ລັດຖະສະພາຂອງກຣິສ ກໍານົດຈະລົງມະຕິກັນໃນວັນອາທິດມື້ນີ້ ກ່ຽວກັບຮ່າງຍັດຕິວ່າດ້ວຍ
ການເອົາມາດຕະການປະຢັດມັດທະຍັດຕື່ມອີກ ທີ່ສະຫະພາບຢູໂຮບຮຽກຮ້ອງໃຫ້ດໍາເນີນ
ການ ເພື່ອແລກປ່ຽນກັບເງິນຊ່ອຍເຫລື້ອກູ້ໜີ້ສິນກ້ອນໃໝ່ນັ້ນ.
ຄະນະລັດຖະບານກຣິສ ໄດ້ຮັບຮອງເອົາຮ່າງຍັດຕິປະຢັດມັດທະຍັດດັ່ງກ່າວໃນຕອນເດິກ
ວັນສຸກຜ່ານມານີ້. ຖ້າລັດຖະພາຮັບຜ່ານເອົາຮ່າງຍັດຕິສະບັບນີ້ກໍຈະອະນຸມັດໃຫ້ນາຍົກ
ລັດຖະມົນຕີ Lucas Papademos ຕົກລົງຕໍ່ການຕັດຄ່າໃຊ້ຈ່າຍລົງຕື່ມອີກ ທີ່ຈໍາເປັນ
ເພື່ອໃຫ້ໄດ້ຮັບເງິນຊ່ອຍກູ້ໜີ້ສິນງວດໃໝ່ຈໍານວນ 172 ຕື້ໂດລາ ເພື່ອຫລີກລ້ຽງການ
ປະກາດລົ້ມລະລາຍນັ້ນ.
ຄະນະນໍາພາກຣິສ ໄດ້ພາກັນທໍາການຂໍ້ຮ້ອງແລະອອກຄໍາເຕື່ອນໃໝ່ ກ່ອນການລົງມະຕິ
ຂັ້ນຊີຂາດກັນໃນວັນອາທິດມື້ນີ້.
ໃນການກ່າວປາໄສທີ່ຖ່າຍທອດອອກທາງໂທລະພາບໃນວັນເສົາວານນີ້ ນາຍົກລັດຖະມົນ
ຕີ Papademos ໄດ້ກ່າວປ້ອງກັນການຕັດໜ້າວຽກລົງຫລາຍພັນວຽກ ພ້ອມກັບການ
ຕັດອັດຕາຄ່າແຮງງານຕໍ່າສຸດລົງ ແລະມາດຕະການປະຢັດມັດທະຍັດອື່ນໆ ທີ່ຈະເອື້ອອໍາ
ນວຍໃຫ້ປະເທດ ໄດ້ຮັບເງິນຊ່ອຍກູ້ໜີ້ສິນງວດທີສອງນັ້ນ.
ທ່ານ George Papandreou ຜູ້ນໍາພັກສັງຄົມນິຍົມຫລື Pasok ແລະທ່ານ Antonis
Samaras ຜູ້ນໍາພັກປະຊາທິປັດໃໝ່ ກໍໄດ້ອອກມາກ່າວໃນທໍານອງດຽວກັນກັບນາຍົກລັດ
ຖະມົນຕີ ແລະຮຽກຮ້ອງໄປຍັງບັນດາສະມາຊິກສະພາຜູ້ແທນ ຈົ່ງໃຫ້ການສະໜັບສະໜຸນ
ຕໍ່ການຕັດງົບປະມານຮອບຫລ້າສຸດນີ້ ໂດຍກ່າວວ່າ ມັນບໍ່ມີທາງເລືອກອື່ນໃດທີ່ພໍຈະດໍາ
ເນີນການໄດ້.
ທ່ານ Papandreou ກ່າວເຕືອນວ່າ ຄວາມລົ້ມແຫລວໃນການບໍ່ຮັບຜ່ານການເອົາມາດຕະ
ການປະຢັດມັດທະຍັດນີ້ ຈະນໍາພາປະເທດໄປສູ່ຄວາມພິນາດ.
