ວັນຈັນມື້ນີ້ ປະຊາຊົນຊາວກຣີສ ຕື່ນນອນຂຶ້ນມາ ພົບວ່າ ບັນດາທະນາຄານຕ່າງໆອັດໝົດ ແລະຕູ້ຖອນເງິນ ATM ບໍ່ມີເງິນເລີຍ.
ປະເທດ ກຣິສ ທີ່ຂາດເງິນຢ່າງຫຼວງຫຼາຍ ແລະໄດ້ຖືກຕັດອອກຈາກການໄດ້ຮັບເງິນກູ້ຢືມເພີ້ມຕື່ມ ຈາກສະຫະພາບຢູໂຣບນັ້ນ ໄດ້ສັ່ງໃຫ້ປິດບັນດາທະນາຄານ ແລະ ຕະຫຼາດຮຸ້ນ ເປັນເວລາ 6 ມື້ ເລີ່ມແຕ່ ວັນຈັນມື້ນີ້ເປັນຕົ້ນໄປ, ໃນຂະນະທີ່ວິກິດການທາງການເງິນຂອງປະເທດ ຕົກຕ່ຳກວ່າເກົ່າ ແລະ ກຳນົດເສັ້ນຕາຍໃນວັນອັງຄານມື້ອື່ນ ເພື່ອຜ່ອນຄາຍວິກິດການນັ້ນ ຫຍັບໃກ້ເຂົ້າມາ.
ນາຍົກລັດຖະມົນຕີ Alexis Tsipras ໄດ້ອອກມາ ປະກາດຂ່າວການເຄື່ອນໄຫວດັ່ງກ່າວ ທາງໂທລະພາບແຫ່ງຊາດ ໃນວັນອາທິດວານນີ້, ຫລາຍຊົ່ວໂມງຫຼັງຈາກທະນາຄານກາງ ຢູໂຣບ ກ່າວວ່າ ຕົນຈະບໍ່ສືບຕໍ່ໂຄງການໃຫ້ເງິນກູ້ຢືມສຸກເສີນ ແກ່ກຣີສ ທີ່ໄດ້ອະນຸຍາດໃຫ້ບັນດາທະນາຄານຂອງ ກຣິສ ຍັງເປີດບໍລິການໄດ້ໃນບໍ່ເທົ່າໃດອາທິດທີ່ຜ່ານມານັ້ນ.
ການປະກາດຂອງທ່ານ Tsipras ໄດ້ເກີດຂຶ້ນ ຫຼັງຈາກການເຈລະຈາໃນທ້າຍອາທິດຜ່ານມາ ລະຫວ່າງນັກເຈລະຈາ ກຣິສ ແລະ ພວກເຈົ້າໜີ້ຢູໂຣບ ໄດ້ຈົບລົງໂດຍຕົກລົງກັນບໍ່ໄດ້ ກ່ຽວກັບ ເງື່ອນໄຂຂອງເງິນກູ້ ເພື່ອການປະຕິຮູບ ເພື່ອຊ່ວຍກອບກູ້ເສດຖະກິດຂອງກຣີສນັ້ນ. ຖ້າ
ປາດສະຈາກການຕົກລົງ, ນັກວິເຄາະກ່າວວ່າ ລັດຖະບານ Athens ກໍເບິ່ງຄືວ່າ ຈະຜິດສັນຍາໃນການຊຳລະໜີ້ ເງິນກູ້ຢືມ 1.8 ຕື້ໂດລາ ໃຫ້ກັບອົງການກອງທຶນສາກົນ ໃນວັນອັງຄານມື້ອື່ນນີ້.
ກຣີສ ອັດ ທະນາຄານ ແລະຕູ້ຖອນເງິນ ທັງໝົດ
ນາຍົກລັດຖະມົນຕີ ກຣິສ ໄດ້ຖິ້ມໂທດໃສ່ ພວກເຈົ້າໜີ້ຢູໂຣບວ່າ ເປັນຕົ້ນເຫດຂອງບັນຫາ ວິກິດການທີ່ຂົ່ມຂູ່ ຈະເຮັດໃຫ້ກຣີສຖືກຖອນອອກຈາກການເປັນສະມາຊິກກຸ່ມສະກຸນເງິນ ຢູໂຣ ທີ່ປະກອບດ້ວຍ 19 ປະເທດນັ້ນ.
ຕາມຕາຕະລາງເວລາຕອນນີ້, ທະນາຄານ ແລະ ຕະຫຼາດຮຸ້ນ ແມ່ນ ຍັງຈະປິດຢູ່ ຈົນກວ່າຊາວກຣີສຜູ້ມີສິດເລືອກຕັ້ງ ຈະຕັດສິນໃຈ ໃນການລົງປະຊາມະຕິ ວັນທີ 5 ເດືອນກໍລະກົດນີ້ ວ່າ ຈະຮັບເອົາ ມາດຕະການເຄັ່ງຄັດໃໝ່ ທີ່ຮຽກຮ້ອງໂດຍພວກເຈົ້າໜີ້ຂອງປະເທດ ນັ້ນຫຼືບໍ່.
ລາຍງານຂ່າວຕ່າງໆຂອງ ຢູໂຣບ ກ່າວວ່າ ໃນໄລຍະການປິດທະນາ ຄານນີ້ ພວກລູກຄ້າ ຈະໄດ້ຮັບອະນຸຍາດໃຫ້ຖອນເງິນ ຈຳນວນສູງສຸດ ໄດ້ 65 ໂດລາຕໍ່ມື້ ແລະເງິນສົດແມ່ນຈະບໍ່ສາມາດ ເຄື່ອນຍ້າຍອອກ ຕ່າງປະເທດໄດ້ ຖ້າບໍ່ໄດ້ຮັບອະນຸຍາດກ່ອນ.
