ນັກຕະຫລົກອາດຈະໄດ້ເປັນປະທານາທິບໍດີ ກົວຕາມາລາ ຄົນຕໍ່ໄປ.
ທ່ານ Jimmy Morales ນັກສະແດງໂຕຕະຫລົກ ແລະ ຜູ້ຫາກໍເລີ້ມຫລິ້ນການເມືອງ ແມ່ນກຳລັງນຳໜ້າໝູ່ ໃນຈຳນວນຜູ້ສະໝັກ 3 ຄົນ ອີງຕາມຜົນທີ່ອອກມາໃນເບື້ອງຕົ້ນ ເຊິ່ງໄດ້ເຂົ້າສູ່ການເລືອກຕັ້ງປະທານາທິບໍດີ ຮອບສຸດທ້າຍ ຫຼັງຈາກການເລືອກຕັ້ງໃນ
ກົວເຕມາລາ ເມື່ອວັນອາທິດວານນີ້.
ດ້ວຍການນັບຄະແນນສຽງ ປະມານເຄິ່ງນຶ່ງແລ້ວ ປາກົດວ່າ ທ່ານ Morales ໄດ້ຮັບ ຄະແນນສຽງ 26 ເປີເຊັນ. ຄຳຂວັນຂອງການໂຄສະນາຫາສຽງຂອງທ່ານ Morales ນັ້ນ ກໍຄື “ບໍ່ສໍ້ໂກງ ບໍ່ຂີ້ລັກ” ເຊິ່ງເປັນສຽງດັງກ້ອງໃນຫູຂອງບັນດາຜູ້ມີສິດປ່ອນບັດ ຫຼັງຈາກ
ເລື້ອງການສໍ້ລາດບັງຫຼວງໄດ້ສັ່ນຄອນວົງການໆເມືອງຂອງ ກົວເຕມາລາ ມາຕັ້ງແຕ່ທ້າຍອາທິດແລ້ວນີ້ ທີ່ສິ້ນສຸດລົງດ້ວຍການລາອອກຈາກຕຳແໜ່ງຂອງປະທານາທິບໍດີ ທ່ານ Otto Perez Molina.
ທ່ານ Morales ກ່າວໃນວັນອາທິດວານນີ້ ຫຼັງຈາກທີ່ທ່ານໄດ້ປ່ອນບັດ ວ່າ “ຂ້າພະເຈົ້າ ປູກຝັງຄວາມຮັກໄວ້ກັບບ້ານເກີດເມືອງນອນຂອງຂ້າພະເຈົ້າ ແລະ ບັດນີ້ກໍແມ່ນກຳລັງເກັບກ່ຽວເອົາຄວາມຮັກນັ້ນຢູ່.”
ນັກທຸລະກິດອະນຸລັກນິຍົມ ທ່ານ Manuel Baldizon ຕາມຫຼັງທ່ານ Morales ມາດ້ວຍຄະແນນສຽງ 18 ເປີເຊັນ ໃນຂະນະທີ່ ອະດີດສະຕີໝາຍເລກນຶ່ງ ທ່ານນາງ Sandra Torres ໄດ້ຮັບຄະແນນສຽງ 17 ເປີເຊັນ.
ການເລືອກຕັ້ງເອົາ ປະທານາທິບໍດີ ສະມາຊິກສະພາ ແລະ ໃນເຂດເທດສະບານເມືອງ ນັ້ນ ແມ່ນສຳຫລັບ ສະໄໝ 4 ປີ ທີ່ຈະເລີ້ມຕົ້ນຂຶ້ນໃນປີ 2016. ຈົນກວ່າຈະເຖິງເວລານັ້ນ ອະດີດຮອງປະທານາທິບໍດີ ທ່ານ Alejandro Maldonado ແມ່ນຈະນຳພາລັດຖະບານ
ກົວເຕມາລາໄປກ່ອນ.
