ທ່ານ ຮວານ ກວາອີໂດ (Juan Guaido) ທີ່ຖືກຮັບຮູ້ ຈາກສະຫະລັດ ແລະອີກປະມານ 50 ປະເທດ ວ່າເປັນປະທານາທິບໍດີໃນໄລຍະຂ້າມຜ່ານຂອງເວເນຊູເອລານັ້ນ ໄດ້ເຕືອນພວກທະຫານໃນວັນອາທິດວານນີ້ວ່າ ການສະກັດກັ້ນ ບໍ່ໃຫ້ເຄື່ອງຊ່ວຍເຫລືອດ້ານມະນຸດສະທຳ ເຂົ້າໄປໃນເວເນຊູເອລາ ແມ່ນເປັນ "ການກໍ່ອາດຊະຍາກຳຕ້ານມະນຸດຊາດ" ແລະເຮັດໃຫ້ເຂົາເຈົ້າ "ເກືອບວ່າກາຍເປັນຜູ້ຂ້າລ້າງເຜົ່າພັນ."
ທ່ານກ່າວຕໍ່ໄປອີກວ່າ "ມີຄົນທີ່ຕ້ອງຮັບຜິດຊອບຕໍ່ເລື້ອງນີ້ ແລະຜູ້ກຳອຳນາດຮູ້ເລື້ອງນີ້ດີ. ນີ້ຄືການກໍ່ອາດຊະຍາກຳຕ້ານມະນຸດຊາດ, ພວກຜູ້ຊາຍທີ່ປະກອບອາວຸດເອີ້ຍ.” ທ່ານໄດ້ກ່າວຄຳເຫັນເຫລົ່ານັ້ນຕໍ່ທະຫານທີ່ຖືກສົ່ງໄປປະຈຳຢູ່ຂົວທີ່ເຊື່ອມຕໍ່ລະຫວ່າງເວເນຊູເອລາກັບໂຄລອມເບຍ.
ການຂົນສົ່ງອາຫານ, ຢາ, ແລະເຄື່ອງຊ່ວຍເຫລືອດ້ານມະນຸດສະທຳ
ແມ່ນຄ້າງຢູ່ໃນຟາກຂອງໂຄລອມເບຍ ໂດຍທີ່ມີຖັງບັນຈຸນ້ຳມັນແລະ ລົດບັນທຸກໃຫຍ່ສອງຄັນຕັນຢູ່ກາງເຄິ່ງຂອງຂົວໄວ້.
ທ່ານ ນີໂຄລັສ ມາດູໂຣ, ປະທານາທິບໍດີເວເນຊູເອລາ ສັ່ງໃຫ້ທະຫານສະກັດກັ້ນ ບໍ່ໃຫ້ເຄື່ອງຊ່ວຍເຫລືອດັ່ງກ່າວຂ້າມຊາຍແດນໄປໄດ້.
ທ່ານມາດູໂຣເວົ້າວ່າ ການຊ່ວຍເຫລືອຂອງສະຫະລັດ ເປັນສ່ວນນຶ່ງຂອງການວາງແຜນທີ່ຈະໂຄ່ນລົ້ມລັດຖະບານຂອງທ່ານ ແລະເວົ້າວ່າ ເວເນຊູເອລາບໍ່ຕ້ອງການໃຫ້ເປັນແບບນັ້ນ.
ແຕ່ວ່າ ບັນດາທ່ານໝໍເວເນຊູເອລາທີ່ເປັນສ່ວນນຶ່ງໃນການທຳການປະທ້ວງໃນວັນອາທິດວານນີ້ໄດ້ກ່າວຫາທ່ານ ມາດູໂຣວ່າ ກຳລັງເຮັດໃຫ້ຂະແໜງການແພດຂອງເວເນຊູເອລາ ຈົມລົງໄປຢູ່ໃນລະດັບ "ທີ່ລ້າສະໄໝ".
ເບິ່ງວີດິໂອກ່ຽວກັບຂ່າວນີ້
ທ່ານມາດູໂຣ ໄດ້ໄປປາກົດໂຕ ຢູ່ໂທລະພາບຂອງລັດໃນວັນອາທິດວານນີ້ ໂດຍໄດ້ສະແດງໃຫ້ເຫັນລະບົບປ້ອງກັນເຮືອບິນລົບ ແລະອາວຸດປະເພດອື່ນ ທີ່ທ່ານເວົ້າວ່າ ຈະເຮັດໃຫ້ຕົວເມືອງຕ່າງໆຂອງ ເວເນຊູເອລາ "ໜຽວແໜ້ນບໍ່ສາມາດຕີໄດ້."
"ພວກເຮົາເປັນຄົນທີ່ຮັກຫອມສັນຕິພາບຕາບໃດທີ່ບໍ່ມີແນວມາລົບກວນພວກເຮົາ, ຂໍແຕ່ວ່າ ດໍໂນລ ທຣຳ ບໍ່ທຳການຂົ່ມຂູ່ພວກເຮົາ,” ນັ້ນຄືຄຳເວົ້າຂອງທ່ານ ມາດູໂຣ. ທ່ານກ່າວຕໍ່ໄປວ່າ “ດໍໂນລ ທຣຳ ອອກໄປຈາກ ເວເນຊູເອລາ ດຽວນີ້. ອອກໄປພ້ອມກັບຄຳນາບຂູ່ຂອງຕົນ, ມີກຳລັງທະຫານທີ່ປະກອບອາວຸດຢູ່ໜີ້ ແລະກໍມີປະຊາຊົນທີ່ປົກປ້ອງກຽດ, ສັກສີ ແລະຄວາມດີງາມຂອງຕົນໄວ້."
