ຕຳຫຼວດກຣີສທີ່ລາດຕະເວນຕາມເຂດຊາຍແດນທາງພາກເໜືອ
ຂອງປະເທດໄດ້ປະທະກັບພວກອົບພະຍົບຫຼາຍຮ້ອຍຄົນໃນວັນ
ອັງຄານວານນີ້ ສ່ວນໃຫຍ່ ແມ່ນພວກທີ່ຫລົບໜີຈາກສົງຄາມໃນ
ຊີເຣຍທີ່ໄດ້ຖືກຂັດຂວາງບໍ່ໃຫ້ຂ້າມເຂົ້າໄປໃນມາເຊໂດເນຍ.
ສ່ວນອີກຫຼາຍພັນຄົນທີ່ພາກັນຕັ້ງຄ້າຍຢູ່ໃກ້ກັບບ້ານ Idoeni ບໍ່
ໄດ້ເອົາຫົວຊາຄຳສັ່ງຂອງລັດຖະບານໃຫ້ຍົກຍ້າຍເຂົ້າໄປຢູ່ສູນ
ຊົ່ວຄາວໃນຂະນະທີ່ການປະທ້ວງຍັງດຳເນີນຢູ່ຕໍ່ມາຕໍ່ຕ້ານການ
ປາບປາມຂອງຢູໂຣບແລະການຫລັ່ງໄຫລຂອງພວກອົບພະຍົບ
ຈາກຕາເວັນອອກກາງແລະເອເຊຍໃຕ້.
ພວກອົບພະຍົບທີ່ພາກັນປະທ້ວງ ໄດ້ອັດບໍລິເວນລາງລົດໄຟມາໄດ້ຫຼາຍມື້ແລ້ວຮຽກຮ້ອງ
ຂໍເຂົ້າໄປໃນປະເທດມາເຊໂດເນຍ ແລະບ່ອນອື່ນໆ ໃນແຫລມບອລກັນ ແລະເດີນທາງຕໍ່
ໄປຍັງຢູໂຣບຕາເວັນຕົກເພື່ອຊອກສະແຫວງຫາຄວາມສະຫງົບແລະຄວາມອຸດົມຮັ່ງມີຢູ່ທີ່
ນັ້ນ.
ສ່ວນຢູ່ບ່ອນອື່ນໆ ກະຊວງພາຍໃນຂອງອີຕາລີ ໄດ້ເປີດເຜີຍຂໍ້ມູນ ໃນວັນອັງຄານວານນີ້
ສະແດງໃຫ້ເຫັນວ່າ ຈຳນວນອົບພະຍົບທີ່ກອງທັບເຮືອອີຕາລີຊ່ອຍເຫລືອນັ້ນໄດ້ເພີ້ມຂຶ້ນ
ຢ່າງຫຼວງຫລາຍໃນໄລຍະສາມເດືອນທຳອິດຂອງປີນີ້ ຈາກໄລຍະດຽວກັນຂອງປີທີ່ແລ້ວ.
ໂຕເລກຂອງໜ່ວຍຍາມຝັ່ງສະແດງໃຫ້ເຫັນວ່າ ກອງທັບເຮືອອີຕາລີໄດ້ຊ່ອຍເຫຼືອອົບພະ
ຍົບໃນທະເລ 16,000 ຄົນ ລະຫວ່າງລີເບຍຫາເກາະຊີຊີລີໃນປີນີ້ ສົມທຽບໃສ່ພວກທີ່ຖືກ
ຊ່ອຍເຫລືອກາຍ 10,000 ຄົນໜ້ອຍນຶ່ງໃນປີ 2015.
