ລິ້ງ ສຳຫລັບເຂົ້າຫາ

ວັນອາທິດ, 02 ຕຸລາ 2022

ອາຊະຍາກຳຄຽດຊັງ ທີ່ແນເປົ້າໃສ່ຄົນ ອາເມຣິກັນ ເຊື້ອສາຍເອເຊຍ ເພີ່ມຂຶ້ນ 150 ເປີເຊັນ ໃນຕົວເມືອງໃຫຍ່ ຂອງ ສະຫະລັດ


ຜູ້ປະທ້ວງໃສ່ໜ້າກາກ ແລະ ຖືປ້າຍ ເຂົ້າຮ່ວມໃນການຊຸມນຸມເພື່ອປູກຈິດສຳນຶກ ກ່ຽວກັບ ຄວາມຮຸນແຮງຕໍ່ຕ້ານຄົນເອເຊຍ ໃກ້ກັບເມືອງ ຈີນ, ນະຄອນ ລອສ ແອນເຈີລິສ. 20 ກຸມພາ, 2021.

ສະຖິຕິທີ່ຖືກວິເຄາະໃໝ່ ຂອງກົມຕຳຫຼວດໄດ້ສະແດງໃຫ້ເຫັນວ່າ ການໂຈມຕີທີ່ກະຕຸ້ນໂດຍຄວາມຄຽດຊັງຄົນອາເມຣິກັນເຊື້ອສາຍເອເຊຍ ໄດ້ເພີ່ມຂຶ້ນໃນຫຼາຍຕົວເມືອງໃຫຍ່ທົ່ວ ສະຫະລັດ ເມື່ອປີກາຍນີ້, ​ໃນບາງກໍລະນີໄດ້ເພີ່ມຂຶ້ນເຖິງ 3 ເທົ່າ, ເຖິງແມ່ນອາຊະຍາກຳຄວາມຄຽດໂດຍລວມຈະຫຼຸດລົງກໍ່ຕາມ.

ນອກຈາກນັ້ນ, ແນວໂນມທີ່ໜ້າຕົກໃຈດັ່ງກ່າວໄດ້ສືບຕໍ່ມາເຖິງປີນີ້,​ ອີງຕາມການກ່າວຂອງບັນດານັກຊ່ຽວຊານ.

ມັນມີອາຊະຍາກຳຄວາມຄຽດຊັງ ຕໍ່ຕ້ານຄົນອາເມຣິກັນເຊື້ອສາຍເອເຊຍ 122 ເຫດການໃນ 16 ຕົວເມືອງທີ່ມີພົນລະເມືອງໜາແໜ້ນທີ່ສຸດຂອງປະເທດໃນປີ 2020, ເຊິ່ງເພີ່ມຂຶ້ນເກືອບ 150 ເປີ ເຊັນຈາກປີທີ່ຜ່ານມາ, ອີງຕາມຂໍ້ມູນທີ່ຖືກເກັບກຳໂດຍສູນກາງ ເພື່ອການສຶກສາຄວາມຄຽດຊັງ ແລະ ລັດທິຫົວຮຸນແຮງຂອງມະຫາວິທະຍາໄລລັດຄາລິຟໍເນຍ ແລະ ຂໍ້ມູນດັ່ງກ່າວໄດ້ຖືກມອບໃຫ້ ວີໂອເອໂດຍສະເພາະ. ວີໂອເອໄດ້ເກັບກຳຂໍ້ມູນໂດຍອິດສະຫຼະສຳລັບສອງຕົວເມືອງ.

ບັນດາຜູ້ສະໜັບສະໜູນສິດທິຄົນອາເມຣິກັນເຊື້ອສາຍເອເຊຍ ໄດ້ໃຫ້ເຫດຜົນ ກ່ຽວກັບ ການເພີ່ມ ຂຶ້ນຂອງການໂຈມຕີຢ່າງຕໍ່ເນື່ອງທີ່ບໍ່ເຄີຍມີມາກ່ອນໃສ່ຄຳເວົ້າຂອງອະດີດປະທານາທິບໍດີ ສະຫະ ລັດ ທ່ານ ດໍໂນລ ທຣຳ ທີ່ຖິ້ມໂທດໃສ່ ຈີນ ສຳລັບໄວຣັສໂຄໂຣນາທີ່ອັນຕະລາຍ ແລະ ຍິ່ງກວ່ານັ້ນ, ຄົນອາເມຣິກັນເຊື້ອສາຍເອເຊຍໄດ້ເປັນແກະຮັບບາບຍ້ອນປະຊາຊົນທຳມະດາທີ່ອຶດອັດ ຫຼື ໂມໂຫຍ້ອນຜົນກະທົບຕໍ່ເສດຖະກິດ ແລະ ສັງຄົມຂອງໂຣກລະບາດ.

ທ່ານ ຄຣິສ ຄວັອກ (Chirs Kwok), ສະມາຊິກຄະນະກຳມະການຂອງສະມາຄົມທະນາຍຄວາມຄົນອາເມຣິກັນເຊື້ອສາຍເອເຊຍແຫ່ງ ນິວຢອກ ໄດ້ກ່າວວ່າ “ຂ້າພະເຈົ້າຄິດວ່າການນຳພາທາງ ການເມືອງພາຍໃຕ້ທ່ານ ທຣຳ ໄດ້ເຮັດໃຫ້ຄົນທີ່ຖືກຄິດວ່າເປັນຄົນ ຈີນ ຕົກເປັນເປົ້າໝາຍ. ມັນແມ່ນຄວາມຢ້ານຄົນຕ່າງປະເທດ.”

ອາຊະຍາກຳຄຽດຊັງຕໍ່ຕ້ານຄົນເອເຊຍໄດ້ເພີ່ມສູງຂຶ້ນທີ່ສຸດໃນນະຄອນນິວຢອກ, ເຊິ່ງແມ່ນຕົວເມືອງທີ່ໃຫຍ່ທີ່ສຸດຂອງປະເທດ ພ້ອມດ້ວຍຂະໜາດຂອງປະຊາກອນຄົນເອເຊຍທີ່ໃຫຍ່, ບ່ອນທີ່ຕຳຫຼວດໄດ້ສືບສວນສອບສວນ 28 ເຫດການທີ່ຖືກບັນທຶກທີ່ປະກອບມີຜູ້ເຄາະຮ້າຍເປັນຄົນອາເມຣິກັນເຊື້ອສາຍເອເຊຍ, ເຊິ່ງໄດ້ເພີ່ມຂຶ້ນຫຼາຍກວ່າ 9 ເທົ່າຂອງປີ 2019.

ອີກສີ່ຕົວເມືອງຂອງ ອາເມຣິກາ ກໍໄດ້ລາຍງານການເພີ່ມຂຶ້ນຂອງອາຊະຍາກຳ ຄຽດຊັງຕໍ່ຕ້ານຄົນເອເຊຍສາມເທົ່າໄດ້ແກ່: ນະຄອນຟິລາແດລເຟຍ, ຄລີຟແລນ ເຊິ່ງແຕ່ລະເມືອງໄດ້ລາຍງານ 6 ເຫດການ, ເພີ່ມຂຶ້ນຈາກສອງ ໃນປີ 2019, ນະຄອນແຊນໂຮເຊ ມີ 10 ເຫດການ, ເພີ່ມຂຶ້ນຈາກ 4, ໃນຂະນະທີ່ນະຄອນ ລອສ ແອນເຈີລິສ ໄດ້ລາຍງານ 15 ເຫດການ, ເພີ່ມຂຶ້ນຈາກ 7.

ອ່ານຂ່າວນີ້ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG