ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ກຣີສປ່ອນບັດເອົາ ປະທານາທິບໍດີ ຮອບຕັດສິນຊີ້ຂາດ (ວີດີໂອ)


ສະຖານປ່ອນບັດເລືອກຕັ້ງແຫ່ງນຶ່ງໃນກຣີສ ທີ່ທໍາການເລືອກຕັ້ງໃນວັນອາທິດ ທີ 17 ເດືອນນີ້
ສະຖານປ່ອນບັດເລືອກຕັ້ງແຫ່ງນຶ່ງໃນກຣີສ ທີ່ທໍາການເລືອກຕັ້ງໃນວັນອາທິດ ທີ 17 ເດືອນນີ້

ການປ່ອນ​ບັດໄດ້​ໄຂ​ຂຶ້ນ​ແລ້ວຢູ່​ໃນ​ປະ​ເທດ​ກຣີສ ສໍາລັບ​ການ​ເລືອກ​ຕັ້ງທີ່​ອາດ​ສາມາດ​ຕັດສິນອະນາຄົດ​ຂອງ​ປະ​ເທດທີ່​ມີ​ໜີ້​ສິນ​ຖ້ວມ​ຕົວ ຢູ່​ໃນ​ເຂດ​ໃຊ້​ເງິນຢູ​ໂຣ ທີ່​ມີ​ສະມາ​ຊິກ 17 ປະ​ເທດ​ນັ້ນ.

ບັນດາ​ຜູ້​ແຂ່ງຂັນສະໝັກ​ເລືອກ​ຕັ້ງ​ຄົນ​ສໍາຄັນ ກໍ​ຄື​ຜູ້​ສະໝັກ​ຈາກພັກ ປະຊາທິປະ​ໄຕ​ໃໝ່ ຫົວ​ອະນຸລັກ​ນິຍົມ​ ​ແລະ​ຈາກພັກ Syriza ​ຫົວ​ຮຸນ​ແຮງ​ຊ້າຍ​ຈັດນັ້ນ ​ໄດ້​ໃຫ້​ຄໍາ​ໝັ້ນ​ສັນຍາ ວ່າ​ຈະ​ປະກອບ​ລັດຖະບານ​ ທີ່​ຈະ​ທໍາ​ການເຈລະຈາຄືນ​ໃໝ່ ​ເງຶ່​ອນ​ໄຂ​ທີ່​ເຄ່ງຄັດ​ຕ່າງໆກ່ຽວ​ກັບມາດ​ຕະການ​ປະ​ຍັດ​ມັດທະ​ຍັດ ສໍາລັບ​ການ​ຊ່ວຍ​ເຫລືອ​ເພື່ອ​ກອບ​ກູ້​ເ​ສດຖະກິດ​ຈາກ​ສະຫະພາບ​ຢູ​ໂຣບ ​ແລະ​ກອງ​ທຶນ​ສາກົນ ຫຼື ​ໄອ​ແອ​ມ​ເ​ເອຟນັ້ນ.

ທ່ານ Antonis Samaras ຜູ້​ນໍາ​ພັກ​ປະຊາ​ທິປະ​ໄຕ​ໃໝ່ ​ໄດ້​ຕໍາ​ໜິຕິຕຽນ ທ່ານ Alexis Tsipras ຄູ່​ແຂ່ງ​ພັກ​ຫົວ​ຮຸນ​ແຮງ​ຊ້າຍ​ຈັດ​ຂອງ​ທ່ານ ວ່າ​ສະໜັບສະໜູນນະ​ໂຍບາຍ​ຕ່າງໆ ​ທີ່​ຈະນໍາພາ​ປະ​ເທດ​ຊາດ​ໃຫ້​ຕົກ​ຢູ່​ໃນ​ສະຖານະ​ການ​ທີ່​ຮ້າຍແຮງ​ລົງ​ໄປ​ກວ່າ​ ທີ່​ເປັນ​ຢູ່​ໃນ​ປັດຈຸບັນ​ນີ້.

ສ່ວນທ່ານ Tsipras ຜູ້​ນໍາ​ພັກ​ Syriza ຊ້າຍ​ຈັດນັ້ນ ຢາກ​ຍົກ​ເລີກຂໍ້​ຕົກ​ລົງ​ກ່ຽວ​ກັບ​ມາດ​ຕະການ​ປະຢັດມັດທະຍັດ​ທັງ​ໝົດນັ້ນ. ບັນດາ​ນັກວິ​ເຄາະ​ກ່າວ​ວ່າ ຖ້າ​ຫາກ​ວ່າ​ພັກ​ຊ້າຍ​ຈັດ ຊະນະ​ການ​ເລືອກ​ຕັ້ງ​ໃນ​ວັນ​ອາທິດ​ມື້​ນີ້​ແລ້ວ ກຣີສກໍ​ອາດ​ຖືກ​ບັງຄັບ​ໃຫ້ອອກ​ຈາກເຂດຢູ​ໂຣນັ້ນ ຊຶ່ງຖ້າ​ຫາກ​ວ່າ​ມັນເກີດຂຶ້ນ​ແທ້ ກຣີສກໍ​ຈະ​ຕ້ອງ​ໄດ້ນໍາ​ເອົາ​ເງິນຕາ drachma ດຣັກມາ ຂອງ​ຕົນ ທີ່ມີ​ອາຍຸ 2,500 ປີ​ນັ້ນ ຄືນ​ມາ​ໃຊ້​ໃໝ່​ອີກ. ບັນດາ​ນັກວິ​ເຄາະ​ກ່າວ​ວ່າ ຄ່າ​ຂອງ​ເງິນຕາ​ເກົ່າ​ຂອງ​ກຣີສນັ້ນ ອາດ​ຕົກ​ລາຄາ​ເຖິງ 65 ​ເປີ​ເຊັນ ​ໃນ​ການ​ແລກປ່ຽນ​ກັບ​ເງິນ​ຢູ​ໂຣ

ຫລັງ​ການຜົນ​ການ​ເລືອກ​ຕັ້ງ​ທີ່​ບໍ່​ເດັດຂາດເມື່ອ​ເດືອນ​ຜ່ານ​ມາ​ນັ້ນ ທັງສາມ​ພັກການ​ເມືອງ​ຊັ້ນ​ນໍາ​ຂອງ​ກຣີສ ຊຶ່ງ​ໂຮມ​ທັງພັກສັງຄົມ​ນິຍົມ PASOK ນໍາ​ ໄດ້​ຮັບ​ໂອກາດ​ໃຫ້​ຈັດ​ຕັ້ງ​ລັດຖະບານ​ປະສົມ​ຂຶ້ນ​ ແຕ່ກໍບໍ່​ມີ​ພັກ​ໃດໄດ້​ຮັບ​ສຽງ​ສະໜັບ​ສະ​ໜຸນສຽງພຽງພໍ ທີ່​ຈະ​ຈັດ​ຕັ້ງ​ລັດຖະບານ​ຂຶ້ນ​ມາ​ໄດ້ ຊຶ່ງ​ໄດ້​ສົ່ງ​ຜົນ​ໃຫ້​ມີການ​ເລືອກ​ຕັ້ງ​ຊໍ້າ​ອີກ​ໃນ​ວັນ​ອາທິດ​ມື້​ນີ້.

XS
SM
MD
LG