ລິ້ງ ສຳຫລັບເຂົ້າຫາ

logo-print

ທ. ​ຮາ​ຣ​ວີ ວາຍ​ສ​ຕີນ ຖືກ​ສາ​ຕັດ​ສິນວ່າ ມີ​ຄວາມຜິດ ໃນ​ຄະ​ດີຟ້ອງ​ຮ້ອງທາງ​ເພດ ທ່າມ​ກາງ ຂະ​ບວນ​ການ #MeToo


ທ່ານ​ຮາ​ຣ​ວີ ວາຍ​ສ​ຕີນ ເດີນ​ທາງ​ໄປ​ຮອດ ສານ​ເມືອງ​ແມນ​ແຮດ​ທັນ ​ສຳ​ລັບ ການ​ດຳ​ເນີນຄະ​ດີ​​ຂົ່ມ​ຂື່ນ ​ໃນ​ນະ​ຄອນ​ນິວຢອກ, ​ວັນ​ສຸກ ທີ 14 ກຸມ​ພາ 2020. (AP Photo/Seth Wenig)

ທ່ານ​ຮາ​ຣ​ວີ ວາຍ​ສ​ຕີນ ໄດ້​ຖືກ​ສານ​ພົບ​ເຫັນ​ວ່າ​ມີ​ວາມ​ຜິດ​ໃນ​ຖານລວນ​ລາມທາງ​ເພດ ໂດຍ​ເປັນ​ການສິ້ນ​ສຸດ​ໃນຄວາມ​ຕົກ​ຕ່ຳຂອງ​ອະ​ດີດເຈົ້າ​ພໍ່​ໃນ​ວົງ​ການ​ຮໍ​ລີ​ວູດ ແລະ ເປັນ​ໄຊ​ຊະ​ນະ​ຂອງ​ຂະ​ບວນ​ການ #MeToo ​ທີ່​ຕໍ່​ຕ້ານ​ການ​ກົດ​ຂີ່​ຂົ່ມ​ເຫັງ​ຕໍ່​ແມ່​ຍິງ.

ທ່ານ​ຮາ​ຣ​ວີ ວາຍ​ສ​ຕີນ ອາ​ຍຸ 67 ປີ ໄດ້​ຖືກ​ສານ​ຕັດ​ສິນ​ວ່າ​ມີ​ຄວາມຜິດ ຢູ່ນະ​ຄອນ​ນິວຢອກ ​ໃນ​ ຖານ​ຂົ່ມ​ຂືນ​ຂັ້ນ​ທີ​ສາມ ແລະ​ອາ​ຊະ​ຍາ​ກຳ​ຮ້າຍ​ແຮງທີ່​ເປັນການ​ກະ​ທຳ​ທາງ​ເພດ​ຂັ້ນ​ທີ​ນຶ່ງ. ຜູ້​ກ່ຽວບໍ່​ມີ​ຄວາມ​ຜິດ ຕໍ່​ຂໍ້​ຫາ​ທີ່​ຮ້າຍ​ແຮງ​ທີ່​ສຸດ ກໍຄື​ການ​ເປັນ​ນັກ​ລ່າທຳ​ຮ້າຍ​ທາງ​ເພດ​. ແລະ​ຜູ້​ກ່ຽວ​ຈະ​ປະ​ເຊີນ​ກັບ​ໂທດ​ຈຳ​ຄຸກ ເຖິງ 25 ປີ.

ທະ​ນາຍ​ຄວາມ​ຂອງນະ​ຄອນນິວຢອກ ທ່ານ ຊາຍ ແວນ​ສ໌ ໄດ້​ກ່າວ​ວ່​າ “ທ່ານ​ຮາ​ຣ​ວີ ວາຍ​ສ​ຕີນ ໃນ​ທີ່​ສຸດ​ກໍ​ໄດ້​ນຳ​ມາ​ຮັບ​ຜິດ​ຊອບ ສຳ​ລັບ​ອາ​ຊະ​ຍາ​ກຳ ທີ່​ລາວ​ໄດ້​ກະ​ທຳ​ລົງ​ໄປ.” ທ່ານ​ກ່າວ​ຕື່​ມ​ວ່າ “ທ່ານ​ວາຍ​ສ​ຕີນ ເປັນຜູ້​ໂຫດ​ຮ້າຍ ເປັນ​ນັກ​ລ່າ​ທາງ​ເພດຕໍ່​ເນື່ອງ ຜູ້​ທີ່​ໃຊ້​ອຳ​ນາດ​ຂອງ​ລາວ​ເພື່ອ​ຂົ່ມ​ຂູ່ ຂົ່ມ​ຂືນ ທຳ​ຮ້າຍຫຼອກ ​ລວງ ເຮັດ​ໃຫ້​ເສຍ​ໜ້າ ແລະ​ປິດ​ປາກ​ພວກ​ຜູ້​ເຄາະ​ຮ້າຍ​ຂອງ​ລາວ.”

ແມ່​ຍິງ ເກືອບ 80 ຄົນ ໄດ້​ກ່າວ​ຫາ ທ່ານ​ວາຍ​ສ​ຕີນ ໃນ​ພຶດ​ຕິ​ກຳ​ທາງ​ເພ​ດ​ທີ່ບໍ່​ຖືກ​ຕ້ອງ. ຂໍ້​ກ່າວ​ຫາ​ຕ່າງໆ​ນາໆ ແມ່ນ​ຢູ່​ໃນ​ໃຈ​ກາງ​ຂອງ​ຂະ​ບວນ​ການ #MeToo ທີ່​ໄດ້​ເປັນ​ແຮງ​ບັນ​ດານ​ໃຈ​ເຮັດ​ໃຫ້​ພວກ​ແມ່​ຍິງ​ທັງຫຼາຍ ​ພາ​ກັນອອກ​ມາ​ແຈ້ງ​ຂໍ້​ກ່າວ​ຫາ​ຕໍ່​ຜູ້​ທີ່​ໃນ​ຄັ້ງ​ນຶ່ງເປັນ​ເຈົ້າ​ພໍ່​ທີ່​ມີ​ອຳ​ນາດຫຼາຍ​ທີ່​ສຸດ ຢ່າງ​ເປີ​ດ​ເຜີຍ.

ທ່ານ​ວາຍ​ສ​ຕີນ ຜູ້​ທີ່​ໄດ້​ປະ​ຕິ​ເສດ​ຕໍ່​ຂໍ້​ກ່າວ​ຫາ​ທັງ​ໝົດນັ້ນ ໄດ້​ຖືກ​ສານ​ຕັດ​ສິນ​ວ່າ​ຜິດ ໃນ​ການ​ທຳ​ຮ້າຍ​ທາງ​ເພດ ຕໍ່ອະ​ດີດ​ຜູ້​ຊ່ອຍໃນ​ການ​ຜະ​ລິດ​ຮູບ​ເງົາ ທ່ານ​ນາງ ມີ​ມີ ເຮ​ລີ​ຢີ ໃນ​ປີ 2006 ແລະ​ການ​ຂົ່ມ​ຂືນ ທ່ານ​ນາງ ເຈັ​ສ​ສິ​ກາ ແມນ​ນ໌ ​ຜູ້​ທີ່​ໄຝ່​ຝັນຢາກ​ຈະ​ເປັນນັກ​ສະ​ແດງ ໃນ​ປີ 2013.

ຜູ້​ກ່າວ​ຫາ​ທ່ານ​ວາຍ​ສ​ຕີນ​ອີກ​ຄົນ​ນຶ່ງ ທ່ານ​ນາງ ແອນ​ນາ​ແບ​ລາ ຊີ​ໂອ​ຣາ ນັກ​ສະ​ແດງ​ໃນ​ເລື້ອງໂຊ​ປ​ຣາ​ໂນ​ສ໌ ​ໄດ້​ກ່າວ​ຕໍ່​ຄະ​ນະ​ຕຸ​ລາ​ການ​ວ່າ ທ່ານ​ວາຍ​ສ​ຕີນ ໄດ້​ຂົ່ມ​ຂືນ​ລາວ ໃນຄືນ​ນຶ່ງ​ຢູ່​ເຮືອນ​ພັກ​ເປັນ​ອາ​ພາດ​ມັນ ​ໃນ​ກາງ​ຊ່ວງ​ປີ 1990. ເຖິງ​ຢ່າງ​ໃດ​ກໍ​ຕາມ ຂໍ້​ກ່າວ​ຫາຂອງ​ນາງ ແມ່ນ​ຜ່ານ​ມາ​ດົນ​ນານ​ແລ້ວ ທີ່​ຈະ​ແຈ້ງ​ໂທດ​ໃນ​ຄະ​ດີ​ອາ​ຍາ​ຕ່າງ​ຫາກ​ໄດ້ ແຕ່ບັນ​ດາ​ໄອ​ຍະ​ການ ກໍ​ສາ​ມາດ​ໃຊ້​ມັນ​ມາ​ສະ​ແດງ​ໃຫ້​ເຫັນ​ວ່າ ທ່ານ​ວາຍ​ສ​ຕີນ ເປັນ​ຜູ້​ຮ້າຍ​ທາງ​ເພດ ​ຊ້ຳ​ແລ້ວ​ຊ້ຳ​ອີກ.

ຫຼັງ​ຈາກ​ຫ້າ​ວັນ ໃນ​ການພິ​ນິ​ໄສຫຼັກ​ຖານ​ຕ່າງໆ​ແລ້ວ ອະ​ດີດ​ຜູ້​ຜະ​ລິດ​ຮູບ​ເງົາ​ຮໍ​ລີ​ວູດ ໄດ້​ຖືກ​ສານ​ພົບ​ເຫັນ​ວ່າ ມີ​ຄວາມ​ຜິດທາງ​ອາ​ຍາຂອງພຶດ​ຕິ​ກຳ​ທາງ​ເພດ ສຳ​ລັບ​ການ​ທຳ​ຮ້າຍ​ຕໍ່​ທ່ານ​ນາງ ເຮ​ລີ​ຢີ ແລະ ການ​ຂົ່ມ​ຂືນ​ຂັ້ນ​ທີ​ສາມ ຕໍ່​ທ່ານ​ນາງ ແມນ​ນ໌. ທ່ານ​ວາຍ​ສ​ຕີນ ໄດ້​ຖືກ​ພົບ​ວ່າ ມີ​ຄວາມ​ຜິດ ໃນ​ຖານ​ເປັນ​ນັກ​ລ່າ​ທຳ​ຮ້າຍ​ທາງ​ເພດ ຊຶ່ງ​ເປັນ​ຂໍ້​ກ່າວ​ຫາ​ທາງ​ອາ​ຍາ​ທີ່​ຮ້າຍ​ແຮງ ທີ່​ອາດ​ຈະ​ເຮັດ​ໃຫ້​ຜູ້​ກ່ຽວ​ຕິດ​ຄຸກ​ຕະຫຼອດ​ຊີ​ວິດ.

ອ່ານດ່າວນີ້​ຕື່ມ ເປັນ​ພາ​ສາ​ອັງ​ກິດ

XS
SM
MD
LG