ການເຊື່ອມໂຍງກັນລະຫວ່າງສານໄຂມັນສູງແລະໂຣກຫົວໃຈວາຍ ບໍ່ແມ່ນເລື້ອງໃໝ່. ແຕ່ການສຶກສາຄົ້ນຄວ້າຄັ້ງໃໝ່ໃນລະດັບທົ່ວໂລກ ແມ່ນເປັນສິ່ງຕັກເຕືອນອີກອັນນຶ່ງກ່ຽວກັບການລະບາດທີ່ຂະຫຍາຍໃຫຍ່ອອກນັບມື້ ຂອງລະດັບສານໄຂມັນຫລື cholesterol ສູງ ທີ່ບໍ່ໄດ້ຮັບການປິ່ນປົວ ຊຶ່ງສາມາດພາໃຫ້ເກີດພະຍາດທີ່ກ່ຽວກັບຫົວໃຈ ແລະເສ້ນເລືອດໃນຫົວໃຈໄດ້.
ການຄົ້ນຄ້ວາດັ່ງກ່າວໄດ້ສຶກສາ ຜູ້ຄົນຈໍານວນ 147 ລ້ານຄົນ ແລະພົບເຫັນວ່າ ອັດຕາຂອງລະດັບສານໄຂມັນສູງ ກໍາລັງເພີ່ມຂຶ້ນນັບມື້ຢູ່ ໃນທົ່ວໂລກ. ພວກນັກຄົ້ນຄວ້າກ່າວວ່າ ສິ່ງທີ່ພາໃຫ້ເປັນຫ່ວງຍິ່ງໄປກວ່ານັ້ນ ກໍຄືວ່າ ພວກຄົນເຈັບຫລືຄົນປ່ວຍເຫລົ່ານີ້ຫລາຍຄົນ ບໍ່ໄດ້ຮັບການປິ່ນປົວ.
ຍົກໂຕຢ່າງໃນຍີ່ປຸ່ນ 53 ສ່ວນຮ້ອຍຂອງພວກທີ່ນາຍໝໍ
ກວດພົບວ່າ ມີລະດັບສານໄຂມັນສູງນັ້ນ ບໍ່ໄດ້ຮັບການ
ປິ່ນປົວ ໃນຂະນະທີ່ ຢູ່ປະເທດໄທ 78 ສ່ວນຮ້ອຍຂອງ
ພວກທີ່ຖືກສໍາຫລວດ ບໍ່ເຄີຍໄດ້ໄປຫາໝໍກວດຈັກເທື່ອເລີຍ.
ບັນດານັກຊ່ຽວຊານພາກັນກ່າວເນ້ນເຖິງສາເຫດພື້ນຖານຕື່ມອີກ ຊຶ່ງ Dr. Chelsea Kidwell ຜູ້ອໍານວຍການ Georgetown Stroke Center ຫລືສູນກາງໂຣກລົມສາລະບາດ Georgetown ທີ່ກຸງວໍຊິງຕັນ ກ່າວຊີ້ແຈງວ່າ:
"ຂະນະທີ່ພວກປະເທດພວມພັດທະນາ ຮັບເອົາວິຖີຊີວິດ ແລະການກິນອາຫານ ແບບຕາເວັນຕົກນັ້ນ ລະດັບ Cholesterol ກໍຈະເພີ່ມສູງຂຶ້ນ ເພາະສະນັ້ນ ຜູ້ຄົນຈະຕ້ອງເຂົ້າໃຈວ່າ ການມີລະດັບ Cholesterol ທີ່ສູງນັ້ນ ແມ່ນເປັນ ປັດໄຈສ່ຽງທີ່ສູງ ຕໍ່ການເປັນໂຣກລົມສາລະບາດ ແລະໂຣກຫົວໃຈ."
ໄຂມັນໃນເລືອດ ມີສອງຊະນິດ ຄືຊະນິດທີ່ດີແລະບໍ່ດີ. ໄຂມັນທີ່ບໍ່ດີ ທີ່ມີຢູ່ໃນລະດັບສູງນັ້ນ ຈະສະສົມກັນຂຶ້ນກ້າມຕັນເສ້ນເລືອດ ຫລື ທາງເດີນຂອງເລືອດ ຊຶ່ງເຮັດໃຫ້ເລືອດແລ່ນເຂົ້າສູ່ຫົວໃຈຊ້າລົງໄດ້. ຖ້າບໍ່ມີເລືອດ ແລະ oxygen ແລ່ນເຂົ້າຫາຫົວໃຈພຽງພໍ ມັນກໍສາມາດ ເຮັດໃຫ້ເກີດໂຣກຫົວໃຈວາຍໄດ້. ແລະຖ້າໄຂມັນກ້າມຕັນທາງເລືອດທີ່ແລ່ນໄປຫາສະໜອງ ມັນກໍສາມາດພາໃຫ້ເກີດເປັນລົມສາລະບາດ ຫລືເສ້ນເລືອດແຕກໃນສະໝອງ ຫລື ເປັນ stroke ໄດ້.
ການທີ່ມີສານໄຂມັນໃນລະດັບສູງນັ້ນ ມັນຈະບໍ່ສະແດງອາການໃດໆໃຫ້ເຫັນ ຊຶ່ງພາໃຫ້ຄົນ
ສ່ວນຫລາຍບໍ່ຮູ້ເມື່ອໂຕວ່າ ຕົນມີບັນຫາໄຂມັນໃນເລືອດສູງ ຈົນກວ່າເກີດເປັນ stroke ຫລື
ເກີດຫົວໃຈວາຍຂຶ້ນມາ. ດຣ. Kidwell ກ່າວຊີ້ແຈງເຖິງວິທີງ່າຍໆທີ່ພວກເຮົາສາມາດຮູ້ໄດ້ນັ້ນ ວ່າ:
"ການໄປກວດເລືອດງ່າຍໆ ສາມາດບອກໃຫ້ທ່ານຮູ້ໄດ້ ເຖິງລະດັບຂອງ Chol-
esterol ຂອງທ່ານນັ້ນ ແລະພວກເຮົາກໍມີລະດັບເປົ້າໝາຍ ທີ່ພວກເຮົາຮູ້ດີວ່າ
ພາໃຫ້ລົດຜ່ອນຄວາມສ່ຽງຕໍ່ການເປັນໂຣກລົມສາລະບາດແລະໂຣກຫົວໃຈໄດ້
ຕົວຢ່າງ ສໍາລັບໄຂມັນທີ່ບໍ່ດີ ຫລື Bad Cholesterol ນັ້ນ ແມ່ນເຮົາຢາກໃຫ້
ມັນຕໍ່າກ່ວາ 100 ລົງມາ ຊຶ່ງມັນຈະສາມາດລົດການສ່ຽງຕໍ່ການເປັນໂຣກຫົວ
ໃຈວາຍ ຫລືເປັນລົມສາລະບາດໄດ້."
ພະຍາດຫົວໃຈຫລືເສ້ນເລືອດໃນຫົວໃຈ ເອົາຊີວິດຜູ້ຄົນໄປໃນຈໍານວນຫລາຍກວ່າ 17 ລ້ານ
ຄົນໃນແຕ່ລະປີ ແລະອົງການອະນາໄມໂລກກ່າວວ່າ 80 ສ່ວນຮ້ອຍ ຂອງການຕາຍເຫລົ່າ
ນັ້ນ ແມ່ນເກີດຂຶ້ນໃນບັນດາປະເທດກໍາລັງພັດທະນາ.
Dr. Joseph Sabik ຈາກຄລີ
ນິກ Cleveland ກ່າວວ່າ ການ
ສ່ຽງທີ່ວ່ານີ້ສາມາດລົດຜ່ອນລົງ
ໄດ້ ໂດຍພຽງແຕ່ທໍາການປ່ຽນ
ແປງວິຖີຊີວິດແບບງ່າຍໆເທົ່ານັ້ນ ຊຶ່ງ Dr. Sabik ຊີ້ແຈງດັ່ງນີ້:
“ຖ້າທ່ານເປັນຄົນທີ່ມີນໍ້າໜັກຫລາຍເກີນໄປທ່ານກໍຈະຕ້ອງລົດນໍ້າໜັກລົງ. ຖ້າທ່ານມັກນັ່ງຢູ່ບ່ອນເກົ່າຫລືບໍ່ເໜັງຕີງ ທ່ານກໍຕ້ອງອອກກໍາລັງກາຍ.
ຖ້າທ່ານມີຄອບຄົວ ທີ່ມີປະ
ຫວັດບໍ່ດີ ໃນດ້ານເປັນພະ
ຍາດຕ່າງໆເຫລົ່ານີ້ ທ່ານກໍ
ມີເຊື້ອກໍາມະພັນທີ່ຈະເປັນ
ແບບດຽວກັນ. ສະນັ້ນ ທ່ານ
ຈະຕ້ອງທໍາການປ່ຽນແປງ ຢ່າງຂະຫຍັນຂັນແຂງ ເພື່ອຮັກໂຕທ່ານເອງ.”
ການປ່ຽນແປງວິຖີຊີວິດ ອາດຈະບໍ່ເປັນປະໂຫຍດແກ່ໝົດສູ່ຄົນ. ວິທີການຮັກສາດ້ວຍຢຸກຢາ
ອາດຈະກາຍເປັນສິ່ງຈໍາເປັນ ສໍາລັບພວກຜູ້ຄົນທີ່ມີສານໄຂມັນສູງຫລາຍໂພດ.
ແຕ່ Dr. Kidwell ກ່າວວ່າ ການຮັກສາດ້ວຍຢຸກຢານັ້ນ ອາດຈະບໍ່ສາມາດເຮັດໄດ້ສໍາລັບ ຫລາຍຄົນ.
"ໃນທົ່ວໂລກແລ້ວ ໂດຍສະເພາະ ໃນບັນດາປະເທດພວມພັດທະນາບາງປະເທດ ພວກຢາເຫຼົ່ານີ້ ແມ່ນຈະມີລາຄາເເພງ ແລະພວກປະຊາຊົນທໍາມະດາສາມັນ ກໍຄົງຈະບໍ່ສາມາດຊື້ກິນໄດ້ ແລະມັນກໍໄດ້ເປັນບັນຫາຊໍ້າເຮື້ອໄປແລ້ວ ທີ່ທາງປະຊາ
ຄົມຮັກສາສຸຂະພາບ ຈະຕ້ອງໄດ້ຫາທາງແກ້ໄຂ."
ບັນດານັກຊ່ຽວຊານດ້ານສຸຂະພາບໃນທົ່ວໂລກກ່າວວ່າ ພ້ອມກັບການກວດເລືອດເບິ່ງລະດັບ
ໄຂມັນແລະການປິ່ນປົວທີ່ດີຂຶ້ນ ພວກຜູ້ຄົນທີ່ມີບັນຫານໍາໄຂມັນສູງນັ້ນ ຄວນຈະກິນອາຫານ
ທີ່ໃສ່ເກືອໜ້ອຍລົງ ກິນອາຫານທີ່ມີນໍ້າມັນນັ້ນໜ້ອຍລົງ ແລະຫລີກເວ້ນການສູບຢາ. ພວກ
ນັກຊ່ຽວຊານເຊື່ອວ່າ ບາດກ້າວເຫລົ່ານີ້ສາມາດຊ່ອຍຍັບຍັ້ງຄື້ນຟອງ ທີ່ພວມເພີ່ມສູງຂຶ້ນ
ເລື້ອຍໆຂອງລະດັບສານໄຂມັນ ຢູ່ໃນທົ່ວໂລກນັ້ນໄດ້.
