ບັນດາລັດຖະມົນຕີການເງິນ ຂອງເຂດໃຊ້ເງິນຢູໂຣ ກ່າວວ່າ ເຂົາເຈົ້າໄດ້ບັນລຸ “ຄວາມ ກ້າວໜ້າທີ່ສຳຄັນ” ໃນການເຈລະຈາຮອບຫລ້າສຸດກ່ຽວກັບຂໍ້ຕົກລົງເພື່ອຊ່ວຍບັນເທົາ ໜີ້ສິນໃຫ້ແກ່ກຣິສ ຫລາຍຊົ່ວໂມງຫລັງຈາກການສົນທະນາກັນ ທີ່ນະຄອນຫຼວງ Brus- sels ໃນຕອນແລງວັນອັງຄານວານນີ້.
ອົງການກອງທຶນສາກົນ ຫລື IMF ໄດ້ຮຽກຮ້ອງໃຫ້ຫລຸດຜ່ອນພາລະໜີ້ສິນຂອງກຣິສ ເປັນເງື່ອນໄຂເພື່ອຈະໄດ້ຮັບເງິນເພີ້ມຕື່ມຈາກກອງທຶນຊ່ວຍເຫລືອຂອງອົງການ IMF.
ກຣິສຈະໄດ້ຮັບເງິນງວດທຳອິດ ຂອງກອງທຶນຊ່ວຍເຫລືອ ໃນມູນຄ່າ 11 ພັນ 4 ຮ້ອຍ ລ້ານໂດລາ ໃນເດືອນມິຖຸນານີ້ ຫລັງຈາກສະຫະພາບຢູໂຣບຮັບຮູ້ ໃຫ້ການອະນຸມັດຕໍ່ແຜນປະຕິຮູບຫວ່າງມໍ່ໆມານີ້.
ນີ້ເປັນການຊ່ວຍເຫລືອຮອບຫລ້າສຸດ ໃນບັນຫາເສດຖະກິດທີ່ມີມາເປັນເວລາຫົກປີທີ່ ໄດ້ນຳໄປສູ່ການເປັນໜີ້ສິນສາທາລະນະຂອງກຣິສໃນປັດຈຸບັນປະມານ 180 ເປີເຊັນ ຂອງຍອດຜະລິດຮວມພາຍໃນ.
ຫົວໜ້າອົງການ IMF ປະຈຳຢູໂຣບ ທ່ານ Poul Thomsen ກ່າວໃນວັນອັງຄານວານ ນີ້ວ່າ “ພວກເຮົາຍິນດີ ຊຶ່ງໃນປັດຈຸບັນ ໄດ້ເປັນທີ່ຮັບຮູ້ ໂດຍຜູ້ມີຮຸ້ນສ່ວນທັງໝົດ ທີ່ວ່າ ໜີ້ສິນຂອງກຣິສ ບໍ່ສາມາດຄໍ້າຈຸນໄດ້.”
ຄວາມຍາກລຳບາກໃນຂໍ້ຕົກລົງດ້ານການເມືອງ ຊຶ່ງໄດ້ປະສົບກັບການຕ້ານຢັນ ໂດຍ ສະເພາະຈາກເຢ ຣະມັນ ຊຶ່ງເປັນປະເທດທີ່ມີອິດທິພົນຂອງເຂດໃຊ້ເງິນຢູໂຣທີ່ຍັງສືບ ຕໍ່ຮຽກຮ້ອງໃຫ້ມີການປະຢັດມັດທະຍັດເພີ້ມຂຶ້ນ ໂດຍອ້າງວ່າການໃຫ້ເງິນຊ່ວຍເຫລືອກ້ອນນີ້ແມ່ນບໍ່ມີຄວາມຈຳເປັນ.
ແຕ່ວ່າກຣິສ ມີຄວາມຕ້ອງການຢ່າງຮີບດ່ວນ ເງິນງວດທຳອິດ ຂອງຈຳນວນ 8 ພັນ 4 ຮ້ອຍລ້ານໂດລາ ເພື່ອໃຊ້ໜີ້ໃຫ້ແກ່ທະນາຄານກາງຂອງຢູໂຣບ ແລະ ອົງການ IMF ໃນເດືອນກໍລະກົດຈະມາເຖິງນີ້. ກຣີສໃນປັດຈຸບັນກຳລັງດີ້ນລົນແມ່ນແຕ່ຈະຈ່າຍເງິນເດືອນໃຫ້ພວກພະນັກງານຂອງລັດຖະບານ.
ປະທານກຸ່ມໃຊ້ເງິນຢູໂຣທ່ານ Jeroen Dijsselbloem ກ່າວຕໍ່ກອງປະຊຸມຖະແຫຼງຂ່າວ ວ່າ “ນີ້ເປັນເວລາອັນສຳຄັນຂອງໂຄງການທີ່ຍາວນານສຳລັບກຣິສເປັນເວລາອັນສຳຄັນ ສຳລັບພວກເຮົາທັງໝົດ ນັບແຕ່ລະດູຮ້ອນປີກາຍນີ້ ເວລາພວກເຮົາ ໄດ້ມີວິກິດຄັ້ງໃຫຍ່ ກ່ຽວກັບຄວາມເຊື່ອໝັ້ນລະຫວ່າງພວກເຮົາ.”
