ລິ້ງ ສຳຫລັບເຂົ້າຫາ

ວັນອັງຄານ, ໒໓ ກໍລະກົດ ໒໐໒໔

ກຸ່ມ ເຮັ​ສບອ​ລ​ລາ ເວົ້າ​ວ່າ​ພວກ​ເຂົາ​ໂຈມ​ຕີ​ສະ​ຖານ​ທີ່​ທາງ​ທະ​ຫານ​ຂອງ ອິ​ສ​ຣາ​ແອ​ລ 9 ແຫ່ງ​ດ້ວຍ​ຈະຫຼວດ


ເຮືອ​ບິນ​ລຳ​ນຶ່ງ​ໃຊ້​ສານ​ເຄ​ມີ​ເພື່ອມອດ​ໄຟ​ໃນ​ເມືອງ ຊາ​ເຟດ, ອິ​ສ​ຣາ​ແອ​ລ, 12 ມິ​ຖຸ​ນາ 2024.
ເຮືອ​ບິນ​ລຳ​ນຶ່ງ​ໃຊ້​ສານ​ເຄ​ມີ​ເພື່ອມອດ​ໄຟ​ໃນ​ເມືອງ ຊາ​ເຟດ, ອິ​ສ​ຣາ​ແອ​ລ, 12 ມິ​ຖຸ​ນາ 2024.

ກຸ່ມ ເຮັ​ສບອ​ລ​ລາ ໄດ້​ກ່າວ​ວ່າ​ພວກ​ເຂົາ​ໄດ້​ຍິງ​ຈະຫຼວດຫຼາຍ​ລູກ ແລະ ໃຊ້​ໂດ​ຣນ​ເປັນ​ອາ​ວຸດ​ ໂຈມ​ຕີ​ໃສ່​ສະ​ຖານ​ທີ່​ທາງ​ທະ​ຫານ​ຂອງ ອິ​ສ​ຣາ​ແອ​ລ 9 ແຫ່ງ ໃນ​ການ​ໂຈມ​ຕີ​ແບບປະ​ສານ​ກັນ ​ໃນ​ວັນ​ພະ​ຫັດ​ວານນີ້, ເຊິ່ງ​ເປັນ​ການ​ເພີ່ມ​ຄວາມ​ມຸ່ງ​ຮ້າຍ​ຢູ່​ເຂດ​ຊາຍ​ແດນ​ພາກ​ໃຕ້​ຂອງ​ປະ​ເທດ ເລ​ບາ​ນອນ​ ເປັນ​ວັນ​ທີສອງ​ຕິດ​ຕໍ່​ກັນ.

ການ​ໂຈມ​ຕີ​ຕ່າງໆ​ໄດ້​ດຳ​ເນີນ​ຂຶ້ນ​ເພື່ອ​ເປັນ​ການ​ແກ້​ແຄ້ນ​ຕໍ່​ການ​ໂຈມ​ຕີ​ຂອງ ອິ​ສ​ຣາ​ແອ​ລ ເມື່ອ​ວັນ​ອັງ​ຄານ​ທີ່​ຜ່ານ​ມາ ​ທີ່​ໄດ້​ສັງ​ຫານ​ຜູ້​ບັ​ນ​ຊາ​ການ​ອາ​ວຸ​ໂສ​ພາກ​ສະ​ໜາມ​ຂອງ​ກຸ່ມ ເຮັ​ສບອ​ລ​ລາ. ແຫຼ່ງ​ຂ່າວ​ດ້ານ​ຄວາມ​ໝັ້ນ​ຄົງ​ໄດ້​ກ່າວ​ຕໍ່ ເລ​ບາ​ນອນ ວ່າ​ ມັນ​ແມ່ນ​ການ​ໂຈມ​ຕີ​ທີ່​ໃຫຍ່​ທີ່​ສຸດໂດຍ​ກຸ່ມ ເຮັ​ສບອ​ລ​ລາ ນັບ​ຕັ້ງ​ແຕ່​ເດືອນ​ຕຸ​ລາ​ທີ່​ຜ່ານ​ມາ, ເວ​ລາ​ທີ່​ກຸ່ມ​ດັ່ງ​ກ່າວ ​ໄດ້​ເລີ່ມ​ຍິງ​ຕອບ​ໂຕ້​ກັບ ອິ​ສ​ຣາ​ແອ​ລ ທີ່​ເກີດ​ຂຶ້ນ​ພ້ອມ​ກັບ​ສົງ​ຄາມ ກາ​ຊາ.

ໃນ​ຕອນ​ເຊົ້າໆ​ຂອງວັນ​ສຸກມື້​ນີ້, ການ​ໂຈມ​ຕີ​ໃສ່​ຕຶກ​ແຫ່ງ​ນຶ່ງ​ທາງ​ພາກ​ຕາ​ເວັນ​ອອກ​ຂອງ​ເມືອງ​ທ່າ​ເຮືອ ທາຍ​ເອີ (Tyre) ໄດ້​ເຮັດ​ໃຫ້​ພົນ​ລະ​ເຮືອນ​ແມ່​ຍິງ​ຄົນ​ນຶ່ງ​ເສຍ​ຊີ​ວິດ ແລະ ຫຼາຍກວ່າ​ສິບ​ຄົນ​ໄດ້​ຮັບ​ບາດ​ເຈັບ, ເຊິ່ງຫຼາຍ​ຄົນ​ໃນ​ນັ້ນ​ແມ່ນ​ເດັກ​ນ້ອຍ, ອີງ​ຕາມ​ແຫຼ່ງ​ຂ່າວ​ດ້ານ​ຄວາມ​ໝັ້ນ​ຄົງ​ສອງ​ແຫ່​ງ​ຂອງ ເລ​ບາ​ນອນ. ເມື່ອ​ຖືກ​ຖາມ ກ່ຽວ​ກັບ ເຫດ​ການ​ດັ່ງ​ກ່າວ, ກອງ​ທັບ ອິ​ສ​ຣາ​ແອ​ລ ໄດ້​ກ່າວ​ວ່າ ເຂົາ​ເຈົ້າ​ກຳ​ລັງ​ສືບ​ສວນ​ມັນ​ຢູ່.

ກຸ່ມ​ເຮັ​ສບອ​ລ​ລາ ໄດ້​ກ່າວ​ໃນ​ຖະ​ແຫຼງ​ການ​ສະ​ບັບ​ນຶ່ງ​ກ່ອນ​ໜ້ານີ້​ວ່າ​ ພວກ​ເຂົາ​ໄດ້​ຍິງ​ຈະຫຼວດ ຄາ​ຕິວ​ຊາ ແລະ ຟາ​ລາກ ໃສ່​ຕຳ​ແໜ່ງ​ທາງ​ທະ​ຫານ​ຂອງ ອິ​ສ​ຣາ​ແອ​ລ 6 ແຫ່ງ. ໂທ​ລະ​ພາບ ອາ​ລ-ມາ​ນາ ຂອງ​ເຂົາ​ເຈົ້າ​ໄດ້​ລາຍ​ງານ​ຈະຫຼວດຫຼາຍກວ່າ 100 ລູກ​ຖືກ​ຍິງ​ອອກ​ມາ​ໃນ​ຄັ້ງ​ດຽວ.

ຖະ​ແຫຼງ​ການ​ຂອງ​ກຸ່ມ ເຮັ​ສບອ​ລ​ລາ ໄດ້​ກ່າວ​ວ່າພວກ​ເຂົາ​ໄດ້​ເປີດ​ການ​ໂຈມ​ຕີ​ດ້ວຍ​ໂດ​ຣນ​ໃສ່​ສຳ​ນັກ​ງານ​ໃຫຍ່​ຂອງກອງ​ບັນ​ຊາ​ການ​ພາກ​ເໜືອ​ຂອງ ອິ​ສ​ຣາ​ແອ​ລ, ສຳ​ນັກ​ງານ​ໃຫຍ່​ການ​ສືບ​ລັບ ແລະ ຄ້າຍ​ທະ​ຫານ.

ແຫຼ່ງ​ຂ່າວ​ດ້ານ​ຄວາ​ມ​ໝັ້ນ​ຄົງ​ໄດ້​ກ່າວ​ຕໍ່​ອົງ​ການ​ຂ່າວ ຣອ​ຍ​ເຕີ ວ່າ​ໂດ​ຣນ​ຢ່າງ​ໜ້ອຍ 30 ລຳ​ໄດ້​ຮ່ວມ​ໃນ​ການ​ຍິງ​ຄັ້ງ​ດຽວ, ເຮັດ​ໃຫ້​ມັນ​ເປັນ​ການ​ໂຈມ​ຕີ​ດ້ວຍ​ໂດ​ຣນ​ທີ່​ໃຫຍ່​ທີ່​ສຸດ​ຂອງ​ກຸ່ມ​ນັ້ນ​ຈົນ​ເຖິງ​ປັດ​ຈຸ​ບັນ​ນີ້​ໃນ​ສົງ​ຄາ​ມ​ທີ່​ດຳ​ເນີນ​ມາ​ໄດ້ 8 ເດືອນ.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG