ທຸລະກິດໂທລະສັບມືຖື ແມ່ນຈະເລີນເຕີບໂຕຫຼາຍໃນບັນດາປະເທດທີ່ກໍາລັງພັດ ທະນາ. ໂຕຢ່າງ ໃນ Zimbabwe ສະຖິຕິຂອງທາງການສະແດງໃຫ້ເຫັນວ່າເກືອບ 50% ຂອງປະຊາກອນ ແມ່ນມີໂທລະສັບມືຖືໃຊ້ ຊຶ່ງແມ່ນເພີ້ມຂຶ້ນຈາກ ພຽງແຕ່ 7% ເມື່ອສອງປີກ່ອນໜ້ານີ້. ທ່ານ David Alyward ຊື່ງເປັນຜູ້ອໍານວຍການຂອງກຸ່ມສົ່ງເສີມນາໆຊາດ ທີ່ເອີ້ນວ່າ mHealth Alliance ນັ້ນ ກ່າວວ່າ ໃນໄລຍະ 5 ປີທີ່ຜ່ານມານີ້ ການນໍາໃຊ້ໂທລະສັບໄຮ້ສາຍ ກໍຄືໂທລະສັລມືຖື ແມ່ນໄດ້ລະເບີດຂຶ້ນຢູ່ໃນບັນດາປະເທດທີ່ກໍລັງພັດທະນາ.
ອົງການ mHealth Alliance ແລະກຸ່ມອົງການອື່ນໆທັງຫຼາຍ ໄດ້ມອງໂທລະສັບມືຖືແລະເທັກໂນໂລຈີເຄື່ອນທີ່ນີ້ ວ່າເປັນພະຫະນະຫຼືຫົນທາງໃນການປັບປຸງສຸຂະພາບໃຫ້ດີຂຶ້ນ ຢູ່ໃນສະຖານທີ່ຕ່າງໆ ບ່ອນທີ່ພວກຜູ້ຄົນບໍ່ມີທາງ ຫລືບໍ່ສາມາດເຂົ້າໄປຮັບການປິ່ນປົວຮັກສາພະຍາບານໄດ້ງ່າຍນັ້ນ. ໃນລະດັບພື້ນຖານຫລືລະດັບທີ່ງ່າຍໆທີ່ສຸດ ກໍແມ່ນວ່າ ໂທລະດັບມືຖື ຊ່ອຍໃຫ້ພວກພະນັກງານສາທາລະນະສຸກ ສາມາດຕິດຕໍ່ກັບສຸກສາລາ, ພວກທ່ານໝໍ ແລະພະນັກງານຄົນອື່ນໆ ໃນຂະແໜງດຽວກັນ ເພື່ອຂໍຄໍາແນະນໍາກ່ຽວກັບວິທີຮັກສາພວກຜູ້ປ່ວຍ ໃຫ້ດີທີສຸດ.
ໃນປີ 2009 ພວກນັກສຶກສາທີ່ມະຫາວິທະຍາໄລ Stanford ໃນລັດຄາລີຟໍເນຍ ໄດ້ພາ ກັນເກັບກໍາເອົາໂທລະສັບມືຖືເກົ່າ ໄປແລກກັບໂທລະສັບໃໝ່ ເພື່ອເອົາໄປມອບໃຫ້ພວກພະນັກງານສາທາລະນະສຸກ ໃນບັນດາປະເທດທີ່ພວມພັດທະນາ. Nadim Mahmud ເປັນຜູ້ຮ່ວມກໍ່ຕັ້ງ FrontlineSMS-Medic ຊຶ່ງເປັນອົງການທີ່ກໍາເນີດມາຈາກຄວາມພະຍາຍາມດັ່ງກ່າວນັ້ນ.
“ພວກເຮົາຫວັງທີວ່າຈະຊ່ອຍຊີວິດຫຼາຍໆຄົນ. ພວກເຮົາຫວັງທີ່ຈະເຮັດໃຫ້ ພວກສຸກສາລາທັງຫລາຍ ດໍາເນີນງານຢ່າງມີປະສິດທິຜົນ ແລະ ພວກເຮົາກໍຫັວງ ທີ່ຈະເຮັດໃຫ້ຊີວິດຂອງພວກພະນັກງານສາທາລະນະສຸກໃນຊຸມຊົນຫລືປະຊາຄົມຕ່າງໆ ສະດວກສະບາຍ ງ່າຍຂຶ້ນ ແລະມີປະສິດທິຜົນຫລາຍຂຶ້ນ.”
ໃນບັນດາປະເທດພວມພັດທະນາສ່ວນໃຫຍ່ນັ້ນ ການເກັບກໍາບັນທຶກຂໍ້ມູນຕ່າງໆນັ້ນແມ່ນຍັງໃຊ້ວິທີຂຽນ ຫລື ຈົດເອົາດ້ວຍມືຢູ່ ແລະເມື່ອມີເທັກໂນໂລຈີເຄື່ອນທີ່ ຄືໂທລະສັບມືຖືນັ້ນ ກໍແມ່ນວ່າ ການເກັບກໍາຂໍ້ມູນບັນທຶກຕ່າງໆນັ້ນ ຫໍຈະສາມາດສົ່ງໄປຫາສູນກາງໄດ້ງ່າຍຂຶ້ນ ຊຶ່ງທ່ານ David Alyward ແຫ່ງອົງການ mHealth Alliance ອະທິບາຍວ່າ:
“ພວກຜູ້ຄົນແມ່ນຈະສາມາດເຂົ້າຫາຂໍ້ມູນໄດ້ຢ່າງໄວວາທັນໃຈ ໂດຍມີການທໍາຄວາມຜິດພາດໜ້ອຍລົງ ແລະແລກປ່ຽນຂໍ້ມູນກັນກັບຄົນອື່ນໆໄດ້ຢ່າງງ່າຍດາຍ ຊຶ່ງເຂົາເຈົ້າເຮັດບໍ່ໄດ້ໃນເມື່ອກ່ອນ.”
ທ່ານ Alyward ກ່າວຕໍ່ໄປວ່າ ໃນຂະນະທີ່ໂທລະສັບເຄື່ອນທີ່ ຫລືມືຖື ກາຍມາເປັນຄືກັນກັບເຄື່ອງຄອມພິວເຕີເຄື່ອນທີ່ ຫລື laptop ຫລາຍຂຶ້ນເລື້ອຍໆນັ້ນ ພວກພະນັກງານສາທາລະນະສຸກ ກໍຈະສາມາດສົ່ງ Video ຂໍ້ຄວາມ ແລະຂໍ້ມູນຕ່າງໆ ໄປໃຫ້ທາງສຸກສາລາແລະພວກທ່ານໝໍ ເພື່ອຂໍຄວາມຊ່ວຍເຫລືອ ໃນການຮັກສາພະຍາບານ ຊຶ່ງທ່ານ Alyward ກ່າວວ່າ:
“ສິ່ງທີ່ພວກເຮົາຈະເຫັນໃນໄວໆນີ້ ກໍຄືວ່າ ອຸບປະກອນກວດສຸຂະພາບທາງໄກບາງຊະນິດ ຕົວຢ່າງເຊັ່ນ: ເຄື່ອງວັດອຸນນະພູມຂອງຮ່າງກາຍ, ເຄື່ອງກວດຄວາມດັນຂອງເລືອດ, ເຄື່ອງກວດຫລືຟັງເບິ່ງທາຣົກໃນທ້ອງ, ເຄື່ອງຟັງຫົວໃຈ, ຫລືກ້ອງຈຸນລະທັດ ເປັນຕົ້ນ ທີ່ຊ່ວຍໃຫ້ສາມາດກວດໄດ້ ໂດຍບໍ່ຈໍາເປັນທີ່ຈະຕ້ອງມີສຸກສາລາ ຫລືທ່ານໝໍຢູ່ນໍາ.”
ທ່ານ Alyward ກ່າວໃນທີ່ສຸດວ່າ ເທັກໂນໂລຈີເຄື່ອນທີ່ສາມາດຊ່ອຍໃຫ້ບັນລຸເປົ້າໝາຍສະຫັດສະວັດຂອງອົງການສະຫະປະຊາຊາດ ໃນການທີ່ຈະຊ່ອຍຊີວິດຜູ້ຄົນໃຫ້ໄດ້ຫຼາຍທີ່ສຸດ ແລະລົດອັດຕາການຕາຍຂອງແມ່ແລະເດັກ ໃຫ້ໜ້ອຍລົງນັ້ນ.
