ທ່ານ Chuck Hagel ຢ້ຽມຢາມ ປາກິສຖານ

ລັດຖະມົນຕີປ້ອງ​ກັນ​ປະ​ເທດ ສະຫະລັດ ທ່ານ Chuck Hagel
ກໍາລັງ​ຢູ່​ທີ່ປະ​ເທດ​ປາກິສຖານ ​ເພຶ່ອ​ສົນທະນາຫາລື​ກັບ ນາຍົກ
ລັດຖະ ມົນຕີ Nawaz Sharif ​ແລະ​ຜູ້​ບັນຊາ​ການ​ທະຫານ​ຄົນ​
ໃໝ່ ທ່ານ Rahell Sharif.

ການ​ຢ້ຽມຢາມ​ນະຄອນຫລວງ Islamabad ​ໃນ​ວັນ​ຈັນ​ມື້​ນີ້​ຂອງ​
ທ່ານ Hagel ແມ່ນເປັນ​ການ​ເດີນທາງ​ໄປປາ​ກິ​ສຖານ ເທື່ອ​ທໍາ​
ອິດຂອງ​ເຈົ້າ​ໜ້າ​ທີ່​ຂັ້ນ​ສູງ​ສຸດຂອງ​ທໍານຽບ 5 ​ແຈ ໃນ​ໄລຍະ​ຫລາຍ
​ປີ​ຜ່ານ​ມາ.

ລັດຖະມົນຕີປ້ອງ​ກັນ​ປະ​ເທດສະຫະລັດ ມີ​ແຜນ​ທີ່​ຈະ​ສົນທະນາ
ກ່ຽວ​ກັບໄພຂົ່ມຂູ່​ດ້ານ​ຄວາມ​ໝັ້ນຄົງ ​ແລະ​ການປິດ​ກັ້ນ​ເສັ້ນທາງ​ຂົນ​ສົ່ງພັດ​ສະດຸ​ແລະ​ສະບຽງ​
ຂອງ​ NATO ​ເຂົ້າ​ໄປ​ຍັງ ອັຟກາ​ນິສຖານ ທີ່ນໍາພາ​ໂດຍພັກ​ການ​ເມຶອງນຶ່ງ​ຂອງ​ປາ​ກິສຖານ
​ເພື່ອປະ​ທ້ວງສະຫະລັດ ທີ່​ທໍາ​ການໂຈມ​ຕີ​ດ້ວຍ​ເຮືອບິນ​ບໍ່​ມີ​ຄົນ​ຂັບ ຕ້ານ​ພວກ​ຫົວຮຸນ​ແຮງ​ໃນ
ດິນ​ແດນ​ຂອງປາ​ກິ​ສຖານນັ້ນ. ການ​ໂຈມ​ຕີ​ໄດ້​ສ້າງ​ຄວາມ​ເຄ່ງ​ຕຶງ​ຢ່າງ​ຮ້າຍ​ແຮງ​ລະຫວ່າງ
ກຸງວໍ​ຊິງ​ຕັນ ​ແລະ​ອິສລາມາ​ບັສ.

ທ່ານ Hagel ​ໄດ້​ໄປ​ຢ້ຽມຢາມ​ອັຟກາ​ນິສຖານ ປະ​ເທດ​ເພື່ອນ​ບ້ານຂອງ​ປາ​ກິ​ສຖານຕັ້ງແຕ່​
ວັນ​ເສົາ​ທີ່​ຜ່ານ​ມາ ຊຶ່ງ​ຢູ່​ທີ່​ນັ້ນ ລັດຖະມົນຕີປ້ອງ​ກັນ​ປະ​ເທດ Bismillah Khan Moham-
med ​ໄດ້ໃຫ້ການຄໍ້າປະກັນ​ແກ່​ທ່ານ​ວ່າ ​ສັນຍາ​ວ່າດ້ວຍຄວາມ​ໝັ້ນຄົງກັບສະຫະລັດ ຈະ
ຖືກ​ເຊັນ​ໃນ​ເວລາ "ອັນ​ເໝາະ​ສົມ" ​ເຖິງ​ແມ່ນ​ວ່າ ປະທານາທິບໍດີອັ​ຟກາ​ນິສຖານ ທ່ານ
Hamid Kazai ມີ​ຄວາມ​ລັງ​ເລ​ໃຈກໍ​ຕາມ.​