ລິ້ງ ສຳຫລັບເຂົ້າຫາ

logo-print

ວັນ​ທີ 7 ​ເມສາ ​ວັນ​ແຫ່ງ​ສຸຂະພາບ ​ໂລກ ແລະວັນ​ສ້າງຕັ້ງ ອົງການອະນາ​ໄມ​​ໂລກ


ເດັກຊາຍຄົນນຶ່ງ ໄດ້ຮັບການຢອດຢາວັກຊິນ ຕ້ານໂຣກໂປລິໂອ ຈາກພະນັກງານແພດ ໃນຊ່ວງທີ່ມີການປຸກລະດົມ ຕ້ານໂຣກໂລປິໂອ ຢູ່ໃນຄຸ້ມຂອງຄົນມີລາຍຮັບຕໍ່າ ຢູ່ນະຄອນກາຣາຈີ ປາຫິສຖານ ໃນວັນທີ 9 ເມສາ 2018

ວັນ​ທີ 7 ​ເມສາ ​ເປັນ​ວັນ​ຄົບຮອບ 70 ປີ​ ຂອງ​ການສ້າງຕັ້ງອົງການອະນາ​ໄມໂລກ ​
ແລະ​ກໍ​ເປັນ​ວັນ​ສະຫລອງ​ດ້ານ​ສຸຂະພາບ​ຂອງ​ໂລກ​ອີກ​ດ້ວຍ. ນັກ​ຂ່າວວີ​ໂອ​ເອ ​ແຄ​
ໂຣລ ​ເພຍ​ຊັນ (Carol Pearson) ມີ​ລາຍ​ງານ​ກ່ຽວກັບ​ຜົນງານ ​ທີ່​ຍາດມາໄດ້ ຢູ່​ໃນ
7 ທົດ​ສະ​ວັດ​ຜ່ານ​ມາ ​ແລະພາລະ ​ທີ່ຍັງ​ຕ້ອງ​ໄດ້​ສືບຕໍ່​ເຮັດອີກ​ ຊຶ່ງ​ບົວ​ສະຫວັນ ຈະ
​ນໍາ​ລາຍ​ລະອຽດ​ມາສະ​ເໜີທ່ານ​ ໃນ​ອັນ​ດັບ​ຕໍ່​ໄປ.

ອົງການ​ອະນາ​ໄມ​ໂລກ​ໄດ້​ສຸມ​ຄວາມ​ພະຍາຍາມ ໃສ່ການ​ເຮັດ​ໃຫ້​ໂລກ​ປອດຈາກ​ພະພຍາດ ​ທີ່​ເອົາ​ຊີວິດຜູ້​ຄົນ​ໄປ ​ເຊັ່ນ​ໄຂ້ທໍລະພິດ. ອົງການ​ດັ່ງກ່າວ​ ໄດ້​ສ້າງຄວາມ
​ເປັນ​ພາຄີກັນ ກັບພາກສ່ວນ​ອື່ນໆ ​ເພື່ອເຮັດ​ໃຫ້ພະຍາດ​ຕ່າງໆ ຊຶ່ງລວ​ມທັງ​ໂຣກ​
ໂປ​ລິ​ໂອ ຫຼື ໂຣກເປ້ຍລ່ອຍນັ້ນ ​ໃຫ້ດັບ​ສູນ​ໄປນຳ.

ທ່ານ ພີ​ເຕີ ຄຣາວລີ (Perter Crowley) ນັກຊ່ຽວຊານ​ ດ້ານພະຍາດ​ໂປ​ລິ​ໂອ ​ໃຫ້
​ຄໍາ​ເຫັນ​ວ່າ “ພວກ​ເຮົາ​ໃກ້​ຈະ​ກ້າວ​ໄປ​ເຖິງ​ຈຸດ​ນັ້ນ​ແລ້ວ. ​ໃກ້​ແລ້ວ. ​99.9 ​ເປີ​ເຊັນ
​ຂອງພະຍາດ​ໂປ​ລິ​ໂອ ​ໄດ້​ຖືກ​ກໍາຈັດ​ໃຫ້ໝົດ​ໄປ​ຈາກ​ໂລກ​ແລ້ວ.”

ທ່ານ​ກ່າວ​ເຊັ່ນ​ນັ້ນ​ຢູ່​ໃນ​ປີ 2014. ນັບ​ແຕ່​ນັ້ນມາ ພະນັກງານ​ຕໍ່ສູ້​ກັບພະຍາດ​ໂປ​ລິ​ໂອ
ກໍໄດ້​ເພີ້ມຄວາມ​ພະຍາຍາມ​ຂອງ​ພວກ​ເຂົາ​ເຈົ້າ ​ເຖິງ​ແມ່ນ​ວ່າ​ ຈະ​ມີ​ການ​ສູ້​ລົບຂັດ​ແຍ້​ງ
ກັນ ​ແລະມີ​ຄວາມ​ຫຍຸ້ງຍາກ​ລໍາ​ບາກ​ກໍ​ຕາ​ມ. ​ໃນ​ປີ​ກາຍ​ນີ້ ມີເດັກນ້ອຍພຽງແຕ່ 17 ​ຄົນ
ທີ່​ຕິດ​ເຊື້ອ​ໄວຣັສ​ໂປ​ລິ​ໂອ, ​ແຕ່​ວ່າ ພະຍາດ​ໂປ​ລິ​ໂອຈະ​ຖືກ​ດັບ​ສູນ​ໃຫ້ໝົດ​ໄປ ກໍ​ຕໍ່​ເມື່ອ
​ບໍ່ມີ​ເດັກນ້ອຍຄົນ​ໃດ​ເປັນພະຍາດ​ນີ້ອີກ.

ການ​ທີ່​ສາມາດເຂົ້າ​ເຖິງ​ຢາ​ປ້ອງ​ກັນ​ພະຍາດ ຫລືວັກ​ຊິນທີ່​ຊ່ວຍ​ກູ້​ຊີວິດ​ຂອງ​ຄົນ​ໄວ້​ໄດ້,
​ບໍ່​ແມ່ນ​ພຽງ​ແຕ່​ປ້ອງ​ກັນ​ພະຍາດ​ໂປ​ລິ​ໂອ​ເທົ່າ​ນັ້ນ, ​ແຕ່​ຍັງ​ເຂົ້າ​ເຖິງຢາປ້ອງ​ກັນພະຍາດ
ຕຸ່ມໝາກສຸກ ໝາກໃສ ​ແລະ​ເຊື້ອ​ໄວຣັສ​ອື່ນໆ ຫລາຍ​ຢ່າງ ອີກ​ດ້ວຍ ​ແມ່ນ​ເປັນ​ບັນຫາ​ສໍາລັບ​ຫລາຍ​ຄົນ. ​ເພາະສະນັ້ນ ອົງການ​ອະນາ​ໄມ​ໂລກ ​ຈຶ່ງໄດ້​ປະກາດຄໍາ​ຂວັນ ​ສໍາລັບວັນ​ແຫ່ງສຸຂະພາບ​ຂອງ​ໂລກປີນີ້ວ່າ “ການ​ດູ​ແລສຸຂະພາບ​ສໍາລັບ​ທຸກ​ຄົນ”.

ທ່ານ​ເຈັມສ ຟິສເຈີໂຣລດ໌ (James Fitzgerald) ຈາກອົງການວ່າດ້ວຍສຸຂະພາບ
ຂອງອາເມຣິກັນແພນ (Pan American Health Organization) ເວົ້າວ່າ "ຄົນ
ສ່ວນຫລາຍໃນໂລກທຸກມື້ນີ້ ພາກັນເວົ້າ ກ່ຽວກັບ ການຄຸ້ມຄອງສຸຂະພາບທົ່ວໄປ.
ມັນເປັນວຽກງານ ທີ່ຫຍຸ້ງຍາກ ລະດັບໂລກອັນ ນຶ່ງ ຂອງພວກເຮົາອີ່ຫລີ."

ທ່ານ​ເຈັມສຟິສເຈີໂຣລດ໌ (James Fitzgerald) ຮັບຜິດຊອບການພັດທະນາການ
ຄຸ້ມຄອງດ້ານສຸຂະພາບທົ່ວ​ໄປຢູ່ໃນບັນດາປະເທດໃນທະວີບອາເມຣິກາ ຢູ່ອົງການ ວ່າດ້ວຍສຸຂະພາບຂອງອາເມຣິກັນແພນ (Pan American Health Organization) ຊຶ່ງເປັນພະແນກນຶ່ງຂອງອົງການອະນາໄມໂລກ ປະຈໍາພາກພື້ນ ຊຶ່ງທ່ານກ່າວເພີ້ມ
ອີກວ່າ “ອຸປະສັກທີ່ເຮັດໃຫ້ຄົນບໍ່ສາມາດເຂົ້າເຖິງການດູແລສຸຂະພາບໄດ້ ກໍຄືກັນ
ກັບອຸປະສັກທີ່ພວກເຮົາໄດ້ພົບເຫັນຢູ່ໃນດ້ານອື່ນໆ: ມັນມີລັກສະນະທາງ​ດ້ານ​
ພູມີສາດ-- ມັນຂາດສະຖາບັນດ້ານການດູແລະສຸຂະພາບ. ອຸບປະສັກ​ເຫລົ່ານີ້ ມີ
​ລັກສະນະທີ່ພວກເຮົາເອີ້ນວ່າ ​ເປັນແບບສະຖາບັນ, ຫລືກ່ຽວຂ້ອງກັບລະບົບການ​ດູ​
ແລ​ສຸຂະພາບ, ເຊັ່ນເວລາທີ່ໃຊ້ໃນການລໍຖ້າ, ການຂາດທ່ານໝໍ, ຂາດພະຍາບານ
ແລະອື່ນໆ. ມັນມີລັກສະນະທາງການເງິນຢູ່​ບ່ອນ​ວ່າ ມັນຕັ້ງບໍ່ມີ​ເງິນ​ພຽງພໍ​ທີ່​ຈະເອົາ​
ມາ​ໃຊ້ຈ່າຍ​ເຂົ້າ​ໃນ​ລະບົບອີກດ້ວຍ, ສະນັ້ນ ຄົນເຮົາຕ້ອງ​ໄດ້​ຈົກ​ເງິນ​ອອກ​ຈາກ​ຖົງ
​ຕົນ​ເອງມາ​ຈ່າຍ, ​ແລະ​ຈາກ​ນັ້ນ ກໍ​ຍັງ​ມີ​ບັນຫາ​ທີ່​ກ່ຽວຂ້ອງ​ກັບ​ການ​ຈໍາ​ແນ​ກທາງ​ດ້ານ​
ສັງຄົມຢູ່​ພາຍໃນ​ລະບົບດູ​ແລ​ສຸຂະພາບ​ອີກ​ດ້ວຍ.”

ມັນເປັນ​ລໍາດັບຄວາມ​ພະຍາຍາ​ມ​ສູງທີ່​ຈະ​ເຫັນ​ໄດ້ວ່າ​ປະຊາຊົນເຄິ່ງ​ໂລກ​ທີ່​ບໍ່​ໄດ້ຮັບ
ການ​ບໍລິການດ້ານ​ສາທາລະນະ​ສຸກ ສາມາດ​ໄດ້​ຮັບ​ໃນ​ສິ່ງ​ທີ່​ພວກ​ເຂົາ​ເຈົ້າຕ້ອງການ
​ໂດຍ​ປາດ​ສະ​ຈາກການ​ພັກ​ດັນ​ຄອບຄົວ​ຂອງ​ພວກ​ເຂົາ​ເຈົ້າ​ໄປ​ຫາ​ຄວາມທຸກ​ຈົນ ​ຍ້ອນ
​ເອົາ​ເງິນ​ມາ​ຈ່າຍ​ຄ່າ​ປິ່ນປົວ. ອົງການ​ອະນາ​ໄມ​ໂລກ​ໃຫ້​ເຫດຜົນ​ວ່າ ​ເມື່ອ​ຄົນ​ສາມາດ
​ເຂົ້າ​ເຖິງການ​ດູ​ແລ​ສຸຂະພາບ​ໄດ້, ພວກ​ເຂົາ​ເຈົ້າ ຈະດໍາລົງ​ຊີວິດ​ຢ່າງ​ມີ​ປະສິດທິພາບ,
ການລະບາດ​ຂອງ​ໂລກ ​ອາດ​ຈະ​ຖືກ​ສະກັດ​ກັ້ນ​ໄດ້​ງ່າຍ​ຂຶ້ນ ​ແລະ​ປະ​ເທດ​ຕ່າງໆ ກໍ​ຈະ
​ມີ​ຄວາມ​ຈະ​ເລີ​ນຂຶ້ນຫລາຍ​ກວ່າ​ເກົ່າ.

ອ່ານ​ຂ່າວ​ນີ້​ເພີ້ມ​ເປັນ​ພາສາ​ອັງ​ກິດ

XS
SM
MD
LG