ມີຜູ້ເສຍຊີວິດຢ່າງໜ້ອຍ 38 ຄົນ ຮວມທັງເດັກນ້ອຍ 24 ຄົນ ໃນການໂຈມຕີດ້ວຍປືນ ແລະມີດ ເມື່ອວັນພະຫັດວານນີ້ ທີ່ບ່ອນເບິ່ງແຍງເດັກນ້ອຍແຫ່ງນຶ່ງໃນພາກຕາເວັນອອກສຽງເໜືອຂອງປະເທດໄທ. ນີ້ແມ່ນການຍິງສັງຫານໝູ່ທີ່ຮ້າຍແຮງສຸດໂດຍສ່ວນບຸກຄົນຢູ່ໃນປະເທດໄທ.
ການຍິງສັງຫານດັ່ງກ່າວມີຂຶ້ນທີ່ໜອງບົວລຳພູ ປະມານ 482 ກິໂລແມັດຫ່າງຈາກບາງກອກໄປທາງທິດຕາເວັນອອກສຽງເໜືອ. ມີຢ່າງໜ້ອຍ 10 ຄົນໄດ້ຮັບບາດເຈັບ ຊຶ່ງບາງຄົນໃນຈຳນວນນີ້ມີອາການສາຫັດ ອີງຕາມຄຳເວົ້າຂອງຕຳຫຼວດ.
ເຈົ້າໜ້າທີ່ທ້ອງຖິ່ນລະບຸມືປືນມີຊື່ວ່າ ປັນຍາ ກຳຣາບ ອະດີດຕຳຫຼວດທີ່ຖືກປົດອອກຈາກໜ້າທີ່ໃນປີກາຍນີ້ ຍ້ອນພົວພັນກັບການຄ້າຢາເສບຕິດ.
ໃນຕອນຕົ້ນ ມືປືນອາຍຸ 34 ປີ ໄດ້ຫຼົບໜີໄປທາງລົດກະບະໂຕໂຢຕ້າສີຂາວ ແຕ່ພັນຕຳຫຼວດເອກຈັກກະພັດ ວິຈິດໄຕຣທະຍາ ຈາກຈັງຫວັດດັ່ງກ່າວແຈ້ງໃຫ້ສື່ມວນຊົນຊາບວ່າ ທ້າວປັນຍາ ໄດ້ຂ້າໂຕຕາຍໃນເວລາຕໍ່ມາ ພ້ອມກັບເມຍແລະລູກຂອງລາວ. ຈຸດປະສົງໃນການຍິງສັງຫານຄັ້ງນີ້ ຍັງບໍ່ທັນເປັນທີ່ຈະແຈ້ງເທື່ອ ແລະການສືບສວນກຳລັງເລີ້ມຂຶ້ນ.
ໃນການລົງຂ່າວທາງເຟສບຸກນັ້ນ ນາຍົກລັດຖະມົນຕີຂອງໄທ ທ່ານປຣະຢຸດ ຈັນໂອຊາເອີ້ນເຫດຮ້າຍໃນຄັ້ງນີ້ວ່າ “ເປັນທີ່ຕື່ນຕົກໃຈ” ແລະໄດ້ສະແດງຄວາມເສົ້າສະຫຼົດໃຈຢ່າງເລິກເຊິ່ງ ໄປຍັງບັນດາຄອບຄົວຂອງຜູ້ເສຍຊີວິດແລະບາດເຈັບ.
ທ່ານກ່າວວ່າ “ນີ້ບໍ່ຄວນເກີດຂຶ້ນເລີຍ. ຂ້າພະເຈົ້າຮູ້ສຶກເສຍໃຈເປັນທີ່ສຸດຕໍ່ຜູ້ເຄາະຮ້າຍແລະຄອບຄົວຂອງພວກເຂົາເຈົ້າ.”
ໃນເວລາຕໍ່ມາ ໂຄສົກຂອງທ່ານໄດ້ໃຫ້ການຢືນຢັນວ່າ ນາຍົກລັດຖະມົນຕີຈະເດີນທາງໄປໜອງບົວລຳພູໃນວັນສຸກມື້ນີ້.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນກໍໄດ້ສະແດງຄວາມເສົ້າສະຫຼົດໃຈ.
ທ່ານກ່າວວ່າ “ພວກເຮົາຮູ້ສຶກເສົ້າເສຍໃຈຢ່າງເລິກເຊິ່ງຕໍ່ໂສກນາດຕະກຳທີ່ຈັງຫວັດໜອງບົວລຳພູ. ຄວາມຮຸນແຮງດັ່ງກ່າວເປັນທັງເລື້ອງທີ່ໄຮ້ເຫດຜົນແລະສຽບແທງຫົວໃຈ. ພວກເຮົາແມ່ນຢືນຢູ່ກັບປະຊາຊົນຊາວໄທ ແລະຂໍສະແດງຄວາມເສົ້າສະຫຼົດໃຈເປັນທີ່ສຸດຕໍ່ພວກທີ່ສູນເສຍຄົນທີ່ຕົນຮັກໃນມື້ນີ້. ສະຫະລັດພ້ອມແລ້ວທີ່ຈະໃຫ້ການຊ່ວຍເຫຼືອໄທຊຶ່ງເປັນພັນທະມິດຂອງພວກເຮົາ ຫຼັງຈາກໄດ້ເກີດໂສກນາດຕະກຳນີ້.”