ຜູ້ທີ່ວ່າຈະໄດ້ຮັບການສະເໜີຊື່ແຕ່ງຕັ້ງເປັນຜູ້ສະໝັກປະທານາທິບໍດີສະຫະລັດ ຂອງພັກ ຣີພັບບລິກັນ ທ່ານ Donald Trump ໄດ້ສະແດງປະຕິກິລິຍາຕອບຢ່າງແຮງ ໃນຕອນຄໍ່າ ວັນພະຫັດວານນີ້ ຕໍ່ຄຳປາໄສອັນໜັກແໜ້ນ ກ່ຽວກັບນະໂຍບາຍຕ່າງປະເທດ ໂດຍຜູ້ສະ ໝັກເປັນປະທານາທິບໍດີ ທີ່ມີຄະແນນນຳໜ້າ ຂອງພັກເດໂມແຄຣັດທ່ານນາງ Hillary Clinton ທີ່ໄດ້ກ່າວກ່ອນໜ້ານັ້ນໃນມື້ວານນີ້ ຊຶ່ງທ່ານນາງໄດ້ໂຈມຕີ ທ່ານ Trump ໂດຍກ່າວວ່າ ທ່ານ “ມີອາລົມທີ່ຫຸນຫັນພັນແລ່ນ ບໍ່ເໝາະສົມ ທີ່ຈະຢູ່ໃນຕຳແໜ່ງ ທີ່ຕ້ອງການ ຄວາມຮູ້ ມີຄວາມໝັ້ນຄົງ ແລະຄວາມຮັບຜິດຊອບສູງ.”
ທ່ານ Trump ໄດ້ຕອບໂຕ້ ຢູ່ໃນຄຳຖະແຫລງຂອງທ່ານ ໃນຕອນແລງວານີ້ຢູ່ທີ່ເມືອງ San Jose ລັດ California ວ່າ “ອາລົມຂອງຂ້າພະເຈົ້າໜັກແໜ້ນ ດີກ່ອນທ່ານນາງອີກ.” ທ່ານກ່າວອີກວ່າ “Hillary ທີ່ຂີ້ຕົວະ ບໍ່ຊື່ສັດ” ໄດ້ເສກ ສັນປັ້ນແຕ່ງ ກ່ຽວກັບນະໂຍບາຍຕ່າງປະເທດຂອງທ່ານ.
ບໍ່ເທົ່າໃດຊົ່ວໂມງກ່ອນໜ້າການກ່າວຄຳປາໄສຂອງທ່ານ Trump ນັ້ນທ່ານນາງ Clinton ໄດ້ເນັ້ນໜັກໃສ່ປະສົບການຂອງທ່ານນາງໃນຖານະສະຕີໝາຍເລກນຶ່ງ ຊະມາຊິກສະພາສູງ ແລະລັດຖະມົນຕີຕ່າງປະເທດ ໂດຍກ່າວວ່າ ທ່ານຈະເຮັດໃຫ້ການທູດ ມີຄວາມໝັ້ນ ຄົງທີ່ປະເທດຊາດຕ້ອງການ. ທ່ານນາງກ່າວວ່າ “ມັນບໍ່ຍາກຊາ ທີ່ຈະເຫັນທ່ານ Donald Trump ນຳພາພວກເຮົາເຂົ້າໄປສູ່ສົງຄາມ ຍ້ອນວ່າເປັນບຸກຄົນທີ່ບໍ່ສາມາດຮັບເອົາການຕ້ອງຕິໄດ້ນັ້ນ.”
ໃນການຕອບໂຕ້ ມະຫາເສດຖີອະສັງຫາລິມະຊັບ ກ່າວວ່າ ຄຳຖະແຫລງຂອງທ່ານນາງ Clinton ທີ່ວ່ານັ້ນ “ຍາກທີ່ຈະບໍ່ນອນ” ລະຫວ່າງຖະແຫລງການຂອງທ່ານນາງ ແລະກ່າວ ເພີ້ມອີກວ່າ ທ່ານນາງ Clinton ສາມາດເຮັດເງິນໄດ້ຫລາຍ ຖ້າຫາກນາງກ່າວຖະແຫລງຕໍ່ພວກອຶດນອນ.
ໃນຂະນະທີ່ການຢັ່ງສຽງຂອງປະຊາຊົນສະແດງໃຫ້ເຫັນວ່າ ການກໍ່ການຮ້າຍແມ່ນຄວາມ ເປັນຫ່ວງທີ່ສຳຄັນ ໃນໝູ່ຊາວອາເມຣິກັນ ທ່ານນາງ Clinton ໄດ້ແນເປົ້າໝາຍໃສ່ທ່າທີ ຂອງທ່ານ Trump ກ່ຽວກັບບັນຫາດັ່ງກ່າວ.
