ກຸ່ມຫົວຮຸນແຮງ ໂຊມາເລຍ al-Shabab ໄດ້ອ້າງເອົາຄວາມ
ຮັບຜິດຊອບ ສຳຫລັບການສັງຫານ 36 ຄົນ ເມື່ອຕອນເຊົ້າ
ຂອງວັນອັງຄານມື້ນີ້ ຢູ່ໃນພາກຕາເວັນອອກສຽງເໜືອ ຂອງ
ປະເທດເຄັນຢາ.
ການໂຈມຕີ ເກີດຂຶ້ນ ທີ່ບໍ່ຫິນແຫ່ງນຶ່ງ ໃກ້ໆກັບເມືອງ Mandera
ບ່ອນທີ່ ຜູ້ເຫັນເຫດການຫຼາຍຄົນ ກ່າວວ່າ ມືປືນຫຼາຍຄົນ ບຸກເຂົ້າ
ໄປຍິງ ພວກຄົນງານ ໃນຂະນະທີ່ເຂົາເຈົ້າກຳລັງນອນຫລັບ ຢູ່ໃນ
ຕູບຂອງພວກເຂົາເຈົ້ານັ້ນ.
ຄຳຖະແຫລງຂອງພວກ al-Shabab ກ່າວວ່າ ບັນດານັກຕໍ່ສູ້
ຂອງພວກເຂົາ ໄດ້ສັງຫານ ອັນທີ່ ພວກເຂົາເອີ້ນວ່າ “ເປັນຊາວເຄັນຢາທີ່ທຳສົງຄາມ
ສາສະໜາ” ແລະ ໄດ້ລົງໂທດ ປະເທດເຄັນຢາ ທີ່ໄດ້ສົ່ງກອງທະຫານ ເຂົ້າໄປສູ້ລົບໃນ
ໂຊມາເລຍ.
ການໂຈມຕີ ຂອງກຸ່ມ al Shabaab ໃນເຄັນຢາ
ກອງກຳລັງເຄັນຢາ ໄດ້ເຂົ້າໄປໃນໂຊມາເລຍ ນັບຕັ້ງແຕ່ປີ 2011 ຊຶ່ງເປັນສ່ວນນຶ່ງ ຂອງ
ກອງກຳລັງປະສົມບັນດາປະເທດໃນອາຟຣິກາ ທີ່ໄດ້ຊ່ອຍເຫຼືອຊຸກດັນ ພວກ al-Shabab ອອກຈາກເມືອງໃຫຍ່ໆຂອງໂຊມາເລຍ.
ພວກຫົວຮຸນແຮງ ໄດ້ປະຕິບັດການໂຈມຕີຫຼາຍໆບັ້ນ ໃນເຄັນຢາ ເປັນໄລຍະ ແລະ ເຕືອນ
ໃຫ້ລັດຖະບານວ່າ ຈະມີການໂຈມຕີຫຼາຍຂຶ້ນອີກ ຄັນຕົນບໍ່ຖອດຖອນກອງທະຫານຂອງ
ຕົນອອກ.
ໃນເດືອນແລ້ວນີ້ ພວກມືປືນຂອງ al-Shabab ໄດ້ສັງຫານ 28 ຄົນ ໃນຂົງເຂດດຽວກັນນັ້ນ ຄືກັນກັບ ການສັງຫານ ໃນວັນອັງຄານມື້ນີ້.
