ບັນດາຜູ້ລົງຄະແນນສຽງຊາວ ກຣີສ ທີ່ໄດ້ມີຄວາມຮູ້ສຶກອິດເມື່ອຍ ຍ້ອນວິກິດການທາງດ້ານເສດຖະກິດທີ່ມີມາຫຼາຍປີ, ຍ້ອນການ ວາງມາດຕະການປະຫຍັດມັດຖະຍັດ ຂອງ ຢູໂຣບ ແລະ ຄວາມສັບສົນທາງດ້ານການເມືອງນັ້ນ ແມ່ນກຳລັງຫວນກັບຄືນໄປໜ່ວຍ ເລືອກຕັ້ງເພື່ອລົງຄະແນສຽງເອົາລັດຖະບານໃໝ່.
ການເລືອກຕັ້ງຄັ້ງນີ້ຈະເປັນການຕໍ່ສູ້ກັນລະຫວ່າງພັກຝ່າຍຄ້ານ Syriza ນຳໜ້າໂດຍອະດີດນາຍົກລັດຖະມົນຕີ ທ່ານ Alexis Tsipras ກັບພັກອະນຸລັກນິຍົມປະຊາທິປະໄຕໃໝ່ຂອງທ່ານ Vangelis Meimarakis. ເທື່ອນີ້ເປັນການເລືອກຕັ້ງແຫ່ງຊາດຄັ້ງທີ 3 ຂອງ ກຣິສ ໃນປີນີ້ ເຊິ່ງໄດ້ຖືກກະຕຸ້ນຂຶ້ນໃນເວລາທີ່ທ່ານ Tsipras ໄດ້ລາອອກຈາກຕຳແໜ່ງ, ເວລາເກືອບ 7 ເດືອນຜ່ານມາຫຼັງຈາກທ່ານ ແລະ ພັກ Syriza ໄດ້ຖືກເລືອກຕັ້ງດ້ວຍ ຄຳ ສັນຍາທີ່ຈະຫຼຸດຜ່ອນ ມາດຕະການມັດຖະຍັດທີ່ຮຸນແຮງ ທີ່ໄດ້ຖືກວາງອອກໂດຍຜູ້ໃຫ້ ກູ້ຢືມ ເງິນ ຢູໂຣບ ໃນການແລກປ່ຽນກັບເງິນກູ້ຢືມກອບກູ້ເສດຖະກິດ ຫຼາຍພັນລ້ານໂດລາ ນັ້ນ.
ເຖິງແມ່ນຈະໄດ້ໃຫ້ຄຳໝັ້ນສັນຍາໄວ້, ແລະ ການລົງ ປະຊາມະຕິໃນເດືອນກໍລະກົດທີ່ຜ່ານ ມາ ເຊິ່ງບັນດາຜູ້ລົງຄະແນນສຽງ ໄດ້ປະຕິເສດຂໍ້ຕົກລົງທີ່ຮຸນແຮງທີ່ວາງອອກໂດຍຜູ້ໃຫ້ກູ້ ຢືມເງິນ ຢູໂຣບນັ້ນກໍຕາມ, ແຕ່ທ່ານ Tsipras ກໍໄດ້ຮັບເອົາຂໍ້ຕົກລົງ ສຳລັບເງິນກູ້ຢືມກອບ ກູ້ເສດຖະກິດ 98 ຕື້ໂດລາເມື່ອເດືອນທີ່ຜ່ານມາ. ທ່ານ Meimarakis ໄດ້ກ່າວຫາ ທ່ານ Tsipras ວ່າບໍ່ມີຄວາມສາມາດ ໃນການຕໍ່ລອງຂໍ້ຕົກລົງດັ່ງກ່າວ.
ໃນການສຳຫຼວດຄວາມຄິດເຫັນຂອງບັນດາຜູ້ລົງຄະແນນສຽງສະແດງໃຫ້ເຫັນວ່າ ພັກ Syriza ແມ່ນນຳໜ້າພັກ ປະຊາທິປະໄຕໃໝ່ ພຽງໜ້ອຍດຽວໃນການເລືອກຕັ້ງໃນວັນ ອາທິດມື້ນີ້. ບໍ່ວ່າທ່ານໃດຈະ ໄດ້ຊະນະກໍຕາມ ແຕ່ຄາດວ່າ ຈະບໍ່ມີພັກໃດພັກໜຶ່ງໄດ້ຮັບ ຄະແນນສຽງຫຼາຍພໍເພື່ອທີ່ຈະໄດ້ຮັບສຽງສ່ວນ
ໃຫຍ່ໃນສະພາ 300 ບ່ອນນັ່ງ, ແມ່ນກະທັ້ງຈະໄດ້ຮັບຄະແນນພິເສດ 50 ບ່ອນນັ່ງກໍຕາມ. ຜູ້ທີ່ໄດ້ຮັບ ໄຊຊະນະຈະຕ້ອງໄດ້ຕັ້ງລັດຖະບານຮ່ວມກັບ 2 ພັກທີ່ນ້ອຍກວ່າ, ພັກ Potami ແລະພັກສັງຄົມນິຍົມ Pasok.
ລັດຖະບານໃໝ່ຈະຕ້ອງໄດ້ບັນຍັດການປະຕິຮູບຢ່າງວ່ອງໄວເຊິ່ງໄດ້ຖືກຮຽກຮ້ອງໂດຍຂໍ້ສະເໜີການກອບກູ້ເສດຖະກິດຄັ້ງຫຼ້າສຸດ, ລວມທັງແຜນການກູ້ເງິນໃໝ່ຂອງທະນາຄານ ນຳ.
ໜ່ວຍເລືອກຕັ້ງແມ່ນມີກຳນົດຈະປິດລົງໃນເວລາ 16 ໂມງຕາມເວລາຂອງ ກຣິສ ພ້ອມ ດ້ວຍການປະເມີນຜົນລ່ວງໜ້າແມ່ນຄາດວ່າ ຈະເກີດຂຶ້ນພາຍໃນສອງສາມຊົ່ວໂມງຫຼັງຈາກປິດ ໜ່ວຍປ່ອນບັດ.
