ລະດູການຂອງຍຸງໃນສະຫະລັດ ໄດ້ເລີ້ມຂຶ້ນແລ້ວ ເພາະສະນັ້ນຈຶ່ງວ່າພວມມີໄພຂົ່ມຂູ່ ມາຈາກໂຣກ Zika. ພວກເຈົ້າໜ້າທີ່ກະຊວງການຕ່າງປະເທດຂອງສະຫະລັດ ກຳລັງ ກະທຳ ທຸກຢ່າງເທົ່າທີ່ຈະປະຕິບັດໄດ້ ເພື່ອປົກປ້ອງຄຸ້ມຄອງປະຊາຊົນຂອງຕົນ ເຖິງແມ່ນວ່າ ຈະບໍ່ມີກອງທຶນສຸກເສີນມາຈາກລັດຖະສະພາ ຊຶ່ງບັນດາທ່ານໝໍຂັ້ນ ອາວຸໂສ ກ່າວວ່າ ມີຄວາມ ຈຳເປັນຍິ່ງນັ້ນກໍຕາ.ວັນນະສອນ ຈະນຳລາຍງານເລື້ອງນີ້ ຈາກ Carol Pearson ນັກຂ່າວຂອງ VOA ມາສະເຫນີທ່ານໃນອັນດັບຕໍ່ໄປ.
ຊ່ວງນີ້ ແມ່ນລະດູຮ້ອນຢູ່ໃນສະຫະລັດ ຊຶ່ງເປັນການເລີ້ມຕົ້ນຂອງລະດູການ ພັກຜ່ອນ ຂອງຄອບຄົວ ທັງເປັນລະດູເພາະພັນຂອງພວກຍຸງ ຊຶ່ງຮວມທັງ ພວກຍຸງທີ່ນຳພາໄວຣັສ Zika ມານັ້ນນຳ. ທ່ານໝໍ Tom Frieden ຫົວໜ້າ ຂອງສູນກາງຄວບຄຸມ ແລະປ້ອງກັນ ພະຍາດ ຂອງສະຫະລັດກ່າວວ່າ ມີຫຼາຍຢ່າງທີ່ສາມາດເຮັດໄດ້ ເພື່ອປ້ອງກັນການແຜ່ ລະບາດຂອງໂຣກ Zika ນີ້ ໃນບັນດາລັດທາງພາກໃຕ້ຂອງສະຫະລັດ ພຽງແຕ່ວ່າ ທາງລັດຖະ ສະພາ ໃຫ້ເງິນມາເທ່ົານັ້ນ.
ທ່ານໝໍ Tom Frieden ຫົວໜ້າຂອງສູນກາງຄວບຄຸມແລະປ້ອງກັນພະຍາດ ຂອງສະຫະລັດ ກ່າວວ່າ “ພວກເຮົາຈຳເປັນຈະຕ້ອງໄດ້ຕອບສະໜອງໃນການ ປ້ອງກັນ ແມ່ຍິງອາເມຣິກັນ ແລະຫຼຸດຜ່ອນຈຳນວນຄອບຄົວທີ່ຖືກກະທົບ ທາງດ້ານມະນຸດ ສະທຳໃຫ້ຫຼາຍ ທີ່ສຸດເທົ້າທີ່ຈະເປັນໄປໄດ້. ພວກເຮົາ ບໍ່ຮູ້ວ່າ ພວກເດັກນ້ອຍນັ້ນ ຈະແມ່ນພວກໃດ. ພວກເຮົາບໍ່ຮູ້ວ່າ ພວກເຂົາ ຈະເຕີບໂຕ ໃນບ່ອນໃດ ແຕ່ວ່າ ຖ້າພວກເຮົາ ບໍ່ເຮັດຫຍັງເລີຍໃນປະຈຸ ບັນນີ້ ພວກເຮົາ ຈະເສຍໃຈຕາມທີຫຼັງ.”
ທ່ານໝໍ Frieden ກ່າວວ່າ ໂຣກ Zika ບໍ່ເປັນໄພຂົ່ມຂູ່ທີ່ຮ້າຍແຮງ ນອກຈາກວ່າ ມັນເປັນ ສາເຫດຂອງການຄອດລູກທີ່ບໍ່ປົກກະຕິ ຊຶ່ງຮວມທັງ ໂຣກຫົວລີບ ຫຼື microcephaly ນັ້ນນຳ.
ທ່ານໝໍ Frieden ກ່າວຕື່ມວ່າ “ຕອນທີ່ເດັກນ້ອຍເກີດມາມີໂຣກຫົວລີບ ມັນຈະບໍ່ ແມ່ນ ເປັນຍ້ອນຫົວກະໂຫຼກທີ່ພັດທະນາສົມປະກອບ ແຕ່ມັນເປັນຍ້ອນວ່າໄວຣັສ ໄປທຳລາຍແຊລຂອງສະໝອງ ແລ້ວເຮັດໃຫ້ໂຄງຫົວກະໂຫຼກຢູ່ອ້ອມສະໝອງ ນັ້ນຍຸບ.”
ພວກສະມາຊິກສະພາບາງທ່ານ ກ່າວວ່າ ມີເງິນພຽງພໍ ແລະກໍບໍ່ມີຫຼັກຖານອັນໃດ ທີ່ວ່າໄວຣັສ ນີ້ຈະແຜ່ລາມໄປຢູ່ໃນສະຫະລັດ ຄືກັນກັບຢູ່ໃນອາເມຣິກາລາຕິນ ແລະເຂດຝັ່ງທະເລ Caribbean ແຕ່ວ່າພວກທ່ານໝໍ ຊຶ່ງຮ່ວມທັງທ່ານ Edward McCabe ຈາກກຸ່ມເດີນຂະບວນປະທ້ວງທີ່ເອີ້ນວ່າ “March of Dimes” ນັ້ນ ພວກເພິ່ນ ບໍ່ຢາກສ່ຽງ.
ທ່ານໝໍ McCabe ກ່າວວ່າ “ຄວາມເປັນຫ່ວງເປັນໃຍຂອງຂ້າພະເຈົ້າ ກໍແມ່ນວ່າຜູ້ຄົນ ຈະບໍ່ພາກັນເລີ້ມກັງວົນກ່ຽວກັບໄວຣັສ Zika ໃນສະຫະລັດ ຈົນກວ່າພວກເຮົາຈະເລີ່ມ ເຫັນພວກເດັກນ້ອຍ ເກີດມາພ້ອມໂຣກຫົວລີບ ແລະການຄອດທີ່ບໍ່ປະສົມປະກອບ ອື່ນໆ.”
ສູນກາງຄວບຄຸມແລະປ້ອງກັນພະຍາດຂອງສະຫະລັດ ແລະອົງການສາທາລະນະສຸກ ປະຈຳລັດທັງຫຼາຍ ໄດ້ພາກັນເອົາເງິນມາຈາກໂຄງການສາທາລະນະສຸກອື່ນໆ ເພື່ອມາ ເປັນທຶນອູ້ມຊູໂຄງການໄວຣັສ Zika. ທ່ານໝໍ Frieden ບໍ່ຢາກເຫັນອັນທີ່ທ່ານເອີ້ນວ່າ ວິກິດ ການໄວຣັສ Zika ເກີດຂຶ້ນ ພາໃຫ້ຊີວິດຜູ້ຄົນຊຸດໂຊມ ໃນເມື່ອຮູ້ດີວ່າ ຈະສາມາດຊ່ອຍຊູ ພວກເຂົາໄວ້ໄດ້...ພຽງແຕ່ວ່າ ຂໍໃຫ້ມີເຄື່ອງຊ່ອຍຊູຊີບກໍພໍ.
