ອະດີດລັດຖະມົນຕີການຕ່າງປະເທດສະຫະລັດ ທ່ານນາງ
Hillary Clinton ໄດ້ປະກາດເຂົ້າແຂ່ງຂັນເລືອກຕັ້ງປະທາ
ນາ ທິບໍດີສະຫະລັດ ປີ 2016 ຢ່າງເປັນທາງການແລ້ວ ແລະ
ກໍເປັນຜູ້ທີ່ໃຜໆກໍຄາດ ຈະໄດ້ຮັບການແຕ່ງຕັ້ງຈາກພັກເດໂມ
ແຄຣັດຢ່າງແນ່ ນອນ. ນັກຂ່າວວີໂອເອ Michael Bowman
ລາຍງານວ່າ ບັນດາສະມາຊິກພັກຣີພັບບລິກັນ ທີ່ສະມັກເຂົ້າ
ແຂ່ງຂັນເຊັ່ນກັນ ໄດ້ພາກັນເລີ້ມແນເປົ້າການໂຈມຕີໃສ່ທ່ານ
ນາງ Clinton ອະດີດສະມາຊິກສະພາສູງ ແລະສະຕີໝາຍ
ເລກນຶ່ງຂອງສະຫະລັດ ຊຶ່ງໃນໄວ 67 ປີ ກຳລັງພະຍາຍາມ
ຈະເຂົ້າໄປຢູ່ໃນທຳນຽບຂາວ ເປັນເທື່ອທີສອງ. ດາຣາມີລາຍ
ລະອຽດມາສະເໜີທ່ານ.
ທ່ານນາງ Hillary Clinton ໄດ້ເຮັດໃຫ້ເປັນທາງການແລ້ວ
ໂດຍໄດ້ເອົາວີດີໂອຄຳປະກາດຂອງທ່ານນາງ ໂພສລົງທາງເວັບໄຊ້ ທີ່ມີເນື້ອໃນເນ້ນໜັກ
ໃສ່ການດິ້ນຮົນຕໍ່ສູ້ ແລະຄວາມໃຝ່ຝັນຂອງ ພົນລະເມືອງອາເມຣິກັນທຳມະດາສາມັນ
ແລະປະກາດຄວາມປາດຖະໜາຢາກທຳງານ ເພື່ອເຂົາເຈົ້າ ຂອງທ່ານນາງ.
ທ່ານນາງ Hillary Clinton ກ່າວວ່າ “ຊາວອາເມຣິກັນທຳມະດາສາມັນ
ແມ່ນຕ້ອງການແຊມປ້ຽນ ກໍຄືຄົນຕໍ່ສູ້ເພື່ອເຂົາເຈົ້າ ແລະຂ້າພະເຈົ້າກໍ
ຢາກເປັນແຊມປ້ຽນຄົນນັ້ນ.”
ພັນລະຍາຂອງອະດີດປະທານາທິບໍດີ Bill Clinton ສຸມການໂຄສະນາຫາສຽງຂອງທ່ານ
ນາງ ໃສ່ເລື້ອງຄວາມເປັນຫ່ວງຢູ່ພາຍໃນປະເທດ. ແຕ່ວ່າການດຳລົງຕຳແໜ່ງເປັນນັກການ
ທູດຂັ້ນສູງສຸດຂອງອາເມຣິກາ ໃນລະຫວ່າງລັດຖະບານຊຸດທຳອິດຂອງປະທານາທິບໍດີ
Barack Obama ນັ້ນ ຈະພາໃຫ້ມີການເພ່ງເລັງໃສ່ກິດຈະກຳຕ່າງໆທ່ານນາງ ອັນໂຮມທັງ
ການໃຊ້ອີເມລສ່ວນຕົວຂອງທ່ານນາງເອງ ສົ່ງຈົດໝາຍຕ່າງໆທີ່ກ່ຽວກັບວຽກທາງການ
ແລະການດຳເນີນການຕັດສິນໃຈຂອງກະຊວງຕ່າງປະເທດ ກ່ອນເກີດເຫດການໂຈມຕີບໍລິ
ເວນສະຖານທູດຂອງສະຫະລັດ ໃນເມືອງ Benghazi ປະເທດລີເບຍ ທີ່ພາໃຫ້ມີຄົນເສຍ
ຊີວິດ ຮວມທັງເອກອັກຄະລັດຖະທູດສະຫະລັດ ເມື່ອປີ 2012 ນັ້ນ.
ເບິ່ງວີດີໂອ ປະກາດເຂົ້າແຂ່ງຂັນເລືອກຕັ້ງຂອງທ່ານນາງ Hillary Clinton:
ທາງບັນດາສະມາຊິກພັກຣີພັບບລິກັນນັ້ນ ກໍແມ່ນໄດ້ພາກັນເວົ້າເຍາະເຍີ້ຍ ປະຫວັດແລະ
ວິທີການບໍລິຫານ ຂອງທ່ານນາງ Clinton ແລ້ວ ເຊັ່ນໃນວີດີໂອໂຄສະນາອັນນີ້ຂອງສະມາ
ຊິກສະພາສູງ Rand Paul ທີ່ໄດ້ປະກາດສະມັກເຂົ້າແຂ່ງຂັນເອົາການແຕ່ງຕັ້ງໃຫ້ເປັນຜູ້
ສະໝັກເລືອກຕັ້ງປະທານາທິບໍດີສະຫະລັດ ຂອງພັກຣີພັບບລິກັນ.
ສຽງໂຄສະນາເວົ້າວ່າ “ທ່ານນາງ Hillary Clinton ແມ່ນເປັນເຄື່ອງຈັກກົນໄກ
ທີ່ຂີ້ຮ້າຍທີ່ສຸດຂອງວໍຊິງຕັນ ເປັນຄວາມຈອງຫອງໂອຫັງຂອງອຳນາດ ການສໍ້
ລາດບັງຫລວງແລະການປົກປິດ ການຂັດແຍ້ງ ກັນຂອງຜົນປະໂຫຍດ ແລະ
ການນຳພາທີ່ລົ້ມແຫລວ ທີ່ສົ່ງຜົນສະທ້ອນອັນເສົ້າສະຫລົດໃຈ.”
ສ່ວນປະທານາທິບໍດີ Obama ມີແຕ່ຄຳຊົມເຊີຍ ສຳຫລັບທ່ານນາງ Clinton.
ທ່ານ Obama ກ່າວວ່າ “ທ່ານນາງເປັນລັດຖະມົນຕີຕ່າງປະເທດທີ່ພິເສດ
ໂດດເດັ່ນ ເປັນໝູ່ຂອງຂ້າພະເຈົ້າ. ຂ້າພະເຈົ້າຄິດວ່າ ທ່ານນາງຈະເປັນ
ປະທານາທິບໍດີ ທີ່ດີເລີດຄົນນຶ່ງ.”
ທາງນັກວິເຄາະການເມືອງ Charlie Cook ມີຄວາມເຫັນດັ່ງນີ້:
“ຂ້າພະເຈົ້າບໍ່ຄິດວ່າ ເລື້ອງອີເມລ ຫລືເລື້ອງ Benghazi ຈະເປັນບັນຫາ
ຮ້າຍແຮງທີ່ຈະທັບມ້າງຄວາມພະຍາຍາມຂອງທ່ານນາງຄລິນຕັນ.”
ທ່ານ Cook ກ່າວຕື່ມວ່າ ທ່ານນາງ Hillary Clinton ແມ່ນນຶ່ງໃນບັນດາບຸກຄົນສາທາລະ
ນະຂອງອາເມຣິກາ ທີ່ຜູ້ຄົນຮູ້ຈັກກັນດີທີ່ສຸດ ຈະໃນທາງທີ່ດີຫລືບໍ່ດີກໍຕາມ. ທ່ານນາງມີ
ພາລະກິດທີ່ພິເສດໜັກໜ່ວງບໍ່ຄືຂອງໃຜ ຂວາງໜ້າຢູ່ ຍ້ອນວ່າມາຮອດດຽວນີ້ ກໍຍັງບໍ່ມີ
ຄົນໃດຈາກພັກເດໂມແຄຣັດ ກ້າວອອກມາທ້າທາຍທ່ານນາງ.
ທ່ານ Cook ກ່າວວ່າ “ທ່ານນາງ Hillary Clinton ແມ່ນຈະແຂ່ງຂັນກັບ
ຕົວທ່ານນາງເອງ. ທ່ານນາງຈະຕ້ອງໄດ້ສະແດງໃຫ້ເຫັນວ່າ ທ່ານນາງ
ຍັງທັນກັບສັດຕະຫວັດທີ່ 21 ນີ້ຢູ່ ແລະຈະຕ້ອງມອງໄປຍັງອະນາຄົດ
ຫລາຍກ່ວາອະດີດ.”
ແລະທ່ານນາງຈະຕ້ອງຢືນຢູ່ດ້ວຍຕົນເອງ ເຖິງແມ່ນເປັນພັນລະຍາຂອງອະດີດປະທານາ
ທິບໍດີ ແລະໄດ້ຮັບໃຊ້ລັດຖະການໃນລັດຖະບານຊຸດນຶ່ງ ທີ່ປະເຊີນກັບການທ້າທາຍຕ່າງໆ
ນາໆ ນັບຈາກຢູເຄຣນໄປຫາເຢເມັນ. ເມື່ອວັນອາທິດຜ່ານມານີ້ ໃນການປະກາດລົງສະໝັກ
ເລືອກຕັ້ງນັ້ນ ທ່ານນາງ Hillary Clinton ໄດ້ພະຍາຍາມທີ່ຈະແນະນຳຕົວເອງຄືນໃໝ່ ຕໍ່
ປະຊາຊົນອາເມຣິກັນ ທີ່ມີຄວາມມຸດມັດເຫລືອອົກເຫລືອໃຈ ນຳອຳນາດປົກຄອງໃນວໍຊິງຕັນ
ແລະພວກມີສິດປ່ອນບັດທີ່ເກືອບວ່າ ບໍ່ເຄີຍເລີຍທີ່ຈະມອບທຳນຽບຂາວ ໃຫ້ແກ່ພັກການ
ເມືອງພັກດຽວ ສາມສະໄໝລຽນຕິດຈັກເທື່ອ.