ພວກຫົວຮຸນແຮງປາແລສໄຕນ໌ ໄດ້ເລີ້ມຍິງຈະຫຼວດ ຈາກເຂດ
ກາຊາ ເຂົ້າໃສ່ອິສຣາແອລຄືນອີກ ແລະພວກເຮືອບິນລົບໄອພົ່ນ
ຂອງອິສຣາແອລ ກໍຕອບໂຕ້ດ້ວຍການໂຈມຕີທາງອາກາດໃນ
ເຊົ້າວັນສຸກມື້ນີ້ ໃນຂະນະທີ່ການຢຸດຍິງຢ່າງເປັນທາງການ ເປັນ
ເວລາ 3 ມື້ ໝົດອາຍຸລົງ.
ກອງທັບອິສຣາແອລ ກ່າວຜ່ານທາງ Twitter ວ່າ ໄດ້ມີການຍິງ
ຈະຫຼວດມາຈາກເຂດກາຊາ ຢ່າງໜ້ອຍ 19 ລູກ ຫຼັງຈາກການ
ຢຸດຍິງໝົດອາຍຸລົງ ໃນເວລາ 8:00 ໂມງເຊົ້າ ຕາມເວລາໃນທ້ອງ
ຖິ່ນ ແລະກ່າວຕື່ມວ່າ ຈະຫຼວດ 4 ລູກຖືກສະກັດກັ້ນໄວ້ ຢູ່ເໜືອ
4 ຫົວເມືອງໃນພາກໃຕ້ຂອງອິສຣາແອລ ໃນຂະນະທີ່ຈະຫຼວດລູກອື່ນໆໄດ້ຕົກລົງໃສ່ຂົງເຂດ
ທີ່ເປົ່າຫວ່າງບໍ່ມີຜູ້ຄົນອາໄສຢູ່. ບໍ່ມີລາຍງານແຈ້ງໃຫ້ຊາບກ່ຽວກັບຜູ້ບາດເຈັບ ຫຼືຄວາມເສຍ
ຫາຍໃດໆ.
ອິສຣາແອລໄດ້ທຳການໂຈມຕີ ເປັນເວລາປະມານ 3 ຊົ່ວໂມງ ແຕ່ໂຄສົກກອງທັບ ທ່ານ
Peter Lerner ໄດ້ຢືນຢັນໃນເວລາຕໍ່ມາວ່າ ໄດ້ມີການໂຈມຕີທາງອາກາດໃສ່ “ໂຄ່ງ
ລ່າງພື້ນຖານຂອງພວກກໍ່ການຮ້າຍ” ໃນເຂດກາຊາ. ນາຍົກລັດຖະມົນຕີອິສຣາແອລ
ທ່ານ Benjamin Netanyahu ປະຕິຍານວ່າ ຈະມີການຕອບໂຕ້“ຢ່າງແຂງແຮງ” ຕໍ່
ການຍິງຈະຫຼວດເຫຼົ່ານັ້ນ.
ກຸ່ມຮາມັສ ຊຶ່ງຄວບຄຸມເຂດກາຊາ ກ່າວວ່າ ຕົນບໍ່ສາມາດບັນລຸຂໍ້ຕົກລົງ ເພື່ອຕໍ່ການ
ຢຸດຍິງອອກໄປອີກນັ້ນໄດ້ ໃນລະຫວ່າງການເຈລະຈາກັນໂດຍທາງອ້ອມກັບຝ່າຍອິສ
ຣາແອລ ທີ່ນະຄອນຫຼວງໄຄໂຣນັ້ນ. ກຸ່ມອິສລາມດັ່ງກ່າວເວົ້າວ່າ ຕົນຈະສືບຕໍ່ທຳການເຈລະຈາຕໍ່ໄປ ເຖິງແມ່ນທັງສອງຝ່າຍບໍ່ປາກົດວ່າ ໃກ້ຈະຕົກລົງກັນໄດ້ກໍຕາມ.
ກຸ່ມຮາມັສກ່າວວ່າ ອິສຣາແອລບໍ່ໄດ້ຕົກລົງ ຕໍ່ຂໍ້ຮຽກຮ້ອງໃດໆຂອງຕົນ ຊຶ່ງຮວມທັງການ
ຍົກເລີກການປິດລ້ອມ ທີ່ໄດ້ບີບຮັດເສດຖະກິດຂອງເຂດກາຊາ ແລະຂັດຂວາງ ບໍ່ໃຫ້
ພວກປາແລສໄຕນ໌ໄດ້ອອກຈາກເຂດແຄມທະເລ ທີ່ປິດລ້ອມໄວ້ນັ້ນ.
