ໜັງສືເປີດຊອງ ທີ່ເຊັນໂດຍນັກຊ່ຽວຊານການແພດ 150 ຄົນ ຮຽກຮ້ອງໃຫ້ເລື່ອນຫຼືຍ້າຍ ການແຂ່ງຂັນກິລາ Olympic ຊຶ່ງຈະມີຂຶ້ນທີ່ນະຄອນ Rio de Janeiro ເພາະວ່າ ຍ້ອນ ເກີດການລະບາດເຊື້ອໄວຣັສ Zika.
ພວກທີ່ເຊັນຊື່ ຊຶ່ງຮວມທັງບັນດານັກຊ່ຽວຊານ ຈາກຫລາຍກວ່າຊາວປະເທດທີ່ປະຕິບັດ ງານກ່ຽວກັບດ້ານຕ່າງໆຮວມທັງສາທາລະນະສຸກ ຢາປົວພະຍາດ ແລະນັກວິຊາການ ກ່າວໃນວັນສຸກມື້ວານນີ້ວ່າ ການຈັດໃຫ້ມີການແຂ່ງຂັນດັ່ງ ກ່າວຈະເປັນ “ການຂາດຄວາມຮັບຜິດຊອບ” ແລະ “ບໍ່ມີສິນທຳ.” ຮວມຢູ່ໃນບັນດາຜູ້ທີ່ເຊັນຊື່ ກໍມີອະດີດທີ່ປຶກສາ ດ້ານວິ ທະຍາສາດ ປະຈຳທຳນຽບຂາວ Dr. Phillip Rubin.
ໝັງສືນີ້ກ່າວວ່າ “ສາຍພັນຂອງເຊື້ອໄວຣັສ Zika ຢູ່ບຣາຊິລ ເປັນໄພອັນຕະ ລາຍຕໍ່ສຸຂະ ພາບ ທີ່ວິທະຍາສາດຍັງບໍ່ເຄີຍສັງເກດເຫັນມາກ່ອນ.”
ເຊື້ອໄວຣັສນີ້ໄດ້ພົວພັນກັບການເກີດທີ່ບໍ່ສົມປະກອບ ຮວມທັງ microcephaly ທີ່ພວກ ເດັກນ້ອຍເກີດມາມີຫົວລີບ ແລະສະໝອງນ້ອຍຜິດປົກກະຕິ. ອົງການອະນາໄມໂລກ ຫລື WHO ກ່າວວ່າ ພວກແມ່ຍິງຖືພາ ຕ້ອງຫລີກລ່ຽງບັນດາເຂດທີ່ເກີດການແຜ່ລະບາດຂອງ ເຊື້ອໄວຣັສ Zika ຮວມທັງການແຂ່ງຂັນກິລາ Olympic ທີ່ນະຄອນ Rio de Janeiro.
ພວກທີ່ເຊັນຊື່ໃນໜັງສືກ່າວວ່າ “ການສ່ຽງທີ່ບໍ່ມີຄວາມຈຳເປັນ ເວລາຊາວຕ່າງ ປະເທດ 500,000 ຄົນ ທີ່ມາຈາກທົ່ວໂລກ ພາກັນໄປເບິ່ງການແຂ່ງຂັນ ອາດ ມີໂອກາດທີ່ຈະຕິດ ເຊື້ອພະຍາດດັ່ງກ່າວ ແລະກັບບ້ານເຮືອນບ່ອນທີ່ມັນສາມາດແຜ່ລະບາດຢູ່ໃນທ້ອງຖິ່ນ ໄດ້. ຖ້າຫາກມັນເກີດຂຶ້ນຢູ່ບ່ອນທຸກຈົນ ແລະບ່ອນທີ່ຍັງບໍ່ທັນໄດ້ຮັບຜົນກະທົບເທື່ອ ດັ່ງ ໂຕຢ່າງ ໃນເຂດເອເຊຍໃຕ້ ແລະອາຟຣິກາເກືອບທັງໝົດ ຄວາມທຸກທໍລະມານສາມາດ ເປັນທີ່ຮ້າຍແຮງໄດ້.”
ຢູ່ໃນແນວຄິດທີ່ກົງກັນຂ້າມນັ້ນ ຫົວໜ້າສູນກາງຄວບຄຸມແລະປ້ອງກັນພະຍາດ ສະຫະ ລັດ Dr. Tom Frieden ກ່າວວ່າ ບໍ່ມີເຫດຜົນໃນດ້ານສາທາລະນະສຸກ ໃດໆທີ່ຈະຍົກ ເລີກຫຼືເລື່ອນການແຂ່ງຂັນກິລາ Olympic. ທ່ານກ່າວວ່າ ຄວາມ ກັງວົນກ່ຽວກັບການສ່ຽງຕໍ່ການຕິດເຊື້ອໄວຣັສ Zika ແລະ Olympic ອາດຈະເກີນກວ່າເຫດຜົນ. ແທນທີ່ຈະພະ ຍາຍາມ “ຢຸດຊາວໂລກເພາະວ່າເຮົາຢາກຢຸດເຊົາ" ທ່ານ Frieden ກ່າວວ່າ “ມາພາກັນ ເອົາບາດກ້າວ ທີ່ເຮັດໃຫ້ຫລາຍເທົ່າທີ່ຄວນເພື່ອເຮັດໃຫ້ໂລກເຮົາມີຄວາມປອດໄພເທົ່າທີ່ ເປັນໄປໄດ້ສຳລັບທຸກໆຄົນ.”