ຈຳນວນຜູ້ເສຍຊີວິດໃນໄຟໄໝ້ປ່າ ຢູ່ລັດຮາວາຍ (Hawaii) ໄດ້ເພີ່ມຂຶ້ນເປັນ 99 ຄົນ ແລະອາດຈະເພີ່ມຂຶ້ນເປັນສອງເທົ່າໃນອີກ 10 ມື້ຂ້າງໜ້າ, ຜູ້ປົກຄອງລັດ ກ່າວໃນວັນຈັນວານນີ້ ໃນຂະນະທີ່ເຈົ້າໜ້າທີ່ສຸກເສີນໄດ້ພະຍາຍາມສຳຫຼວດພື້ນທີ່ ທີ່ຖືກເຜົາໄໝ້ດ້ວຍຄວາມອົດທົນ ເພື່ອຊອກຫາຊາກສົບມະນຸດເພີ່ມຕື່ມ ອີງຕາມລາຍງານຂອງອົງການຂ່າວ AFP.
ເຫດການໄຟໄໝ້ປ່າຢູ່ເກາະມາວອີ (Maui) ໃນອາທິດແລ້ວນີ້ ແມ່ນໄຟໄໝ້ປ່າ ທີ່ເຮັດໃຫ້ມີຜູ້ເສຍຊີວິດຫຼາຍທີ່ສຸດໃນຮອບນຶ່ງສັດຕະວັດ ຂອງສະຫະລັດ, ໂດຍມາເຖິງປັດຈຸບັນນີ້ ມີພຽງ 1/4 ຂອງຊາກຫັກພັງຂອງເມືອງ ລາຮາຍນາ (Lahaina) ທີ່ຖືກທຳລາຍ ໄດ້ມີການຄົ້ນຫາຜູ້ເຄາະຮ້າຍ.
ຜູ້ປົກຄອງລັດ ທ່ານຈອຊ ກຣີນ (Josh Green) ກ່າວວ່າ ຜູ້ເສຍຊີວິດແມ່ນເພີ່ມຂຶ້ນແນ່ນອນ, ເນື່ອງຈາກວ່າໜ່ວຍກູ້ໄພສຸກເສີນພ້ອມກັບໝາຊອກຫາຊາກສົບ ຕ້ອງຍັງຄົງສືບຕໍ່ເຮັດພາລະກິດຂອງພວກເຂົາຢູ່ເຮືອນຫຼາຍຮ້ອຍຫຼັງແລະຍານພາຫະນະທີ່ຖືກໄຟໄຫມ້.
"ມີຜູ້ເສຍຊີວິດ 99 ຄົນທີ່ໄດ້ຮັບການຢືນຢັນແລ້ວ," ທ່ານກ່າວໃນການຖະແຫຼງຂ່າວ ໃນວັນຈັນວານນີ້.
ທ່ານ ກຣີນ (Green) ໄດ້ບອກກັບ CNN ກ່ອນຫນ້ານີ້ ໂດຍໄດ້ເຕືອນວ່າ, "ໃນໄລຍະ 10 ມື້ຂ້າງຫນ້າ, ຕົວເລກນີ້ອາດເພີ່ມຂຶ້ນເປັນສອງເທົ່າ."
