ໜັງສືພິມສະບັບນຶ່ງ ຂອງທາງການຫວຽດນາມ ໄດ້ກ່າວຫາ
ປະເທດໄທວ່າ ລະເມີດກົດໝາຍສາກົນ ເວລາຕຳຫຼວດນຳ້
ຂອງໄທ ຫວ່າງມໍ່ໆມານີ້ ໄດ້ຍິງຊາວປະມົງຫວຽດນາມສາມ
ຄົນ ແລະເຮັດໃຫ້ນຶ່ງຄົນເສຍຊີວິດ.
ໜັງສືພິມ Nhan Dan ທາງອິນເຕີແນັດຂອງທາງການ ກ່າວ
ວ່າ ເຫດຮ້າຍໃນອາທິດແລ້ວນີ້ ໄດ້ເກີດຂື້ນຢູ່ເຂດນ່ານນຳ້ທີ່
ກວມກັນລະຫວ່າງ ມາເລເຊຍ ຫວຽດນາມ ແລະໄທ.
ລາຍງານກ່າວເພີ້ມເຕີມວ່າ ບັນດາເຮືອຫາປາຫວຽດນາມໄດ້
ພາກັນຫລົບໜີ ໃນຂະນະທີ່ເຮືອຕຳຫລວດໄທ ແລ່ນເຂົ້າໄປ
ໃກ້ໆໂດຍປະກາດຜ່ານທາງວິທະຍຸວ່າ “ເຮືອຫາປາຫວຽດນາມຢຸດ ຖ້າບໍ່ຢຸດ ພວກເຮົາຈະ
ຍິງພວກເຈົ້າໃຫ້ຕາຍ.”
ການສືບສວນຂອງຫວຽດນາມໄດ້ລົງຄວາມເຫັນວ່າ ຕຳຫລວດໄທ “ໄດ້ລະເມີດກົດໝາຍ
ຫວຽດນາມ ແລະສາກົນ” ແລະໄດ້ສະເໜີໃຫ້ແກ້ໄຂບັນຫານີ້ໃນລະດັບການທູດ.
ໃນການໃຫ້ສຳພາດກັບ ວີໂອເອ ພາກພາສາຫວຽດນາມ ໃນວັນພະຫັດວານນີ້ ປະທານ
ສະມາຄົມຫາປາຫວຽດນາມ ທ່ານ Le Thanh Luu ກ່າວວ່າ ກຸ່ມຂອງລາວຈະຮຽກຮ້ອງ
ໃຫ້ລັດຖະບານຮາໂນ່ຍ ຮ້ອງຂໍຜ່ານໄປຍັງໄທ ເພື່ອໃຫ້ ໄທສືບສວນຢ່າງລະອຽດ ແລະ
ໃຊ້ຄ່າເສຍຫາຍໃຫ້ແກ່ຊາວປະມົງແລະຄອບຄົວຂອງເຂົາເຈົ້າ.
ທ່ານ Le Thanh Luu ກ່າວວ່າ “ບໍ່ວ່າມັນເກີດຂື້ນຢູ່ແຫ່ງຫົນໃດການຍິງຊາວປະມົງ ທີ່ບໍ່
ຕິດອາວຸດ ໃຫ້ເຖິງແກ່ຄວາມຕາຍ ແມ່ນບໍ່ມີຄວາມເປັນມະນຸດ ແລະຮັບເອົາບໍ່ໄດ້. ທ່ານບໍ່
ສາມາດກ່າວວ່າ ເປັນການປ້ອງກັນໂຕຫລືແນວໃດແນວນຶ່ງ. ພວກເຮົາຂໍປະນາມຢ່າງແຮງ
ຕໍ່ພຶດຕິການດັ່ງກ່າວ.”
ແຕ່ອົງການຂ່າວຣອຍເຕີ ໄດ້ອ້າງຄຳເວົ້າຂອງເຈົ້າໜ້າທີ່ຕຳຫລວດຂັ້ນສູງຂອງໄທຄົນນຶ່ງ
ວ່າ ການຍິງຊາວປະມົງຫວຽດນາມນີ້ແມ່ນເປັນການປ້ອງກັນໂຕ.
