ສະພາກຣິສປະຊຸມກັນໃນວັນສຸກມື້ນີ້ ເພື່ອຕັດສິນໃຈວ່າຈະໃຫ້
ການສະໜັບສະໜູນຕໍ່ການປະຕິຮູບທີ່ໄດ້ສະເໜີແກ່ບັນດາລັດ
ຖະມົນຕີການເງິນຢູໂຣບ ເພື່ອເປັນການແລກປ່ຽນກັບການໄດ້
ຮັບເງິນກອບກູ້ເສດຖະກິດເພີ້ມຂື້ນ ໃນຂະນະທີ່ກຣິສກຳລັງດິ້ນ
ລົນເພື່ອຮັກສາໃຫ້ເສດຖະກິດຂອງຕົນ ໃຫ້ລອຍໂຕຢູ່ໄດ້ ແລະ
ຍັງຢູ່ໃນເຂດໃຊ້ເງິນຢູໂຣຕໍ່ໄປ.
ໃນຕອນແລງວັນພະຫັດວານນີ້ ລັດຖະບານຂອງນາຍົກລັດຖະ
ມົນຕີ Alexis Tsipras ໄດ້ສົ່ງຂໍ້ສະເໜີປະຕິຮູບເທື່ອຫລ້າສຸດ
ໄປໃຫ້ບັນດາລັດຖະມົນຕີການເງິນຢູໂຣບ ທີ່ຕ້ອງຕັດສິນໃຈວ່າ
ເຂົາເຈົ້າຈະເຫັນດີໃຫ້ການອະນຸມັດ ເງິນກູ້ຢືມ ກ້ອນໃໝ່ທີ່ຕ້ອງ
ການເປັນທີ່ສຸດນັ້ນ ແກ່ລັດຖະບານທີ່ກຳລັງດິ້ນລົນຂອງກຣີສຫຼືບໍ່.
ບໍ່ມີລາຍລະອຽດຫຍັງຫຼາຍກ່ຽວກັບສິ່ງທີ່ຢູ່ໃນຂໍ້ສະເໜີໃຫມ່ຈາກ Athens. ແຕ່ລາຍງານ
ກ່າວວ່າ ແມ່ນຮວມທັງຄຳຮຽກຮ້ອງຂອງສະຫະພາບຢູໂຣຍ ທີ່ໃຫ້ຂື້ນພາສີຂາຍສິນຄ້າ
ຈຳນວນນຶ່ງ ແລະຕັດການໃຊ້ຈ່າຍລົງ.
ຄວາມບໍ່ສາມາດທີ່ຈະບັນລຸການຕົກລົງຂອງກຣິສ ແລະສະຫະພາບຢູໂຣບ ອາດຈະນຳ
ໄປສູ່ການຂັບໄລ່ກຣິສ ອອກຈາກເຂດໃຊ້ເງິນຢູໂຣທີ່ມີສະມາຊິກ 19 ປະ ເທດໃນຢູໂຣບ
ທີ່ໃຊ້ເງິນຕາຮ່ວມກັນ.
ປະທານາທິບໍດີ ຝຣັ່ງ ທ່ານ Francois Hollande ໄດ້ກ່າວຕໍ່ບັນດານັກຂ່າວໃນວັນສຸກມື້
ນີ້ວ່າ ຂໍ້ສະເໜີໃໝ່ຂອງກຣິສ “ຈິງຈັງ ແລະໜ້າເຊື່ອຖື” ແລະກ່າວ ວ່າ ກຣິສໄດ້ສະແດງໃຫ້
ເຫັນເຖິງຄວາມຕັ້ງໃຈ ທີ່ຢາກຢູ່ ໃນເຂດໃຊ້ເງິນຢູໂຣຕໍ່ໄປ.
ສະຫະພາບຢູໂຣບ ທີ່ມີສະມາຊິກ 28 ປະເທດ ຈະເປີດກອງປະຊຸມສຸກເສີນໃນວັນອາທິດ
ຈະມາເຖິງນີ້ ເພື່ອພິຈາລະນາເບິ່ງສະພາບການຂອງກຣິສ.
