ນາຍົກລັດຖະມົນຕີກຣິສ ທ່ານ George Papandreou ລອດພົ້ນຈາກການລົງມະຕິ
ບໍ່ໄວ້ວາງໃຈໃນສະພາແຫ່ງຊາດ ໃນແລງວັນສຸກວານນີ້ ຊຶ່ງຈະຫລີກລ່ຽງການເລືອກຕັ້ງ
ທົ່ວໄປໄວກວ່າກໍານົດ ທີ່ຈະສ້າງຄວາມບໍ່ທຸ່ນທ່ຽງໃຫ້ແກ່ຂົງເຂດທີ່ໃຊ້ເງິນຢູໂຣໃນອະນາ
ຄົດຢູ່ໃນຢູໂຣບນັ້ນ.
ພວກຜູ້ແທນສະພາທັງໝົດ 153 ທ່ານເຫັນດີນໍາຮ່າງມະຕິດັ່ງກ່າວຂະນະທີ່ 145 ທ່ານຄັດຄ້ານຂອງຈໍານວນບ່ອນນັ່ງທັງໝົດ 300 ບ່ອນໃນສະພານັ້ນ.
ໃນການກ່າວປາໄສກ່ອນການລົງມະຕິກັນ ທ່ານ Papandreou ຮຽກຮ້ອງໃຫ້ຈັດຕັ້ງຄະນະລັດຖະບານປະສົມຂຶ້ນເພື່ອຮັບເອົາຂໍ້ຕົກລົງຊ່ອຍກູ້ໜີ້ສິນຂອງລັດຖະບານຊຶ່ງເປັນສິ່ງສໍາຄັນທີ່ສຸດເພື່ອຊ່ອຍກູ້ປະເທດບໍ່ໃຫ້ລົ້ມລະລາຍແລະສ້າງສະຖຽນລະພາບສໍາລັບຂົງເຂດທີ່ໃຊ້ເງິນຢູໂຣນັ້ນ.
ທ່ານ Papandreou ກ່າວຕໍ່ລັດຖະສະພາວ່າ ທ່ານຈະທໍາການພົບປະກັບປະທານາທິບໍດີໃນວັນເສົາມື້ນີ້ເພື່ອໂອ້ລົມສົນທະນາກັນເລື້ອງການຈັດຕັ້ງລັດຖະບານປະສົມຂຶ້ນທີ່ຈະຮັບປະກັນໃນການຊ່ອຍກູ້ໜີ້ສິນຂອງລັດຖະບານນັ້ນ ແລະທ່ານກ່າວຕື່ມວ່າ ທ່ານມີຄວາມເຕັມໃຈທີ່ຈະປະໃຫ້ຄົນອື່ນມາເປັນຜູ້ນໍາພາລັດຖະບານຊົ່ວຄາວ ແຕ່ທ່ານກ່າວຕື່ມວ່າ ການຮຽກຮ້ອງໃຫ້ມີການເລືອກຕັ້ງຂຶ້ນກ່ອນກໍານົດຈະເປັນການສ້າງຄວາມເສຍຫາຍຢ່າງໃຫຍ່ຫລວງ.
ລັດຖະມົນຕີການເງິນ ທ່ານ Evengelos Venizelos ກ່າວວ່າ ປະເທດຕ້ອງການຫລາຍທີ່ສຸດເງິນງວດໃໝ່ຈໍານວນ 11 ຕື້ໂດລາໃນຈໍານວນໂຄງການກອບກູ້ໜີ້ສິນທີ່ໄດ້ຮັບການອະນຸມັດໃຫ້ແລ້ວ 150 ຕື້ໂດລານັ້ນ. ບັນດາຜູ້ນໍາປະເທດໃນຢູໂຣບແລະກອງທຶນສາກົນຫລື IMF ເຄີຍກ່າວມາກ່ອນວ່າ ກຣິສຈະບໍ່ໄດ້ຮັບເງິນຕື່ມອີກຈັກເຊັນ ຖ້າກຣິສບໍ່ປະຕິບັດຕາມຂໍ້ຕົກລົງກອບກູ້ໜີ້ສິນຂອງຕົນນັ້ນ.
ການລົງມະຕິກັນມີຂຶ້ນນຶ່ງມື້ ຫລັງຈາກທ່ານ Papandreo ລົບລ້າງແຜນການລົງປະຊາມະຕິທີ່ເປັນບັນຫາໂຕ້ແຍ່ງກັນທີ່ໄດ້ເຮັດໃຫ້ພວກຜູ້ນໍາຂອງໂລກໂມໂຫໂຫໂສທີ່ກໍາລັງພະຍາຍາມວາງແຜນການຊ່ອຍກູ້ໜີ້ສິນຂອງພວກປະເທດທີ່ໃຊ້ເງິນຢູໂຣໃນຢູໂຣບນັ້ນ. ພວກຜູ້ແທນສັງກັດພັກສັງຄົມນິຍົມ Pasok ທັງໝົດໃຫ້ການສະໜັບສະໜຸນທ່ານPapandreou ຂະນະທີ່ພັກຝ່າຍຄ້ານຄືພັກປະຊາທິປັດໃໝ່ ລົງມະຕິຄັດຄ້ານນັ້ນ.
ການລົງມະຕິດັ່ງກ່າວໄດ້ເຮັດໃຫ້ຄວາມສັບສົນວຸ້ນວາຍມາເປັນເວລານຶ່ງສັບປະດາໃນເຂດໃຊ້ເງິນຢູໂຣເສັດສິ້ນລົງ ຊຶ່ງໄດ້ເລີ້ມມາຕັ້ງແຕ່ທ່ານ Papandreou ຮຽກຮ້ອງໃຫ້ມີການລົງປະຊາມະຕິກ່ຽວກັບໂຄງການຊ່ອຍກູ້ໜີ້ສິນສໍາລັບປະເທດຂອງທ່ານນັ້ນ.
ນາຍົກລັດຖະມົນຕີໄດ້ປະເຊີນກັບຄວາມກົດດັນນາໆຊາດຢ່າງຫລວງຫລາຍໂດຍຮຽກຮ້ອງໃຫ້ທ່ານລົບລ້າງແຜນການລົງປະຊາມະຕິນັ້ນ ຊຶ່ງທ່ານກ່າວວ່າ ການລົງປະຊາມະຕິດັ່ງກ່າວເປັນການເຄື່ອນໄຫວທາງດ້ານການເມືອງອັນນຶ່ງເພື່ອໃຫ້ຝ່າຍຄ້ານໃນກຣິສໃຫ້ການສະໜັບສະໜຸນຕໍ່ແຜນການກອບກູ້ໜີ້ສິນນັ້ນ. ທ່ານໄດ້ລົບລ້າງແຜນການດັ່ງກ່າວຫລັງຈາກພວກສະມາຊິກສະພານິຕິບັນຍັດຝ່າຍຄ້ານກ່າວວ່າ ພວກເຂົາເຈົ້າຈະໃຫ້ການສະໜັບສະໜຸນຕໍ່ໂຄງການຊ່ອຍກູ້ໜີ້ສິນນັ້ນ.
ພວກປະທ້ວງຫລາຍພັນຄົນພາກັນໄປໂຮມຊຸມນຸມກັນໃນໃຈກາງກຸງ Athensໃນລະຫວ່າງການລົງມະຕິກັນໃນວັນສຸກວານນີ້ຄັດຄ້ານຕໍ່ການເອົາມາດຕະການປະຍັດມັດທະຍັດຢ່າງເຂັ້ມງວດທີ່ຮວມຢູ່ໃນໂຄງການຊ່ອຍກູ້ໜີ້ສິນນັ້ນ.
