ອະດີດລັດຖະມົນຕີການຕ່າງປະເທດສະຫະລັດ ທ່ານນາງ Hillary
Clinton ທີ່ກຳລັງຢູ່ໃນການຖືກຕຳນິຕິຕຽນຢ່າງໜັກ ກ່ຽວກັບ
ການນຳໃຊ້ email ສ່ວນຕົວ ໃນການປະຕິບັດພາລະກິດທາງ
ລາດຊະການ ໃນຂະນະທີ່ທ່ານນາງຍັງດຳລົງຕຳແໜ່ງເປັນ
ນັກການທູດຂັ້ນສູງຂອງສະຫະລັດນັ້ນ ກ່າວວ່າ ທ່ານນາງ
ໄດ້ຮຽກຮ້ອງໃຫ້ທາງກະຊວງການຕ່າງປະເທດ ເປີດເຜີຍບັນດາ
emails ທັງຫຼາຍຂອງທ່ານນາງ.
ທ່ານນາງ Clinton ໄດ້ຂຽນຂໍ້ຄວາມລົງໃນ Twitter ເມື່ອແລງວັນພຸດວານນີ້ວ່າ “ຂ້າພະເຈົ້າຕ້ອງການທີ່ຈະໃຫ້ສາທາລະນະຊົນເຫັນ email ພວກນີ້." ຂ້າພະເຈົ້າຂໍໃຫ້ທາງກະຊວງການຕ່າງເປີດເຜີຍ email ດັ່ງກ່າວ. ພວກເຂົາເຈົ້າກ່າວວ່າ ພວກເຂົາເຈົ້າຈະທົບທວນເບິ່ງ email ນີ້ ໂດຍໄວເທົ່າທີ່ຈະໄວໄດ້.
ໂຄສົກກະຊວງການຕ່າງປະເທດ ທ່ານນາງ Marie Harf ໄດ້ອອກຖະແຫຼງການສະບັບນຶ່ງ ທີ່ກ່າວວ່າ ທາງກະຊວງຈະທົບທວນເບິ່ງ email ຂອງທ່ານນາງ Clinton ຕາມຂັ້ນຕອນແບບປົກກະຕິ ແລ້ວຈຶ່ງຈະນຳອອກເປີດເຜີຍ.
ທ່ານນາງ Clinton ໄດ້ອອກມາຖະແຫຼງກ່ຽວກັບເລື້ອງນີ້ ຫຼັງຈາກທີ່ທາງໜັງສືພິມ New York Times ໄດ້ພິມເຜີຍແຜ່ການນຳໃຊ້ email ສ່ວນຕົວ ໃນການປະຕິບັດພາລະກິດທາງລາດຊະການ ຊຶ່ງກ່າວຕື່ມວ່າ ທ່ານນາງອາດລະເມີດກົດໝາຍ ວ່າດ້ວຍການເກັບກຳບັນທຶກ
ຂໍ້ມູນຂອງລັດຖະບານກາງ ທີ່ບັງຄັບໃຫ້ເກັບກຳເອກກະສານໄວ້ໃຫ້ເປັນສົມບັດຂອງລັດຖະ
ບານນັ້ນ.
ເລື້ອງລາວດັ່ງກ່າວນີ້ ໄດ້ເກີດມີມຸມມອງອີກດ້ານນຶ່ງ ໃນວັນພຸດວານນີ້ ເວລາເລື້ອງດັ່ງກ່າວຖືກພິມເຜີຍແຜ່ ໂດຍອົງການຂ່າວ Associated Press ທີ່ໄດ້ລະບຸວ່າ ທ່ານນາງ Clinton ໄດ້ນຳໃຊ້ email ສ່ວນຕົວ ທີ່ໃຊ້ Server ຢູ່ໃນບ້ານເຮືອນຂອງທ່ານນາງເອງ ທີ່ New York ນັ້ນ.
ການເປີດເຜີຍ ດັ່ງກ່າວນີ້ ໄດ້ພາໃຫ້ປະທານຄະນະກຳມາທິການພິເສດຂອງສະພາຕ່ຳ ທີ່ທຳການສືບສວນສອບສວນ ກ່ຽວກັບການໂຈມຕີໃນປີ 2012 ຕໍ່ສະຖານທີ່ການທູດສະຫະລັດໃນເມືອງ Benghazi ປະ ເທດ Libya ນັ້ນ ອອກໝາຍຮຽກ ເອົາຂໍ້ມູນໃນ email ຂອງທ່ານ
ນາງ Clinton ທີ່ກ່ຽວຂ້ອງກັບເຫດການທີ່ໄດ້ເກີດຂຶ້ນນັ້ນ.
