ລິ້ງ ສຳຫລັບເຂົ້າຫາ

ວັນຈັນ, ໒໐ ພຶດສະພາ ໒໐໒໔

ຜູ້ນຳການເມືອງ ໃນກຣີສ ບໍ່ສາມາດ ຈັດຕັ້ງລັດຖະບານ


ປະທານາທິບໍດີກຣີສ ທ່ານ Karolos Papoulias (ຂວາ) ພວມຕ້ອນຮັບ ຜູ້ນຳພັກສັງຄົມນິຍົມ ທ່ານ Evangelos Venizelos ເພື່ອທຳການເຈລະຈາ ທີ່ທຳນຽບຂອງທ່ານ (12 ພຶດສະພາ 2012)
ປະທານາທິບໍດີກຣີສ ທ່ານ Karolos Papoulias (ຂວາ) ພວມຕ້ອນຮັບ ຜູ້ນຳພັກສັງຄົມນິຍົມ ທ່ານ Evangelos Venizelos ເພື່ອທຳການເຈລະຈາ ທີ່ທຳນຽບຂອງທ່ານ (12 ພຶດສະພາ 2012)

ເປັນ​ທີ່​ຄາດ​ກັນ​ວ່າ ທ່ານ Evangelos Venizelos ຜູ້ນຳ​ພັກ​ສັງຄົມ​ນິຍົມ​ຂອງກຣີສຈະ​ມອບ
ຄວາມ​ຮັບຜິດຊອບ​ໃນ​ການ​ສ້າງຕັ້ງລັດຖະບານ​ສາມັກຄີ​ຊາດຄືນໃຫ້​ແກ່​ປະທານາທິບໍດີກຣີສ​
ໃນ​ວັນ​ເສົາ​ມື້ນີ້ຫຼັງຈາກທ່ານ​ບໍ່​ສາມາດ​ແກ້​ໄຂ​ບັນຫາ​ຕິດຂັດ​ທາງ​ດ້ານ​ການ​ເມືອງແລະ​ຕ່າວ​ປີ້ນ
ຄວາມ​ຈຳ​ເປັນ ​ທີ່​ຈະ​ຕ້ອງ​ໄດ້​ທຳ​ການ​ເລືອກຕັ້ງ​ໃໝ່.

​ໃນ​ວັນ​ສຸກ​ວານ​ນີ້ ທ່ານ Venizelos ​ໄດ້​ປະກາດ​ວ່າ ພັກ​ຊ້າຍ​ຈັດ Syriza ປະຕິ​ເສດ​ບໍ່​ຍອມ
​ເຂົ້າຮ່ວມ​ກັບ​ພັກ​ສັງຄົມ​ນິຍົມ ​ແລະ​ພັກ​ນິຍົມ​ແນວທາງ​ເດີມ ​ເພື່ອ​ຈັດຕັ້ງລັດຖະບານ​ສາມັກຄີ​
ຊາດ​ຂຶ້ນ ​ເນື່ອງ​ຈາກ​ບໍ່​ສາມາດ​ຕົກລົງ​ກັນ​ໄດ້​ ກ່ຽວກັບ​ ໂຄງການ​ປະຢັດ​ມັດທະຍັດ​ຂອງ​ກຣີສ.
ພັກ​ສັງຄົມ​ນິຍົມ​ແລະ​ພັກນິຍົມ​ແນວທາງ​ເດີມ​ປະຊາທິປະ​ໄຕ​ໃໝ່​ໄດ້​ສະ​ເໜີ​ທີ່​ຈະ​ຄ່ອຍ​ຫຼຸດຜ່ອນ
​ເທື່ອ​ລະ​ເລັກ​ລະ​ນ້ອຍ​ມາດຕະ ການ​ທີ່​ເຄັ່ງ​ຄັດ​ຕ່າງໆ ທີ່​ສະຫະພາບ​ຢູ​ໂຣບ​ແລະ​ອົງການ​ກອງ​
ທຶນ​ສາກົນ IMF ໄດ້​ບັງຄັບ​ໃຫ້ກຣີສຕ້ອງປະຕິບັດ​ຕາມ​ເພື່ອ​ເປັນ​ການ​ແລກປ່ຽນ​ກັບ​ການ​ໃຫ້​
ເງິນ​ກູ້ຢືມ​ກ້ອນ​ໃຫຍ່. ພວກຝ່າຍ​ຊ້າຍ​ຂອງ​ກຣີສຕ້ອງການ​ໃຫ້​ຍົກ​ເລີກ​ມາດ​ຕະການ​ເຫຼົ່ານີ້​ໃນ
​ທັນທີ. ຖ້າ​ຫາກ​ຍັງ​ບໍ່​ສາມາດ​ຕົກລົງ​ກັນ​ໄດ້ພາຍ​ໃນ​ວັນ​ທີ 17 ​ເດືອນ​ນີ້ ຈຳເປັນ​ຈະ​ຕ້ອງ​ໄດ້​ມີ​
ການ​ເລືອກ​ຕັ້ງຄັ້ງ​ໃໝ່.

​ເປັນ​ທີ່​ຄາດ​ກັນ​ວ່າ ປະທານາທິບໍດີ Karolos Papoulias ຈະ​ຮຽກຮ້ອງ​ ໃຫ້​ທຸກພັກ​ການ
​ເມືອງ ຈັດຕັ້ງລັດຖະບານ​ປະສົມ​ສຸກ​ເສີນ​ຂຶ້ນເພື່ອ​ປົກຄອງ​ປະ​ເທດ​ ໄປຈົນ​ກວ່າ​ມີ​ການ​ເລືອກ
​ຕັ້ງ​ໃໝ່.

ບັນດາ​ຜູ້​ມີ​ສິດ​ປ່ອນ​ບັດ​ຊາວ​ກຣີສ ​ໄດ້​ລົງ​ໂທດ​ທັງ​ພັກ​ສັງຄົມ​ນິຍົມ PASOK ​ແລະ​ພັກ​ປະ
ຊາທິປະ​ໄຕ​ໃໝ່ທີ່​ໄດ້​ຊຸກຍູ້​ໃຫ້​ມີ​ການ​ຮັບ​ຜ່ານມາດ​ຕະການ​ປະຢັດມັດທະຍັດ​ທີ່​ເຄັ່ງ​ຄັດເພື່ອ​
ເປັນ​ການ​ແລກປ່ຽນ ​ກັບເງິນ​ກູ້ຢືມ​ກ້ອນ​ໃຫຍ່​ຂອງ​ນາໆຊາດ ​ສຳຫຼັບ​ຫຼີກລ້ຽງ​ບໍ່​ໃຫ້​ກຣີສ
ລົ້ມລະລາຍ.

ທ່ານ Venizelos ​ເປັນ​ຜູ້ນຳ​ຄົນທີ 3 ຂອງ​ກຣີສ ທີ່​ໄດ້​ພະຍາ​ຍາມສ້າງຕັ້ງລັດຖະບານ​ແຕ່​
ບໍ່​ປະສົບ​ກັບ​ຄວາມ​ສຳ​ເລັດຫຼັງຈາກ​ການ​ເລືອກ​ຕັ້ງທີ່​ບໍ່​ມີ​ຜົນ​ຕັດສິນ​ຊີ້ຂາດໃນ​ມື້ວັນ​ອາທິດ
​ແລ້ວ.

​ໃນ​ຕອນ​ເຊົ້າວານ​ນີ້ ທ່ານ Venizelos ​ໄດ້​ພົບ​ປະ​ກັບ​ຜູ້ນຳ​ຂອງ​ພັກ​ນິຍົມ​ແນວທາງ​ເດີມ
ທ່ານ Antonis Samaras ​ເພື່ອ​ເຈລະຈາ​ຫາລື​ກ່ຽວ​ກັບ​ການ​ສ້າງຕັ້ງລັດຖະບານ​ປະສົມ.
ພັນ​ທະມິດ​ທີ່​ອາດ​ເປັນ​ໄປ​ໄດ້​ອີກ​ແບບນຶ່ງ​ກໍ​ຄື​ພັກ​ນິຍົມ​ປະຊາທິປະ​ໄຕ​ຊ້າຍ​ນ້ອຍໆ​ພັກ​ນຶ່ງ​
ກ່າວ​ວ່າ ຕົນ​ຈະ​ເຂົ້າຮ່ວມ​ລັດຖະບານທີ່​ປະກອບດ້ວຍ​ພັກ​ສັງຄົມ​ນິຍົມແລະ​ພັກ​ນິຍົມ​ແນວ
ທາງ​ເດີມ​ປະຊາທິປະ​ໄຕ​ໃໝ່​ທໍ່​ນັ້ນ ​ແລະບໍ່​ໄດ້​ຮວມ​ເອົາ​ພັກ Syriza.

ຜູ້ນຳ​ຂອງ​ພັກ Syriza ທ່ານ Alexis Tsipras ກ່າວ​ວ່າ ປະຊາຊົນ​ຊາວ​ກຣີສໄດ້​ພາກັນ
​ປ່ອນ​ບັດ ​ຕໍ່ຕ້ານ​ມາດ​ຕະການ​ປະຢັດ​ມັດທະຍັດ ທີ່​ບັງຄັບ​ໃຫ້ກຣີສປະຕິບັດ​ໂດຍ​ສະຫະ
ພາບ​ຢູ​ໂຣບ​ແລະ​ອົງການ IMF ​ແລະ​ຄວາມ​ໄຝ່ຝັນ​ຂອງ​ພວກ​ເຂົາ​ເຈົ້າ ຈະ​ບໍ່​ເອົາ​ຫົວຊາ​ບໍ່​
ໄດ້.

ພັກ​ປະຊາທິປະ​ໄຕ​ໃໝ່​ໄດ້​ຊະນະ​ບ່ອນ​ນັ່ງ​ຫຼາຍກວ່າ​ໝູ່​ໃນ​ການ​ເລືອກ​ຕັ້ງໃນ​ມື້ວັນອາທິດ​
ຜ່ານ​ມາ ຕິດຕາມ​ໂດຍ​ພັກ​ຊ້າຍ​ຈັດ ​ແລະ​ພັກ​ສັງຄົມ​ນິຍົມ. ​ແຕ່​ບໍ່​ມີ​ພັກ​ໃດໄດ້​ຮັບ​ບ່ອນ​ນັ່ງ
​ພຽງພໍສຳ​ຫຼັບຈັດຕັ້ງລັດຖະບານ​ໄດ້​ຕາມ​ລຳພັງ.

XS
SM
MD
LG