ໃນໄລຍະໆຫລາຍໆອາທິດກ່ອນເຖິງວັນທີ່ 31 ພຶດສະພານັ້ນ ປະເທດອອສເຕຣເລຍໄດ້ເປີດເຜີຍກົດໝາຍຕໍ່ຕ້ານການສູບຢາ ທີ່ເຄ່ງຄັດທີ່ສຸດສະບັບນຶ່ງ. ກົດໝາຍສະບັບດັ່ງກ່າວຫ້າມ ລົງກາຫລືຮູບຍີ້ຫໍ້ຂອງຢາສູບ ພ້ອມທັງຂໍ້ຄວາມໂຄສະນາຢູ່ຕາມຊອງຢາ ແລະລະບຸວ່າ ຊື່ຍີ່ຫໍ້ຄວນຂຽນເປັນຂໍ້ຄວາມແລະໃສ່ສີ ຕາມມາດຕະຖານ.
ລັດຖະມົນຕີກະຊວງສຸຂະພາບແລະຊະລາພາບຂອງອອສເຕຣເລຍ ທ່ານນາງ ນິໂກລາ ຣອ໊ກເຊີນ ກ່າວວ່າ ຂໍ້ຫ້າມເຫລົ່ານີ້ຈະຊ່ວຍຫລຸດຜ່ອນຈໍານວນຄົນຕາຍທີ່ພົວພັນກັບການສູບຢານັ້ນລົງໃນແຕ່ລະປີ.
ທ່ານນາງ Roxon ກ່າວວ່າ “ພວກເຮົາຈະເຮັດໃຫ້ແນ່ໃຈວ່າ ໃນອອສເຕຣເລຍນັ້ນ ຈະບໍ່ມີຫົນທາງໃດຫລົງເຫລືອຢູ່ ໃຫ້ພວກບໍລິສັດຢາທັງຫລາຍ ຂາຍແລະຊຸກຍູ້ສົ່ງເສີມຜະລິດຕະພັນຢາຂອງພວກເຂົາເຈົ້າໄດ້ອີກ ໂດຍສະເພາະ ຂາຍໃຫ້ພວກຄົນໜຸ່ມທັງ ຫລາຍນັ້ນ.”
ອີກຫລາຍໆປະເທດ ເຊັ່ນ ເບລຢ້ຽມ ສະເປນ ຈີນ ກໍໄດ້ພາກັນຮ່າງຂໍ້ຫ້າມສູບຢາຢ່າງຈິງຈັງ ເຊ່ນກັນ.
ພວກປະເທດທີ່ກ່າວມານີ້ ເປັນພາກສ່ວນຂອງທ່າອຽງໃນການຕໍ່ຕ້ານຢາ ສູບ ຊຶ່ງໃນທີ່ສຸດ ໄດ້ເຮັດໃຫ້ການສູບຢາຢູ່ໃນທົ່ວໂລກ ບໍ່ມີທ່າອ່ຽງສູງຂຶ້ນ ແລະລົດຕໍ່າລົງຊໍ້າ ຢູ່ໃນບາງປະເທດ ອີງຕາມອົງການອະນາໄມໂລກ ຫລື WHO ຂອງສະຫະປະຊາຊາດ ທີ່ກ່າວວ່າ ສາເຫດສ່ວນໃຫຍ່ ກໍແມ່ນຍ້ອນການຈັດຕັ້ງປະຕິບັດ ສົນທິສັນຍາໂຄງຮ່າງວ່າດ້ວຍການຄວບຄຸມຢາສູບ ຊຶ່ງບັນດາປະເທດສ່ວນໃຫຍ່ຂອງໂລກໄດ້ເປັນພາຄີ ກໍຄືໄດ້ລົງນາມຮັບຮອງເອົານັ້ນ.
ມາດຕະການຕໍ່ຕ້ານການສູບຢາຕ່າງໆ ຄືກັນກັບກົດໝາຍຂອງອອສເຕຣເລຍ ແມ່ນໄດ້ຖືກຮັບຜ່ານເອົາໂດຍພວກລັດຖະບານທັງຫລາຍ ທີ່ປະຕິບັດການ ຢູ່ພາຍໃນກອບຂອງສົນທິສັນຍາ ດັ່ງກ່າວ.
ຄລິກຢູ່ບ່ອນນີ້ ເພື່ອເບິ່ງວີດິໂອເປັນພາສາລາວ
(ຫລືຄລິກຢູ່ບ່ອນ MP4 ຂ້າງເທິງຂວາມື)
Dr. Thomas Frieden ຜູ້ອໍານວຍການສູນກາງຄວບຄຸມແລະປ້ອງກັນພະຍາດຂອງສະຫະລັດ ເຊື່ອວ່າການເອົາບາດກ້າວຂອງລັດຖະບານຈະສາມາດຊ່ວຍຊີວິດຜູ້ຄົນໄວ້ໄດ້ ປະມານ 100 ລ້ານຄົນໃນຫລາຍສິບປີຕໍ່ໜ້າ ແລະຫລາຍກວ່ານັ້ນອີກ ຊຶ່ງທ່ານອະທິບາຍວ່າ:
Dr. Frieden ກ່າວວ່າ “ໂດຍທົ່ວໄປແລ້ວ ການຄວບຄຸມຢາສູບແມ່ນເປັນການກະທໍາໃນ ທາງບວກທີ່ສຸດ ສໍາລັບເສດຖະກິດຂອງປະເທດ ຄືຈະມີຄົນເປັນໂຣກລົມສາລະບາດ ຫົວໃຈວາຍ ໂຣກມະເຮັງ ແລະພິການໜ້ອຍລົງອີກ.”
ສົນທິສັນຍາໂຄງຮ່າງວ່າດ້ວຍການຄວບຄຸມຢາສູບຂອງອົງການອະນາໄມໂລກ ຫລື WHO ນັ້ນ ໄດ້ມີຜົນບັງຄັບໃຊ້ໃນປີ 2005 ໂດຍມີ 170 ກວ່າປະເທດໄດ້ໃຫ້ສັດຕະຍາບັນ.
ອີງຕາມອົງການອະນາໄມໂລກ ການສູບຢາຢູ່ໃນອອສເຕຣເລຍ ນໍຣ໌ເວ ແລະແມ໊ກຊິໂກ ໄດ້ຕົກຕໍ່າລົງຫ້າເປີເຊັນ ນັບຕັ້ງແຕ່ມີສົນທິສັນຍາສະບັບນີ້ຂຶ້ນມາ. ຜົນສໍາເລັດຢູ່ໃນປະເທດ ຢູຣຸກວາຍ ແຮ່ງດີກ່ວານັ້ນຫລາຍ.
ດຣ Thomas Frieden ກ່າວວ່າ “ສິ່ງທີ່ພາໃຫ້ໄດ້ຜົນໃນການຄວບຄຸມຢາສູບນັ້ນ ແມ່ນແຈ້ງຂາວຫລາຍ ຊຶ່ງກໍຄື ພາສີຢາສູບ ສະພາບແວດລ້ອມທີ່ປອດການສູບຢາ ການໂຄສະນາຕໍ່ຕ້ານຢາສູບຢ່າງໜັກ ແລະລົບລ້າງການຊຸກຍູ້ສົ່ງເສີມການໃຊ້ແລະຈໍານ່າຍຢາ ຊຶ່ງທັງສີ່ຢ່າງນີ້ ສາມາດສ້າງຄວາມແຕກຕ່າງຢ່າງໃຫຍ່ຫລວງໄດ້. ໂຕຢ່າງ ປະເທດ Uruguay ທີ່ໄດ້ນໍາໃຊ້ມາດຕະການເຫລົ່ານັ້ນ ໄດ້ເຫັນການສູບຢາລົດຕໍ່າລົງ 25 ເປີເຊັນ ໃນພຽງສອງປີເທົ່ານັ້ນ.”
ຢ່າງໃດກໍຕາມ ພວກນັກຊ່ຽວຊານເຫັນພ້ອມກັນວ່າ ຍັງມີອີກຫລາຍຢ່າງ ທີ່ຈະຕ້ອງໄດ້ປະຕິບັດເພີ່ມຕື່ມ.
ຕົວຢ່າງໃນປະເທດຈີນ ລາຍງານໃໝ່ໂດຍພວກຊ່ຽວຊານດ້ານສາທາລະ ນະສຸກທໍານາຍວ່າ ການສູບຢາຈະເອົາຊີວິດຜູ້ຄົນໄປຈໍານວນ 3 ລ້ານ 5 ແສນຄົນໃນຈີນແຕ່ລະປີ ໃນໄລຍະ 25 ປີຕໍ່ໜ້າ ຊຶ່ງແມ່ນເກືອບສາມເທົ່າ ຕົວ ຂອງຈໍານວນໃນປັດຈຸບັນ.
ດຣ Frieden ກ່າວໃນທີ່ສຸດວ່າ: “ຄວາມຈິງທີ່ໜ້າເສົ້າໃຈນັ້ນ ກໍແມ່ນວ່າ ປະຊາຊົນຈີນປະມານ 100 ລ້ານຄົນ ທີ່ສູບຢາຢູ່ໃນເວລານີ້ ຈະເສຍຊີວິດແຕ່ຍັງໜຸ່ມຍ້ອນ ການສູບຢາ. ດັ່ງນັ້ນ ຈີນແມ່ນຫາກໍເລີ່ມຕື່ນຕົວ ຕໍ່ສິ່ງທ້າທາຍອັນຍິ່ງໃຫຍ່ ຕໍ່ສັງຄົມ ທີ່ມາຈາກການສູບຢານັ້ນ.”
ໃນເດືອນພຶດສະພາຜ່ານມານີ້ ກະຊວງສາທາລະນະສຸກຂອງຈີນໄດ້ເລີ່ມ ບັງຄັບໃຊ້ກົດໝາຍຫ້າມສູບຢາ ຢູ່ຕາມສະຖານທີ່ສາທາລະນະແລ້ວ.
ອົງການອະນາໄມໂລກກ່າວວ່າ ສະເພາະໃນປີນີ້ ຢາສູບຈະເອົາຊີວິດຜູ້ຄົນໄປເກືອບ 6 ລ້ານຄົນຢູ່ໃນທົ່ວໂລກ ໂຮມທັງຫລາຍກວ່າ 600,000 ຄົນ ທີ່ຈະເສຍຊີວິດ ຍ້ອນກິ່ນຢາຈາກຄົນໃກ້ຄຽງທີ່ສູບຢານັ້ນ.
ເບິ່ງວີດິໂອພາສາອັງກິດ
