ມີຜູ້ເສຍຊີວິດຢ່າງໜ້ອຍ 12 ແລະອີກ 15 ຄົນໄດ້ຮັບບາດເຈັບ ຫລັງຈາກມືປືນໂຈມຕີ ຮ້ານກາເຟ ຊຶ່ງເປັນທີ່ນິຍົມຂອງຜູ້ຄົນໃນເມືອງແຫ່ງນຶ່ງ ທີ່ຕັ້ງຢູ່ທາງເໜືອ ຂອງນະຄອນ ຫຼວງ Bagdad.
ເຈົ້າໜ້າທີ່ກ່າວວ່າ ມືປືນ 3 ຄົນ ໄດ້ໂຈມຕີຮ້ານກາເຟ ທີ່ເມືອງ Balad ຊຶ່ງປະຊາຊົນສ່ວນ ໃຫຍ່ ນັບຖືສາສະໜາຊີໄອ ໂດຍໄດ້ຍິງປືນເຂົ້າໃສ່ຜູ້ຄົນ ຫລັງຈາກທ່ຽງຄືນວັນພະຫັດ ໜ້ອຍນຶ່ງ. ເມື່ອຕຳຫລວດໄປຮອດບ່ອນເກີດເຫດ ພວກມືປືນ ກໍບີບຄະນວນລະເບີດໃຫ້ ແຕກຂຶ້ນ.
ເມືອງ Balad ຕັ້ງຫ່າງຈາກນະຄອນຫຼວງ Bagdad ໄປທາງເໜືອປະມານ 80 ກິໂລແມັດ ເວລານີ້ກຳລັງມີການຮັກສາຄວາມປອດໄພຢ່າງເຄັ່ງຄັດ. ພວກໂຈມຕີໄດ້ຜ່ານດ່ານກວດ ເຂົ້າໄປເຖິງ 3 ບ່ອນ ກ່ອນຈະເຖິງເປົ້າໝາຍຂອງພວກເຂົາເຈົ້າ ອີງຕາມແຫລ່ງຂ່າວຂອງ ຕຳຫຼວດທີ່ກ່າວຕໍ່ອົງການຂ່າວຮອຍເຕີ້.
ພວກເຈົ້າໜ້າທີ່ໄດ້ບອກຕໍ່ອົງການຂ່າວໂດຍຂໍສະຫງວນຊື່ ຍ້ອນບໍ່ໄດ້ຮັບອະນຸຍາດໃຫ້ ຖະແຫຼງໃດໆຕໍ່ສື່ມວນຊົນ.
ການໂຈມຕີດັ່ງກ່າວມີຂຶ້ນຫຼັງຈາກກະແສຟອງຂອງການວາງລະເບີດ ໃນນະຄອນຫຼວງທີ່ ເຮັດໃຫ້ມີຜູ້ເສຍຊີວິດ 80 ຄົນ. ກຸ່ມລັດອິສລາມໄດ້ອ້າງເອົາຄວາມຮັບ ຜິດຊອບໃນການ ໂຈມຕີເຫຼົ່ານີ້.
ໃນຕົ້ນອາທິດນີ້ ພົນຕີ Gary Volesky ຜູ້ບັນຊາການກຳລັງສະຫະລັດໃນອີຣັກ ກ່າວວ່າ ກຸ່ມລັດອິສລາມແມ່ນອ່ອນແອລົງນັບມື້ ຢູ່ໃນອີຣັກ ທັງໆທີ່ພວກນັກລົບ ຂອງກຸ່ມດັ່ງກ່າວ ໄດ້ທຳການໂຈມຕີຮ້າຍແຮງທີ່ນະຄອນຫຼວງ Bagdad.
