ບົດລາຍງານຂອງອົງການອະນາໄມໂລກເວົ້າວ່າ ພຽງແຕ່ໂຣກມະເຮັງ ຢ່າງດຽວນັ້ນ ກໍເອົາ
ຊີວິດຄົນໄປ 7 ລ້ານ 6 ແສນຄົນແລ້ວໃນແຕ່ລະປີ ຊຶ່ງເປັນຈໍານວນທີ່ຫລາຍກວ່າ ພວກຄົນ ທີ່ເສຍຊີວິດຍ້ອນໂຣກເອດສ໌, ໄຂ້ມາເລເຣຍ ແລະໂຣກປອດແຫ້ງ ໂຮມກັນ. ໃນຂະນະທີ່
ພວກພະຍາດ ທີ່ຕິດຕໍ່ກັນໄດ້ນັ້ນ ໄດ້ຮັບຄວາມສົນໃຈຫລາຍທີ່ສຸດຢູ່ໃນບັນດາປະເທດພວມ
ພັດທະນາ ລາຍງານຂອງອົງການອະນາໄມໂລກໃຫ້ຂໍ້ສັງເກດວ່າ ພະຍາດທີ່ບໍ່ຕິດແປດ
ຊຶ່ງເປັນພະຍາດຊໍ້າເຮື້ອນັ້ນ ແມ່ນເປັນສາເຫດທີ່ພາໃຫ້ຄົນຕາຍຫລາຍທີ່ສຸດ ຢູ່ໃນທົ່ວໂລກ.
ທ່ານ ອາລາ ອາລວານ(Ala Alwan) ຜູ້ອໍານວຍການຊ່ວຍດ້ານພະຍາດບໍ່ຕິດແປດ ທີ່ອົງ
ການອະນາໄມໂລກ ຊຶ່ງເປັນຜູ້ນຶ່ງທີ່ຮ່ວມຂຽນບົດລາຍງານນີ້ ເວົ້າວ່າ:
"ໃນຈໍານວນການຕາຍ 58 ລ້ານລາຍ ທີ່ເກີດຂຶ້ນໃນແຕ່ລະປີຢູ່ໃນໂລກນີ້, 35
ລ້ານລາຍແມ່ນມີສາເຫດມາຈາກພະຍາດທີ່ບໍ່ຕິດຕໍ່ກັນ ເຊ່ນພະຍາດຫົວໃຈ, ລົມ
ສາລະບາດ, ໂຣກເບົາຫວານ, ໂຣກມະເຮັງ ແລະພະຍາດປອດຊໍ້າເຮື້ອ ຊຶ່ງກວມ
ເອົາ 60% ຂອງການຕາຍທັງໝົດຢູ່ໃນທົ່ວໂລກນີ້ ແລະໃນນັ້ນແມ່ນມີຢ່າງໜ້ອຍ
9 ລ້ານຄົນທີ່ກໍາລັງຈະຕາຍ ກ່ອນຮອດ ອາຍຸ 60 ປີ ຍ້ອນພວກພະຍາດບໍ່ຕິດຕໍ່."
ອີງຕາມອົງການອະນາໄມໂລກ ສາເຫດນໍາໜ້າໝູ່ທີ່ພາໃຫ້ເປັນພະຍາດຊໍ້າເຮື້ອນັ້ນ ແມ່ນ
ໄດ້ແກ່ຄວາມດັນເລືອດສູງ, ນໍ້າຕານໃນເລືອດສູງ, ການສູບຢາ, ການບໍ່ອອກກໍາລັງກາຍ
ຫລື ຄວາມອ້ວນພີຈົນເກີນໄປ.
ຄລິກບ່ອນນີ້ ເພື່ອເບິ່ງວີດີໂອພາສາລາວ ຫລືຄລິກບ່ອນ mp4 ຫລື wmv ຂ້າງເທິງຂວາມື
ຄ່າໃຊ້ຈ່າຍຫລາຍໆພັນລ້ານໂດລາ ສໍາລັບການປິ່ນປົວພະຍາດຊໍ້າເຮື້ອເຫລົ່ານີ້ ໄດ້ຜັກດັນ ໃຫ້ຫລາຍໆລ້ານຄົນຢູ່ໃນໂລກພວມພັດທະນາ ຕົກຢູ່ໃນຄວາມທຸກຈົນ.
ທ່ານ ເດວິດ ບລູມ (David
Bloom) ທີ່ໂຮງຮຽນສາທາລະ
ນະສຸກຂອງມະຫາວິທະຍາໄລ
ຮາເວີດ (Harvard Univ.)
ເວົ້າວ່າ ພາລະແບກຫາບຕໍ່ມະ
ນຸດແລະເສດຖະກິດຂອງພວກ
ພະຍາດທີ່ບໍ່ຕິດຕໍ່ກັນນັ້ນ ແມ່ນ
ໃຫຍ່ມະຫາສານ.
"ພວກເຮົາຄາດຄະເນວ່າ
ຄ່າໃຊ້ຈ່າຍສໍາລັບປິ່ນປົວຄົນເປັນໂຣກມະເຮັງ ທີ່ໄດ້ຮັບການວິນິດໄສໃໝ່ໆ
ແມ່ນມີຫລາຍກວ່າ 300 ພັນລ້ານໂດລາ ໃນປີ 2010 ແລະນັ້ນແມ່ນເປັນຄ່າ
ໃຊ້ຈ່າຍໃນລະດັບໂລກ. ພວກເຮົາຍັງຄາດຄະເນອີກວ່າຄ່າໃຊ້ຈ່າຍປະຈໍາປີ
ໃນທົ່ວໂລກ ສໍາລັບການເຈັບປ່ວຍ ທີ່ເກີດຈາກພະຍາດປອດຕີບຕັນແມ່ນຢູ່
ໃນລະດັບ 400 ພັນ ລ້ານໂດລາ ໃນປີ 2010. "
ທາງດ້ານ ດຣ. ເຈມສ໌ ຮັອສປີດາເລສ (James Hospedales) ຊ່ຽວຊານດ້ານພະຍາດ ຊໍ້າເຮື້ອຂອງອົງການອະນາໄມໂລກ ກໍເວົ້າວ່າ ບັນຫານີ້ແມ່ນແຜ່ລາມອອກໄປຫລາຍກວ່າ
ທີ່ຫລາຍໆຄົນຮູ້ກັນ ຄືບໍ່ພຽງແຕ່ມີຢູ່ໃນປະເທດໃຫຍ່ໆເຊ່ນ ສະຫະລັດ, ອິນເດຍ ແລະຈີນ
ເທົ່ານັ້ນ ແຕ່ມັນຍັງເປັນບັນຫາຢູ່ໃນປະເທດນ້ອຍໆກວ່າອີກດ້ວຍ ເຊ່ນ ປະເທດທຣິນີດາດ
ແລະໂຕບາໂກ ((Trinidad andTobago) ແລະ ບາບາໂດສ (Barbados). ຢູ່ໃນບັນດາ
ປະເທດເຫລົ່ານີ້, ຄ່າໃຊ້ຈ່າຍ ໃນດ້ານສາທາລະນະສຸກເພື່ອປິ່ນປົວໂຣກຄວາມດັນເລືອດສູງ
ແລະໂຣກເບົາຫວານ ໄດ້ເພີ້ມຂຶ້ນເປັນ ໃນລະຫວ່າງ 5 ຫາ 8 ເປີເຊັນຂອງຜົນຜະລິດລວມ
ພາຍໃນຂອງປະເທດເຫລົ່ານັ້ນ. ດຣ. ຮັອສປີດາເລສ ກ່າວວ່າ:
"ເຮົາຈະປ່ອຍໃຫ້ເປັນແບບນີ້ຕໍ່ໄປບໍ່ໄດ້. ຖ້າວ່າ ຍັງເປັນແບບນີ້ຢູ່ຕໍ່ໄປ ມັນຈະ
ເຮັດໃຫ້ການບໍລິການດ້ານການແພດຢູ່ໃນຫລາຍປະເທດ ມີພາລະອັນໜັກໜ່ວງ.
ພວກເຮົາໄດ້ລໍຖ້າເວລາທີ່ຈະໄດ້ສາມາດຈັດການກັບ ເຊື້ອເອສໄອວີ ກັບໄຂ້ມາ
ເລເຣຍນັ້ນ ບັດນີ້ພວກພະຍາດເຫລົ່ານີ້ແມ່ນເປັນບັນຫາທີ່ພວກເຮົາຕ້ອງແກ້ໄຂ
ດຽວນີ້ແລ້ວ."
ດຣ. ຮັອສປີດາເລສ ກ່າວວ່າ ພຽງແຕ່ການປ່ຽນແປງງ່າຍໆ ໃນລະບົບການກິນອາຫານ
ແລະແບບແຜນດໍາລົງຊີວິດເທົ່ານັ້ນ ກໍຈະສາມາດຊ່ວຍ ໃຫ້ຫລຸດຜ່ອນລົງໄດ້ຢ່າງຫລວງ
ຫລາຍ ພວກສາເຫດຕ່າງໆທີ່ພາໃຫ້ເປັນລົມສາລະບາດ, ໂຣກມະເຮັງ, ໂຣກເບົາຫວານ
ແລະພະຍາດຊໍ້າເຮື້ອທີ່ກ່ຽວຂ້ອງກັບລະບົບຫາຍໃຈ ເຊ່ນ ໂຣກຫືດ ແລະໂຣກຫລອດລົມ
ອັກເສບ. ດຣ. ຮັອສປີດາເລສ ກ່າວຕື່ມວ່າ:
"ພວກເຮົາຄາດຄະເນກັນ ຢູ່ໃນອົງການ WHO ວ່າ ມີຫລາຍກວ່າ 30 ລ້ານ
ຄົນສາມາດຖືກຊ່ວຍຊີວິດໄວ້ໄດ້ ໃນສິບປີຂ້າງໜ້ານີ້ດ້ວຍວິທີການງ່າຍໆ ເຊ່ນ
ລົດລະດັບການກິນເກືອລົງ 15 ຫາ 20 ເປີເຊັນ, ລົດຜ່ອນການສູບຢາລົງແລະ
ເພີ້ມຈໍານວນຄົນ ທີ່ສ່ຽງຕໍ່ການເປັນໂຣກຫົວໃຈວາຍ, ແລະເປັນໂຣກລົມສາລະ
ບາດນັ້ນ ໃຫ້ໄດ້ຮັບການປິ່ນປົວເພື່ອປ້ອງກັນພະຍາດພວກນີ້ ໃຫ້ຫລາຍຂຶ້ນ.
ການໃຊ້ວິທີການ 3 ຢ່າງນີ້ ອາດສາມາດຊ່ວຍຊີວິດຂອງຄົນໄວ້ໄດ້ປະມານ 30
ລ້ານຄົນ ໃນສິບປີຕໍ່ໜ້າ."
ຢູ່ທີ່ກອງປະຊຸມສຸດຍອດຂອງສະຫະປະຊາຊາດກ່ຽວກັບພະຍາດບໍ່ຕິດຕໍ່ນັ້ນ, ພວກຜູ້ນໍາ
ຂອງໂລກໄດ້ຄາດຫວັງທີ່ຈະຍົກລະດັບຄວາມຕື່ນໂຕຂອງປະຊາຊົນ ກ່ຽວກັບຄວາມເສຍ
ຫາຍທີ່ພະຍາດທີ່ບໍ່ຕິດຕໍ່ກັນ ໄດ້ກໍ່ຂຶ້ນ ຢູ່ທົ່ວທັງປະເທດພັດທະນາແລະພວມພັດທະນາ,
ແລະສົນທະນາຫາລືກັນ ກ່ຽວກັບວິທີການທີ່ດີທີ່ສຸດ ເພື່ອຈະຕ່າວປີ້ນການເພີ້ມຂຶ້ນຂອງ
ອັດຕາການຕາຍ ຍ້ອນພວກໂຣກດັ່ງກ່າວນໍາດ້ວຍ.
ເບິ່ງວີດີໂອລາຍງານພາສາອັງກິດ:
