ອະດີດຜູ້ສະໝັກ ປະທານາທິບໍດີສະຫະລັດ ທ່ານນາງ Hillary Clinton ໄດ້ເຕືອນໃນວັນພະຫັດວານນີ້ກ່ຽວກັບອັນຕະລາຍໃນການເຜີຍແຜ່ຂ່າວທີ່ບໍ່ມີຄວາມຈິງຫຼືຂ່າວເທັດ ຫລັງຈາກໄດ້ມີຂ່າວທີ່ມີການສົມຮູ້ຮ່ວມຄິດທີ່ບໍ່ຖືກຕ້ອງພົວພັນກັບການໂຄສະນາຫາສຽງຂອງທ່ານນາງ ກໍ່ໃຫ້ເກີດຄວາມຮຸນແຮງເມື່ອໄວໆມານີ້.
ທ່ານນາງ Clinton ກ່າວຕໍ່ພວກສະມາຊິກໃນປັດຈຸບັນ ແລະອະດີດ ຂອງລັດຖະສະພາສະຫະລັດ ທີ່ຕຶກສະພາ ບ່ອນທີ່ທ່ານນາງໄປຮ່ວມ ພິທີອຳລາ ຜູ້ນຳສຽງສ່ວນນ້ອຍ ຂອງ ພັກເດໂມແຄຣັດ ໃນສະພາສູງສະຫະລັດ ທ່ານ Harry Reid ທີ່ກຳລັງຈະອອກບຳນານ ວ່າ “ເວລານີ້ແມ່ນເປັນທີ່ຈະແຈ້ງວ່າ ອັນທີ່ເອີ້ນວ່າຂ່າວເທັດນັ້ນສາມາດສ້າງຄວາມເສຍຫາຍທີ່ຕິດຕາມມາຢ່າງແທ້ຈິງໄດ້.
ທ່ານນາງກ່າວຕື່ມວ່າ “ນີ້ມັນບໍ່ແມ່ນການເມືອງຫຼືພັກໃດພັກນຶ່ງ ຊີວິດແມ່ນຕົກຢູ່ໃນຄວາມສ່ຽງ.”
ທ່ານນາງໄດ້ໝາຍເຖິງອັນທີ່ເອີ້ນວ່າ ເຫດຮ້າຍ “Pizzagate” ທີ່ນະຄອນຫຼວງວໍຊິງຕັນໃນທ້າຍສັບປະດາຜ່ານມາ ຊຶ່ງໄດ້ສິ້ນສຸດລົງ ແບບໜ້າຕື່ນຕົກໃຈ. ຜູ້ຊາຍຄົນນຶ່ງ ທີ່ເຊື່ອຂ່າວເທັດ ທີ່ວ່າທ່ານນາງ Clinton ແລະຜູ້ຊ່ອຍຂອງທ່ານນາງ ແມ່ນພາກັນເປີດບໍລິການການຄ້າໂສເພນີເດັກ ທີ່ຮ້ານຂາຍພີຊຊາທ້ອງຖິ່ນແຫ່ງນຶ່ງ ໄດ້ເຂົ້າໄປໃນຮ້ານອາຫານດັ່ງກ່າວໃນວັນອາທິດແລ້ວ ແລ້ວກໍຍິງປຶຶນຂຶ້ນຟ້າ. ແຕ່ບໍ່ມີຜູ້ໃດໄດ້ຮັບບາດເຈັບ.
ຕຳຫຼວດໄດ້ຈັບທ້າວ Edgar Maddison Welch ອາຍຸ 28 ປີໃນທັນທີ. ເຂົາເຈົ້າກ່າວວ່າ ລາວໄດ້ບອກຕຳຫຼວດວ່າລາວຂັບລົດມາແຕ່ລັດ North Carolina ເພື່ອສືບສວນດ້ວຍຕົວເອງ ກ່ຽວກັບຂ່າວທີ່ບໍ່ມີມູນຄວາມຈິງນີ້ ແລະຊ່ອຍເຫລືອພວກເດັກນ້ອຍ.
ນອກນັ້ນແລ້ວ ທຸລະກິດອື່ນໆຍັງໄດ້ຮັບການຂົ່ມຂູ່ ຫລັງຈາກທິດສະດີສົມຮູ້ຮ່ວມຄິດ ຖືກ ແພ່ສະພັດໄປທາງອິນເຕີແນັດ.
