກຟັນຈົນຕາຍໃນຂະ ນະທີ່ລາວໄປຍ່າງໃນຕອນເຊົ້າວັນສຸກມື້ນີ້ ໃນອັນທີ່ຕຳຫຼວດທ້ອງຖິ່ນກ່າວວ່າ ເປັນການໂຈມຕີທີ່ໂຫດຫ້ຽມເທື່ອຫລ້າສຸດ ທີ່ມີມາເປັນລຳດັບຕໍ່ພວກສາສະໜາກຸ່ມນ້ອຍຢູ່ໃນທົ່ວປະເທດ.
ທ່ານ Nityaranjan Pande ອາຍຸ 62 ປີ ກຳລັງຍ່າງຢູ່ທີ່ເມືອງ Pabna ໃນພາກຕາເວັນຕົກສຽງເໜືອຂອງປະເທດ ເວລາພວກຄົນຮ້າຍທີ່ບໍ່ຊາບຝ່າຍກຸ່ມນຶ່ງໄດ້ຟັນຜູ້ກ່ຽວຈົນເສຍຊີວິດຄາທີ່.
ເຖິງແມ່ນວ່າຍັງບໍ່ທັນມີກຸ່ມໃດອ້າງເອົາຄວາມຮັບຜິດຊອບເທື່ອໃນການສັງຫານຄັ້ງນີ້ກໍຕາມແຕ່ຕຳຫຼວດໃນທ້ອງຖິ່ນກ່າວວ່າ ມີລັກສະນະຄ້າຍຄືກັນກັບການໂຈມຕີທີ່ໄດ້ກະທຳໂດຍພວກອິລາມຫົວຮຸນແຮງ.
ມີຫລາຍກວ່າ 40 ຄົນໄດ້ເສຍຊີວິດໃນການໂຈມຕີທີ່ຄ້າຍຄືກັນນັ້ນ ໃນຮອບ 3 ປີທີ່ຜ່ານມາ ແລະໃນໄລຍະສອງສາມເດືອນຜ່ານມານີ້ ຄວາມຮຸນແຮງແມ່ນໄດ້ເພີ້ມທະວີຂຶ້ນ. ພະຂອງສາສະໜາຮິນດູອົງນຶ່ງກໍໄດ້ຖືກຟັນຈົນຕາຍໃນມື້ວັນອັງຄານຜ່ານມານີ້ ໃນຂະນະທີ່ເພິ່ນພວມໄປວັດ.
ພວກນັກເຄື່ອນໄຫວເພື່ອສິດທິຂອງພວກຮັກຮ່ວມເພດ ອາຈານສອນຫົວເສລີແລະພວກຂຽນຂ່າວລົງອິນເຕີແນັດ ທີ່ບໍ່ຝັກໄຝ່ໃນສາສະໜາ ກໍຮວມຢູ່ໃນບັນດາພວກເຄາະຮ້າຍທີ່ເສຍຊີວິດ.
ມີພວກອິສລາມຫົວຮຸນແຮງ 3 ຄົນມີລາຍງານວ່າໄດ້ຖືກຂ້າຕາຍໃນການປະທະກັບຕຳ ຫຼວດ ທີ່ນະຄອນຫລວງດາກາໃນວັນອັງຄານຜ່ານມາ ໃນຂະນະທີ່ກຳລັງຕຳຫຼວດແຫ່ງຊາດພະຍາຍາມທຳການປາບປາມພວກຫົວຮຸນແຮງທີ່ມີການຖິ້ມໂທດໃສ່ວ່າເປັນຜູ້ຮັບ ຜິດຊອບກ່ຽວກັບການໂຈມຕີເຫລົ່ານີ້.
ກຸ່ມລັດອິສລາມແລະອາລກາອີດາໄດ້ອ້າງເອົາຄວາມຮັບຜິດຊອບໃນການໂຈມຕີຈຳນວນນຶ່ງ ແຕ່ເຈົ້າໜ້າທີ່ບັງກລາແດັສຍັງສືບຕໍ່ຢືນຢັດວ່າ ບໍ່ມີກຸ່ມກໍ່ການຮ້າຍຕ່າງປະເທດປະຕິ ບັດງານ ຢູ່ໃນບັງກລາແດັສ. ພວກເຈົ້າໜ້າທີ່ໄດ້ຖິ້ມໂທດໃສ່ ກຸ່ມຫົວຮຸນແຮງໃນທ້ອງຖິ່ນ ຫລືບໍ່ກໍກຸ່ມການເມືອງຝ່າຍຄ້ານເປັນຜູ້ຮັບຜິດຊອບແທນ.
ເຖິງແມ່ນວ່າໃນທາງການແລ້ວບັງກລາແດັສເປັນປະເທດທີ່ບໍ່ຝັກໄຝ່ໃນທາງສາສະໜາ ກໍຈິງ ແຕ່ປະມານ 90 ເປີເຊັນຂອງຊາວບັງກລາແດັສແມ່ນເປັນຊາວມຸສ ລິມ.
