ທ່ານ Hagel ຢ້ຽມຊົມ ກໍ່າປັ່ນລົບລຸ້ນໃໝ່ ຂອງສະຫະລັດ ຢູ່ສິງກະໂປ (ວີດິໂອ)

ວັນ​ອາທິດ​ມື້​ນີ້ ທ່ານ Chuck Hagel ລັດຖະມົນຕີ​ປ້ອງ​ກັນ​ປະ​ເທດ​ສະຫະລັດ ໄດ້​ໄປ ຢ້ຽມຊົມ​ກໍ່າ​ປັ່ນ​ລົບ​ລຸ້ນ​ໃໝ່ ​ແລະ​ພົບ​ປະ​ກັບ​ບັນດາ ທະຫານ​ເຮື​ອ​ອາ​ເມຣິກັນ.

ທ່່ານ Hagel ​ໄດ້​ໄປ​ຢ້ຽມຊົມ​ກໍ່າ​ປັ່ນ​ລົບ​ລຸ້ນ​ໃໝ່ ຊື່ USS Freedom ທີ່ມີ ຂະໜາດ​ນ້ອຍ​ລົງ ທີ່​ອອກ​ແບບ​ເພື່ອໃຫ້ສາມາດ​ປະຕິບັດ​ພາລະກິດ​ຫຼາຍໆ​ຢ່າງ​ໄດ້ ຢູ່ໃນ​ນໍ້າ​ຕື້ນ. ກໍ່າ​ປັ່ນ​ລົບ Freedom ກໍາລັງຈອດຢູ່​ຖານ​ທັບ​ເຮືອ Changi ຂອງ​ສິງ​ຄະ​ໂປ ອັນ​ເປັນ​ພາກສ່ວນ​ຂອງ​ການ​ຊ້ອມລົບ​ກັບປະ ເທດ​ຕ່າງໆ​ໃນ​ຂົງ​ເຂດ.

ທ່ານລັດຖະມົນຕີ​ປ້ອງ​ກັນ​ປະ​ເທດ Hagel ກໍາລັງຢູ່ທີ່​ສິງ​ຄະ​ໂປ​ເພື່ອ​ເຂົ້າຮ່ວມ​ກອງ​ປະ ຊຸມ​ດ້ານ​ຄວາມ​ໝັ້ນຄົງ​ປະ​ຈໍາປີ​ກັບບັນດາປະ​ເທດ​ຂົງ​ເຂດ​ເອ ​ເຊຍ.

​ໃນ​ຄໍາ​ປາ​ໄສສໍາຄັນ​ບັ້ນ​ນຶ່ງ​ເມື່ອ​ວັນ​ເສົາ​ວານ​ນີ້ ທີ່​ກອງ​ປະ​ຊຸມ​ດ້ານ​ຄວາມ ໝັ້ນຄົງ​ປະ​ຈໍາ ປີ ທີ່​ເອີ້ນ​ກັນວ່າ ກອງ​ປະຊຸມ​ Shangri-La Dialogue ນັ້ນ ທ່ານ Hagel ​ໄດ້​ເຕືອນ
ຈີນ ​ກ່ຽວ​ກັບ​ການ​ເຈາະເອົາ​ຂໍ້​ມູນ​ທາງອິນ​ເທີ​ເນັດ ​ໂດຍ​ກ່າວ​ວ່າ ການ​ເຈາະບາງ​ຢ່າງ​ນັ້ນ​ປະກົດ​ວ່າ​ ເຊື່ອມ​ໂຍງໄປ​ໃສ່ ລັດຖະບານ​ແລະ​ກອງທັບ​ຈີນ. ທ່ານ Hagel ​ເວົ້າ​ວ່າ ການ​ໂຈມ​ຕີ​ທາງ​ອິ​ນ​ເທີ​ເນັດ​ນັ້ນ ຄື​ການ​ຂົ່ມຂູ່​ດ້ານ​ຄວາມ​ໝັ້ນຄົງ​ຕໍ່​ທຸກໆ​ປະ​ເທດ ທີ່​ໂຮມ​ທັງ​ຈີນ​ນັ້ນ​ນໍາ.

ຢູ່​ນອກ​ກອງ​ປະຊຸມ​ນັ້ນ ທ່ານ Hagel ​ໄດ້​ພົບ​ປະ​ກັບ​ທ່ານ Itsunori Onodera ລັດຖະ ມົນຕີ​ປ້ອງ​ກັນ​ປະ​ເທດ​ຍີ່ປຸ່ນ ​ແລະ​ທ່ານ Kim Kwan Jin ລັດຖະມົນຕີ​ປ້ອງ​ກັນ​ປະ​ເທດເກົາຫຼີ​ໃຕ້ ຊຶ່ງ​ທັງ​ສາມ​ທ່ານ​ໄດ້​ກ່າວ ຫຼັງຈາກ​ໄດ້​ພົບ​ກັນ​ແລ້ວ​ນັ້ນ ວ່າ ພວກ​ເຂົາ​ເຈົ້າຈະ​ຮ່ວມ​ມື​ກັນ​ເພື່ອ​ຍຸຕິການ​ພັດທະນາ​ນີວ​ເຄຼນຂອງ​ເກົາຫຼີ​ເໜືອ. ນອກ​ນີ້​ແ​ລ້ວທ່ານ Hagel ຍັງໄດ້​ພົບ​ປະ​ກັບ​ຄະນະ​ຜູ້ຕາງໜ້າ​ຂອງ​ຈີນ ​ໃນ​ກອງ​ປະຊຸມ​ລັບກັນ ຊຶ່ງ​ເຈົ້າໜ້າ​ທີ່​ສະຫະ ລັດ ກ່າວເຖິງ​ການ​ເຈ​ລະ​ຈາ​ກັນດັ່ງກ່າວ​ວ່າ ​ເປັນ​ໄປ​ໃນ​ທາງ​ບວກ.

(ເບິ່ງວີດີໂອ)