ປະຊາຊົນເຮຕີໄດ້ເລີ້ມພາກັນອອກໄປປ່ອນບັດແລ້ວໃນວັນອາທິດມື້ນີ້ ໃນການເລືອກຕັ້ງປະທານາທິບໍດີຮອບສອງ ທີ່ມີການຄາດຫວັງກັນໄວ້ ລ່ວງໜ້າຢ່າງສູງ ທ່າມກາງຄວາມເປັນຫ່ວງກັງວົນກ່ຽວກັບການກັບຄືນມາປະເທດ ຂອງອະດີດຜູ້ນໍາປະເທດຄົນນຶ່ງ ຈາກການລີ້ໄພຢູ່ຕ່າງປະເທດ.
ອະດີດສັດຕີໝາຍເລກ 1 Mirande Manigat ແລະທ່ານ Michel Martelly ນັກສະແດງທີ່ຜູ້ຄົນນິຍົມ ກໍາລັງແຂ່ງຂັນໃນການເລືອກຕັ້ງຮອບສອງເພື່ອຍາດເອົາຕໍາແໜ່ງໜ້າທີ່ ໃນການສ້າງສາຄືນໃໝ່ປະເທດຊາດ ທີ່ໄດ້ປະສົບກັບຄວາມທຸກຈົນ ແລະໂຄງລ່າງພື້ນຖານປະເທດໄດ້ຮັບຄວາມເສຍຫາຍຢ່າງໜັກຈາກໄພແຜ່ນດິນໄຫວແລະການລະບາດຂອງໂຣກອາຫິວານັ້ນ.
ພວກນາໆຊາດທີ່ບໍລິຈາກເງິນຊ່ອຍເຫລືອ ກໍາລັງພາກັນລໍຖ້າເບິ່ງລັດຖະບານໃໝ່ ກ່ອນທີ່ພວກເຂົາເຈົ້າຈະປ່ອຍເງິນຊ່ອຍເຫລືອຫລາຍພັນຕື້ໂດລາ ສໍາລັບການຊ່ອຍເຫລືອເຮຕີ ສ້າງສາປະເທດຄືນໃໝ່ນັ້ນ.
ສະຖານະການໄດ້ປະສົບກັບຄວາມຫຍຸ້ງຍາກສັບສົນເວລາອະດີດປະທານາທິບໍດີ Jean Bertrand Aristide ໄດ້ເດີນທາງກັບຄືນເມືອໃນສັບປະດາຜ່ານມາຈາກການໄປລີ້ໄພໃນຕ່າງປະເທດ ເຖິງແມ່ນສະຫະລັດໄດ້ທໍາຄວາມພະຍາຍາມມາຫລາຍຄັ້ງ ເພື່ອໃຫ້ທ່ານເລື່ອນເວລາໃນການກັບຄືນເມືອປະເທດຂອງທ່ານ ໃຫ້ເປັນຫລັງຈາກການເລືອກຕັ້ງປະທານາທິບໍດີຮອບໃໝ່ກໍຕາມ.
ທ່ານ Aristide ໄດ້ໃຫ້ຄໍາໝັ້ນສັນຍາໄວ້ວ່າ ຈະບໍ່ເຂົ້າພົວພັນໃນການເມືອງຂອງເຮຕີ ແຕ່ບໍ່ດົນຫລັງຈາກທີ່ໄປຮອດສະໜາມບິນເມືອງຫລວງ Port–au-Prince ໃນວັນສຸກຜ່ານມານີ້ ທ່ານກໍໄດ້ກ່າວຄັດຄ້ານຕໍ່ການທີ່ຍົກເວ້ນ ບໍ່ໃຫ້ພັກຂອງທ່ານເຂົ້າຮ່ວມໃນການເລືອກຕັ້ງໃນວັນອາທິດມື້ນີ້.
ທ່ານ Aristide ເອີ້ນການຫ້າມບໍ່ໃຫ້ພັກ Fanmi Lavatas ຂອງທ່ານເຂົ້າຮ່ວມໃນການເລືອກຕັ້ງນັ້ນວ່າ ເປັນການກີດກັນສຽງສ່ວນຫລາຍຂອງປະເທດ. ສະພາກໍາກັບການເລືອກຕັ້ງຂອງເຮຕີ ໄດ້ຕັດພັກດັ່ງກ່າວອອກຈາກການເລືອກຕັ້ງ ຍ້ອນເຫດຜົນທາງດ້ານເຕັກນິກ ທີ່ພວກສະໜັບສະໜຸນທ່ານ Aristide ກ່າວວ່າ ບໍ່ເປັນເຫດຜົນທີ່ໜັກແໜ້ນພໍ. ພັກດັ່ງກ່າວບໍ່ໄດ້ຮັບອະນຸຍາດໃຫ້ເຂົ້າຮ່ວມໃນການເລືອກຕັ້ງຮອບທໍາອິດທີ່ເປັນບັນຫາຂັດແຍ່ງກັນທີ່ມີຂຶ້ນໃນເດືອນພະຈິກປີຜ່ານມານັ້ນ.
