ກຸ່ມລັດອິສລາມ ໄດ້ອອກມາອ້າງເອົາຄວາມຮັບຜິດຊອບ ໃນການໂຈມຕີດ້ວຍລະເບີດສະຫຼະຊີບທີ່ແນເປົ້າໝາຍໃສ່ສູນການຝຶກອົບຮົມຂອງຕຳຫຼວດໃນພາກຕາເວັນຕົກສຽງໃຕ້ຂອງປາກິສຖານ ໄດ້ສັງຫານຕຳຫຼວດເກນໃໝ່ຢ່າງໜ້ອຍ 60 ຄົນແລະໄດ້ຮັບບາດເຈັບອີກ ຫຼາຍກວ່າ 120 ຄົນ.
ການໂຈມຕີທີ່ວ່ານີ້ ມີຂຶ້ນກ່ອນທ່ຽງຄືນຂອງວັນຈັນວານນີ້ ພຽງໜ້ອຍດຽວ ໂດຍມີຜູ້ບຸກໂຈມຕີ 3 ຄົນ ເຂົ້າໄປໃນບ່ອນພັກຂອງພວກຕຳຫຼວດເກນໃໝ່ ທີ່ຢູ່ໃນຄ້າຍ ແລະລະ ດົມຍິງເຂົ້າໃສ່ພວກກ່ຽວ.
ໃນວັນອັງຄານມື້ນີ້ ກຸ່ມລັດອິສລາມ ໂດຍຜ່ານທາງອົງການຂ່າວ Amaq ຂອງຕົນນັ້ນ ໄດ້ນຳອອກເຜີຍແຜ່ ຮູບພາບຂອງຜູ້ໂຈມຕີທັງສາມ ທີ່ມີປືນກົນ ແລະລະເບີດສະຫຼະຊີບມັດຕິດໃສ່ເຕັມຕົວ.
ພວກທີ່ເຫັນເຫດການກ່າວວ່າ ພວກໂຈມຕີທີ່ວ່ານີ້ ໄດ້ຈັບກຸມຫຼາຍໆຄົນເພື່ອເປັນຕົວປະກັນ ກ່ອນກອງກຳລັງປາກິສຖານ ແລະໜ່ວຍກ້າຕາຍປິດລ້ອມສະຖານທີ່ດັ່ງກ່າວ ແລະປະເຊີນໜ້າກັບພວກມືປືນ.
ການຕໍ່ສູ້ກັນ ເພື່ອກວດລ້າງສະຖານທີ່ດັ່ງກ່າວນັ້ນແມ່ນໃຊ້ເວລາຫຼາຍຊົ່ວໂມງ. ພວກໂຈມຕີ 2 ຄົນ ໄດ້ລະເບີດຕົວເອງຕາຍ ແລະຜູ້ທີ 3 ແມ່ນຖືກຍິງຕາຍ ໃນການຍິງຕໍ່ ສູ້ກັນກັບກອງກຳລັງຮັກສາຄວາມປອດໄພ ເຮັດໃຫ້ການຈັບໂຕປະກັນໃນຕອນເຊົ້າມືດຂອງວັນອັງຄານມື້
ນີ້ສິ້ນສຸດລົງ ອີງຕາມຄຳເວົ້າຂອງເຈົ້າໜ້າທີ່ແຂວງ.
“ພວກທີ່ໄດ້ຮັບເຄາະທັງໝົດ ແມ່ນພວກຝຶກແອບທີ່ບໍ່ມີອາວຸດຕິດຕົວ ຜູ້ຊຶ່ງຕາມປົກກະຕິແລ້ວ ໃນຕອນກາງຄືນ ແມ່ນພາກັນນອນຢູ່ທີ່ຕຽງ ຫຼືບໍ່ກໍຫຼິ້ນກັບໂທລະສັບມືຖື ໃນເວລາພັກຜ່ອນສ່ວນຕົວຂອງພວກເຂົາເຈົ້າ ເພາະສະນັ້ນ ມັນເກີດຂຶ້ນຢ່າງບໍ່ທັນໄດ້ຕັ້ງຕົວ,”
ຊຶ່ງນັ້ນແມ່ນຄຳເວົ້າຂອງໂຄສົກປະຈຳແຂວງ ທ່ານ Anwar-ul Hag Kakar ທີ່ໄດ້ບອກກັບ VOA.
ອ່ານຂ່າວນີ້ເພີ້ມຕື່ມເປັນພາສາອັງກິດ
